SAvsIND: தென்னாப்பிரிக்கா டெஸ்ட் தொடரிலிருந்து ஷமி விலகினார், ஒருநாள் போட்டிகளிலிருந்து சாஹர் விலகல்
தென்னாப்பிரிக்காவிற்கு சுற்றுப் பயணம் மேற்கொண்டுள்ள இந்திய கிரிக்கெட் அணி, டி20, ஒருநாள் மற்றும் டெஸ்ட் தொடரில் பங்கேற்க்கிறது. ஏற்கனவே, டி20 தொடர், 1-1 என சமனில் முடிந்து நிலையில், ஒருநாள் போட்டிகள் நாளை தொடங்குகின்றன. இந்நிலையில், தென்னாபிரிக்காவிற்கு எதிரான இரண்டு போட்டியில் கொண்ட டெஸ்ட் தொடரிலிருந்து, காயம் காரணமாக முகமது ஷமி விலகியதாக பிசிசிஐ தெரிவித்துள்ளது. ஷமி, டெஸ்ட் தொடரில் பங்கேற்பது உடற்தகுதியை பொருத்தது என்ற நிலையில், இந்திய கிரிக்கெட் வாரியத்தின் மருத்துவக் குழுவால் நடத்தப்பட்ட மருத்துவ சோதனையில் அவர் தேர்ச்சி பெறவில்லை. அண்மையில் நடந்து முடிந்த உலகக்கோப்பை தொடரில், 24 விக்கெட்டுகள் வீழ்த்தி, இந்திய அணியில் முதன்மையான பந்துவீச்சாளராக ஷமி திகழ்ந்தது குறிப்பிடத்தக்கது.
குடும்ப மருத்துவ அவசர நிலையால் தீபக் சாஹர் விலகல்
ஆல்-ரவுண்டர் தீபக் சாஹர் குடும்பத்தில் ஏற்பட்ட மருத்துவ அவசரநிலை காரணமாக, ஒருநாள் தொடரிலிருந்து விலகியுள்ளார். அவருக்கு பதிலாக மேற்குவங்கத்தைச் சார்ந்த ஆகாஷ் தீப் அணியில் சேர்க்கப்பட்டுள்ளார். மேலும் டெஸ்ட் போட்டிகளுக்கு தயாராவதற்காக, இரண்டு மற்றும் மூன்றாவது ஒருநாள் போட்டிகளில் ஷ்ரேயாஸ் ஐயர் விளையாட மாட்டார் என பிசிசிஐ அறிவித்துள்ளது. டி20 தொடருக்கு சூரியகுமார் யாதவ் தலைமை தாங்கிய நிலையில், ஒருநாள் தொடரில் இந்திய அணியை கே எல் ராகுல் வழி நடத்துகிறார்.
டெஸ்ட் தொடரில் பங்கேற்கும் இந்திய அணி
ரோஹித் சர்மா (C), சுப்மான் கில், யஷஸ்வி ஜெய்ஸ்வால், விராட் கோலி, ஷ்ரேயாஸ் ஐயர், ருதுராஜ் கெய்க்வாட், இஷான் கிஷன் (wk), KL ராகுல் (wk), ரவிச்சந்திரன் அஷ்வின், ரவீந்திர ஜடேஜா, ஷர்துல் தாக்கூர், முகமது சிராஜ், முகேஷ் குமார், ஜஸ்பிரித் பும்ரா (VC), பிரசித் கிருஷ்ணா. ஒரு நாள் தொடரில் பங்கேற்கும் இந்திய அணி: ருதுராஜ் கெய்க்வாட், சாய் சுதர்சன், திலக் வர்மா, ரஜத் படிதார், ரின்கு சிங், ஷ்ரேயாஸ் ஐயர், கே.எல்.ராகுல் (C)(wk), சஞ்சு சாம்சன் (wk), அக்சர் படேல், வாஷிங்டன் சுந்தர், குல்தீப் யாதவ், யுஸ்வேந்திர சாஹல், முகேஷ் குமார், அவேஷ் கான் , அர்ஷ்தீப் சிங், ஆகாஷ் தீப்
