Loading...
ஜம்மு காஷ்மீர் புட்காம் பகுதியில் பாதுகாப்புப் படை அதிரடி: லஷ்கர்-ஏ-தொய்பா தளபதி, பஹல்காம் தாக்குதலின் முக்கிய குற்றவாளி சுட்டுக்கொலை
பாதுகாப்பு படையினர் நடத்திய தாக்குதலில், LeT தளபதி சுட்டுக்கொல்லப்பட்டார்

ஜம்மு காஷ்மீர் புட்காம் பகுதியில் பாதுகாப்புப் படை அதிரடி: லஷ்கர்-ஏ-தொய்பா தளபதி, பஹல்காம் தாக்குதலின் முக்கிய குற்றவாளி சுட்டுக்கொலை

எழுதியவர் Venkatalakshmi V
Sep 30, 2026
07:55 am

செய்தி முன்னோட்டம்

மத்திய காஷ்மீரின் புட்காம் மாவட்டத்தில் உள்ள அடர்ந்த காட்டுப் பகுதியில் பாதுகாப்பு படையினர் செவ்வாய்க்கிழமை நடத்திய தாக்குதலில், லஷ்கர்-இ-தொய்பா (LeT) பயங்கரவாத அமைப்பின் முக்கியத் தளபதி சுட்டுக்கொல்லப்பட்டார். புட்காம் மாவட்டம் யூஸ்மார்க் பகுதிக்கு உட்பட்ட கோராக் மற்றும் துத்பத்ரி வனப்பகுதிகளில் பயங்கரவாதிகள் பதுங்கியிருப்பதாக கிடைத்த ரகசியத் தகவலின் அடிப்படையில், ராஷ்ட்ரீய ரைபிள்ஸ் மற்றும் எல்லைப் பாதுகாப்புப் படையினர் இணைந்து தேடுதல் வேட்டையைத் தொடங்கினர். அப்போது சந்தேகத்திற்கு இடமான வகையில் நடமாடிய நபர்களை படையினர் எச்சரித்தபோது, அவர்கள் பாதுகாப்புப் படையினரை நோக்கித் துப்பாக்கியால் சுடத் தொடங்கினர். உடனே படையினர் நடத்திய எதிர் தாக்குதலில் லஷ்கர்-இ-தொய்பா அமைப்பின் மூத்த பயங்கரவாதி மூசா சம்பவ இடத்திலேயே கொல்லப்பட்டார். இவர் பஹல்காம் தாக்குதலின் முக்கிய குற்றவாளி.

தொடர்பு

பிர் பஞ்சால் பகுதியில் பல தாக்குதல்களில் தொடர்பு

கொல்லப்பட்ட பயங்கரவாதி மூசா, பிர் பஞ்சால் மலைத்தொடரின் இருபுறமும் கடந்த சில ஆண்டுகளாக நடைபெற்ற பல்வேறு பயங்கரவாதத் தாக்குதல்களில் தொடர்புடையவர் என அதிகாரிகள் தெரிவித்துள்ளனர்.

கடந்த செப்டம்பர் 5-ஆம் தேதி யூஸ்மார்க் மலையில் நடைபெற்ற என்கவுன்டரில் இருந்து தப்பிய இவர், மீண்டும் தேடுதல் வேட்டையின் போது பிடிபட்டுள்ளார்.

செப்டம்பர் 5 தாக்குதலில் இவரது நெருங்கிய கூட்டாளியான யாசிர் கொல்லப்பட்டது குறிப்பிடத்தக்கது.

LeT அமைப்பின் செயல்பாட்டு தளபதியாக இருந்த மூசாவின் வீழ்ச்சி, ஜம்மு காஷ்மீரில் அந்த அமைப்பின் பின்னடைவுக்கு பெரிய காரணியாக பார்க்கப்படுகிறது.

இப்பகுதியில் மேலும் சிலர் பதுங்கியிருக்கலாம் என்ற சந்தேகத்தில் தீவிரத் தேடுதல் நடவடிக்கை தொடர்ந்து நடைபெற்று வருகிறது.

ஆபரேஷன் கோராக்

'ஆபரேஷன் கோராக்' பின்னணி

பத்காம் மாவட்டத்தின் யூஸ்மார்க் அருகே உள்ள கோராக் பகுதியிலுள்ள அடர்ந்த வனப்பகுதியில் பயங்கரவாதிகள் பதுங்கியிருப்பதாகக் கிடைத்த ரகசியத் தகவலின் அடிப்படையில், இந்திய ராணுவம், ஜம்மு காஷ்மீர் காவல்துறை மற்றும் சி.ஆர்.பி.எஃப் இணைந்த கூட்டுப் படையினர் 'ஆபரேஷன் கோராக்' என்ற தேடுதல் நடவடிக்கையைத் தொடங்கினர்.

செவ்வாய்க்கிழமை இரவு பாதுகாப்புப் படையினர் சந்தேகத்திற்குரிய நகர்வுகளைக் கண்டு எச்சரித்தபோது, பயங்கரவாதிகள் தாக்குதல் நடத்தினர்.

படையினர் நடத்திய பதில் தாக்குதலில் லஷ்கர்-இ-தொய்பா அமைப்பின் முக்கியத் தலைவர்களில் ஒருவரான ஹாஷிம் மூசா கொல்லப்பட்டார்.

புதன்கிழமை காலை பால்மைதான் வனப்பகுதியில் அவரது உடலைக் கைப்பற்றிய படையினர், அவரிடமிருந்து போர்க் கால ஆயுதங்கள் மற்றும் வெடிபொருட்களையும் பறிமுதல் செய்தனர்.

ADVERTISEMENT

விவரங்கள்

யார் இந்த ஹாஷிம் மூசா?

பாகிஸ்தான் ஆக்கிரமிப்பு காஷ்மீரை சேர்ந்த ஹாஷிம் மூசா, பாகிஸ்தான் ராணுவத்தின் சிறப்புப் படைப்பிரிவான 'SSG' பிரிவில் சிறப்புப் பயிற்சி பெற்றவர் என்று பாதுகாப்பு முகமைகள் தெரிவிக்கின்றன.

பூஞ்ச்-ரஜோரி மண்டலம், பிர் பாஞ்சால் மலைத்தொடர் மற்றும் காஷ்மீர் பள்ளத்தாக்கு பகுதிகளில் நடைபெற்ற பல பயங்கரவாத தாக்குதல்களில் இவருக்கு தொடர்புள்ளது.

பஹல்காம் பகுதியில் நடந்த தாக்குதல் வழக்கில் தேசிய புலனாய்வு முகமையால்(NIA) தேடப்பட்டு வந்த இவரை பற்றி தகவல் கொடுப்போருக்கு ரூ. 20 லட்சம் வெகுமதி அறிவிக்கப்பட்டிருந்தது.

இவருடன் இணைந்து செயல்பட்டு வந்த மற்றொரு முக்கிய பயங்கரவாதியான யாசிர், கடந்த செப்டம்பர் 5 அன்று நடந்த மோதலில் கொல்லப்பட்ட நிலையில், தற்போது மூசாவும் நடுநிலையாக்கப்பட்டுள்ளார்.

ADVERTISEMENT