பிரதமர் மோடி அடுத்த மாதம் அமெரிக்காவில் டிரம்பை சந்திக்கக்கூடும் என தகவல்
செய்தி முன்னோட்டம்
பிரதமர் நரேந்திர மோடி அடுத்த மாதம் ஐக்கிய நாடுகள் சபையின் பொதுச் சபைக் கூட்டத்திற்காக அமெரிக்கா செல்ல வாய்ப்புள்ளது. அப்போது வர்த்தகம் தொடர்பான பிரச்சினைகளைத் தீர்க்க ஜனாதிபதி டொனால்ட் டிரம்புடன் ஒரு சந்திப்பை நடத்த திட்டமிட்டுள்ளனர். டிரம்பைத் தவிர, பிரதமர் மோடி உக்ரைன் அதிபர் ஜெலென்ஸ்கி உள்ளிட்ட வெளிநாட்டுத் தலைவர்களுடனும் உயர்மட்ட சந்திப்புகளை நடத்துவார் என்று இந்தியா டுடே செய்தி கூறியது. ஐ.நா. பொதுச் சபை உச்சி மாநாடு செப்டம்பரில் நியூயார்க் நகரில் நடைபெறும். செப்டம்பர் 23 ஆம் தேதி தொடங்கும் ஒரு வார உச்சி மாநாட்டில் உலகத் தலைவர்கள் பலரும் கலந்து கொள்வார்கள் என எதிர்பார்க்கப்படுகிறது.
சாத்தியக்கூறுகள்
வர்த்தகம், கட்டணங்கள், ரஷ்ய எண்ணெய் கொள்முதல் உள்ளிட்டவை பற்றி பேச்சுவார்த்தை?
ஒரு வேளை, பிரதமர் மோடி, டிரம்ப் உடன் பேச்சுவார்த்தை நடத்துவதாக இருந்தால், வர்த்தகம் முதல் ரஷ்யா எண்ணெய் கொள்முதல் வரை விவாதிக்கப்படும் என எதிர்பார்க்கப்படுகிறது. முதலாவதாக, விவசாயம் மற்றும் பால் துறைகளை அமெரிக்காவிற்கு திறந்து விடுவதில் இந்தியா தயக்கம் காட்டியதால் ஏற்பட்ட சுணக்கத்தை தீர்த்து, இந்தியா-அமெரிக்க இருதரப்பு வர்த்தக ஒப்பந்தத்தில் முன்னேற்றம் அடைவது திட்டமாக இருக்கும்.
வரிகள்
டிரம்ப் விதித்த கூடுதல் வரிகள்
வர்த்தக ஒப்பந்த முட்டுக்கட்டைக்கு மத்தியில், டிரம்ப் இந்தியா மீது 25% வரியையும், ரஷ்ய எண்ணெய் தொடர்ந்து கொள்முதல் செய்வதால் கூடுதலாக 25% வரியையும் விதித்து, மொத்த வரியை 50% ஆகக் கொண்டு வந்தார். இந்தியப் பொருட்கள் மீதான டிரம்பின் 50% வரிகளில் பாதி ஆகஸ்ட் 7 ஆம் தேதி அமலுக்கு வந்த நிலையில், மீதமுள்ளவை ஆகஸ்ட் 27 ஆம் தேதி முதல் அமலுக்கு வர உள்ளன. அமெரிக்காவிற்கும், இந்தியாவிற்கும் இடையே ஒரு மோதல் புள்ளியாக மாறியுள்ள மற்றொரு முக்கிய பிரச்சினை, இந்தியா ரஷ்யாவிடம் இருந்து எண்ணெய் வாங்குவதாகும். இது, உக்ரைன் மீது மாஸ்கோவின் போரை வலுப்படுத்தும் ஒரு வருவாய் ஆதாரம் என்று வெள்ளை மாளிகை கூறுகிறது.