கொளத்தூர் MLA பாபு மறைவைத் தொடர்ந்து தமிழகத்தில் 6 சட்டமன்றத் தொகுதிகள் காலி; தவெக பலம் 108 ஆகக் குறைந்தது
செய்தி முன்னோட்டம்
கொளத்தூர் தொகுதி தமிழக வெற்றிக் கழக (தவெக) சட்டமன்ற உறுப்பினர் வி.எஸ். பாபு நேற்று உடல்நலக் குறைவால் காலமானதைத் தொடர்ந்து, தமிழக சட்டப்பேரவையில் காலியாக உள்ள தொகுதிகளின் எண்ணிக்கை ஆறாக உயர்ந்துள்ளது. மேலும், சட்டப்பேரவையில் ஆளுங்கட்சியான தவெக எம்.எல்.ஏ-க்களின் எண்ணிக்கை 108 ஆகக் குறைந்துள்ளது. கடந்த ஏப்ரல் மாதம் நடைபெற்ற தமிழக சட்டமன்றத் தேர்தலில் 108 தொகுதிகளில் வெற்றி பெற்ற தவெக, காங்கிரஸ், விசிக மற்றும் இந்திய யூனியன் முஸ்லிம் லீக் ஆகிய கட்சிகளின் ஆதரவுடன் ஆட்சியமைத்தது. மே 10-ஆம் தேதி தமிழக முதலமைச்சராக விஜய் பதவியேற்றார். அதன்பின் அடுத்தடுத்து நடைபெற்ற ராஜினாமாக்கள் மற்றும் மறைவு காரணமாக தற்போது 6 தொகுதிகள் காலியாக உள்ளன.
6 தொகுதிகள்
தமிழக சட்டப்பேரவையில் காலியாக உள்ள 6 தொகுதிகள் எவை?
திருச்சி கிழக்கு: முதல்வர் விஜய், தேர்தல் ஆணைய விதிகளின்படி திருச்சி கிழக்கு தொகுதி எம்.எல்.ஏ. பதவியை ராஜினாமா செய்ததால் இத்தொகுதி காலியானது.
பெருந்துறை: அதிமுக சார்பில் வெற்றி பெற்ற ஜெயகுமார் தனது பதவியை ராஜினாமா செய்துவிட்டு தவெகவில் இணைந்ததால் காலியானது.
அம்பாசமுத்திரம்: அதிமுக சார்பில் வெற்றி பெற்ற இசக்கி சுப்பையா பதவியை ராஜினாமா செய்து தவெகவில் இணைந்ததால் காலியானது.
கரூர்: அதிமுக சார்பில் வெற்றி பெற்ற எம்.ஆர். விஜயபாஸ்கர் பதவியை ராஜினாமா செய்து தவெகவில் இணைந்ததால் காலியானது.
விராலிமலை: அதிமுக சார்பில் வெற்றி பெற்ற சி. விஜயபாஸ்கர் பதவியை ராஜினாமா செய்து தவெகவில் இணைந்ததால் காலியானது.
கொளத்தூர்: தவெக எம்.எல்.ஏ. வி.எஸ். பாபு உடல்நலக் குறைவால் காலமானதைத் தொடர்ந்து தற்போது காலியாகியுள்ளது.
தவெக
தற்போதைய தவெக பலம்
திருச்சி கிழக்கு, பெருந்துறை, அம்பாசமுத்திரம், கரூர் மற்றும் விராலிமலை ஆகிய 5 தொகுதிகளுக்கு நீதிமன்ற வழக்கு காரணமாக இதுவரை இடைத்தேர்தல் நடத்தப்படவில்லை.
108 இடங்களில் வென்று, 2 இடைத்தேர்தல் வெற்றிகளுடன் 109 ஆக இருந்த தவெக பலம் (விஜய் ஒரு தொகுதியை ராஜினாமா செய்த பிறகு), கொளத்தூர் எம்.எல்.ஏ. மறைவால் மீண்டும் 108 ஆக குறைந்துள்ளது.
கொளத்தூர் தொகுதி காலியானதாகச் சட்டப்பேரவைச் செயலகம் அதிகாரப்பூர்வமாக அறிவித்த பிறகு, 6 மாதங்களுக்குள் அங்கு இடைத்தேர்தல் நடத்த தேர்தல் ஆணையம் நடவடிக்கை எடுக்கும் என எதிர்பார்க்கப்படுகிறது.