2027 கிராமி விருதுகள்: பரிந்துரைப் பட்டியலில் இடம்பிடித்து வரலாறு படைத்த முதல் தமிழ்ப் பாடல் 'வருவாய்'
செய்தி முன்னோட்டம்
சர்வதேச இசை உலகின் உயரிய விருதாக கருதப்படும் 69-வது கிராமி விருதுகளுக்கான இறுதி பரிந்துரைப் பட்டியல் நவம்பர் 16-ஆம் தேதி வெளியிடப்பட்டுள்ளது. இதில், பாலிவுட் நடிகர் ரன்வீர் சிங் நடிப்பில் வெளியாகி மாபெரும் வெற்றி பெற்ற 'துரந்தர்: தி ரிவெஞ்ச்' திரைப்படத்தின் பாடல்கள் 8 பிரிவுகளில் பரிசீலனைக்கு அனுப்பப்பட்டபோதிலும், ஒரு பரிந்துரையைக் கூட பெறாமல் ஏமாற்றமடைந்துள்ளது. அதே சமயம், இந்திய இசை ரசிகர்களுக்கு பெருமை சேர்க்கும் விதமாக, பின்னணி பாடகர் தேவன் ஏகாம்பரம் மற்றும் சுஷா (சுபிக்ஷா ரங்கராஜன்) ஆகியோரின் 'வருவாய்' என்ற தமிழ்ப் பாடல் கிராமி விருதுக்கு பரிந்துரைக்கப்பட்டு வரலாறு படைத்துள்ளது.
'வருவாய்'
கிராமி வரலாற்றில் இடம்பிடித்த முதல் தமிழ்ப் பாடல் 'வருவாய்'
'சிறந்த உலகளாவிய இசை நிகழ்ச்சி' பிரிவில் 'வருவாய்' பாடல் பரிந்துரைக்கப்பட்டுள்ளது.
கிராமி விருது வரலாற்றில் பரிந்துரைப் பட்டியலில் இடம்பிடித்த முதல் தமிழ்ப் பாடல் இதுவாகும்.
இந்தப் பிரிவில் ஷகிரா, ஃபாரெல் வில்லியம்ஸ், ஏஞ்சலிக் கிட்ஜோ மற்றும் ரோசாலியா போன்ற உலகப் புகழ்பெற்ற கலைஞர்களின் பாடல்களுடன் 'வருவாய்' போட்டியிடுகிறது.
29 ஆண்டுகால இசைப் பயணத்தில் தனக்கு கிடைத்த மிகப்பெரிய அங்கீகாரம் இதுவென தேவன் ஏகாம்பரம் நெகிழ்ச்சியுடன் தெரிவித்துள்ளார்.
'துரந்தர்: தி ரிவெஞ்ச்'
8 பாடல்கள் அனுப்பியும் ஏமாற்றமடைந்த 'துரந்தர்: தி ரிவெஞ்ச்'
ஆதித்யா தர் இயக்கத்தில் ரன்வீர் சிங், சாரா அர்ஜுன், மாதவன், அர்ஜுன் ராம்பால், சஞ்சய் தத் உள்ளிட்டோர் நடிப்பில் வெளியான ஸ்பை திரில்லர் திரைப்படமான 'துரந்தர்:தி ரிவெஞ்ச்', உலகளவில் ரூ.1,363.15 கோடி வசூலித்து சாதனை படைத்தது.
இப்படத்திற்கு ஷஷ்வத் சச்தேவ் இசையமைத்திருந்த நிலையில், படக்குழுவினர் 8 பாடல்களை பல்வேறு பிரிவுகளில் பரிசீலனைக்கு அனுப்பியிருந்தனர்.
இந்தியத் துணைக்கண்டம் முழுவதும் இப்பாடல்கள் பெரும் வரவேற்பைப் பெற்றிருந்தாலும், இறுதிப் பரிந்துரைப் பட்டியலில் ஒன்றும் இடம்பெறவில்லை.
2027 கிராமி பரிந்துரைப் பட்டியலில் பிரிட்டிஷ் பாடகி ரேய் 11 பிரிவுகளில் பரிந்துரைக்கப்பட்டு முதலிடத்தில் உள்ளார். அவரைத் தொடர்ந்து ரோசாலியா 9 பரிந்துரைகளைப் பெற்றுள்ளார்.
69-வது கிராமி விருது வழங்கும் விழா வரும் பிப்ரவரி 7-ஆம் தேதி லாஸ் ஏஞ்சல்ஸில் நடைபெறவுள்ளது.