அமெரிக்க F-16 போர் விமானத்தைத் தாக்கியதாக ஈரான் உரிமைகோரல்: முற்றிலும் பொய் என அமெரிக்க ராணுவம் Fact-Check வெளியீடு
செய்தி முன்னோட்டம்
பாரசீக வளைகுடா வான்பரப்பில் பறந்த அமெரிக்காவின் எஃப்-16 போர் விமானத்தைத் தங்களது வான் பாதுகாப்பு அமைப்பு ஏவுகணை வீசித் தாக்கியதாக ஈரான் சனிக்கிழமை (நவம்பர் 21) உரிமை கோரியது. ஆனால் இந்தக் குற்றச்சாட்டை அமெரிக்க மத்திய கட்டளையகம் முற்றிலும் பொய்யானது என Fact-Check அறிக்கை வெளியிட்டு திட்டவட்டமாக நிராகரித்துள்ளது. மத்திய கிழக்குப் பிராந்தியத்தில் செயல்படும் அனைத்து அமெரிக்க ராணுவ போர் விமானங்களும் பாதுகாப்பாக உள்ளன என்றும் எந்தவொரு விமானமும் தாக்கப்படவில்லை என்றும் அமெரிக்க ராணுவம் தெரிவித்துள்ளது.
ஈரான் ஊடகங்கள் தகவல்
அபுதாபியில் விமானம் அவசரமாகத் தரையிறங்கியதாக ஈரான் ஊடகங்கள் வெளியிட்ட தகவல்
வெள்ளிக்கிழமை மாலை பாரசீக வளைகுடாவில் பறந்து கொண்டிருந்த அமெரிக்க எஃப்-16 போர் விமானத்தைத் தங்களது வான் பாதுகாப்பு அமைப்புகள் கண்டறிந்து ஏவுகணை செலுத்தியதாக ஈரானின் அரசு ஊடகமான பிரஸ் டிவி செய்தி வெளியிட்டது.
விமானத்தின் அருகே ஏவுகணை வெடித்ததில் சேதம் ஏற்பட்டதால் விமானி தனது பணியைக் கைவிட்டு அருகிலுள்ள விமானத் தளத்திற்குத் திருப்பி விட்டதாகக் கூறப்பட்டது.
மேலும் விமானக் கண்காணிப்புத் தரவுகளை மேற்கோள் காட்டி அபுதாபியில் உள்ள அல் தஃப்ரா விமானத் தளத்தில் அவசரக் குறியீட்டுடன் அவ்விமானம் தரையிறங்கியதாக ஈரானிய ஊடகங்கள் தெரிவித்தன.
முந்தைய உரிமைகோரல்கள்
மார்ச், ஏப்ரல் மற்றும் ஜூன் மாதங்களில் ஈரான் முன்வைத்த முந்தைய உரிமைகோரல்கள்
அமெரிக்க போர் விமானங்களைத் தாக்கியதாக ஈரான் இதற்கு முன்பும் பலமுறை உரிமை கோரியுள்ளது.
கடந்த மார்ச் இறுதியில் ஈரானுக்கு எதிரான நடவடிக்கைக்குப் பிறகு அமெரிக்க எஃப்-16 விமானம் ஒன்று அவசரமாகத் தரையிறங்கியதை சென்ட்காம் உறுதிப்படுத்தியிருந்தது.
அதேசமயம் மத்திய ஈரானில் அமெரிக்க எஃப்-35 போர் விமானங்களைத் தாக்கியதாக ஏப்ரல் மாதத்திலும், பாரசீக வளைகுடாவில் எஃப்-16 விமானத்தை விரட்டியடித்ததாக ஜூன் மாதத்திலும் ஈரானின் இஸ்லாமிய புரட்சிகர காவல்படை அறிவித்திருந்தது.
ஈரான் எச்சரிக்கை
அமெரிக்கப் பொருளாதாரத் தடையை உடைப்போம் என ஈரான் எச்சரிக்கையும் பதிலடி மிரட்டலும்
இதற்கிடையில் அமெரிக்க அதிபர் டொனால்ட் டிரம்ப் அணு ஆயுதத் தடுப்பு ஒப்பந்தத்திற்கு அழுத்தம் கொடுத்து வரும் நிலையில் அமெரிக்காவின் பொருளாதாரத் தடையை உடைக்கத் தேவையான அனைத்து நடவடிக்கைகளும் எடுக்கப்படும் என ஈரான் எச்சரித்துள்ளது.
அமெரிக்காவின் பொருளாதார முற்றுகை ஒரு போர் நடவடிக்கை எனக் கூறிய ஈரான் துணை வெளியுறவு அமைச்சர் காசெம் கரிபாபாதி, அணுசக்தி பேச்சுவார்த்தைகள் இன்னும் தொடங்கவில்லை என்றும் செறிவூட்டப்பட்ட அணுசக்திப் பொருட்கள் ஏற்றுமதி செய்யப்படாது என்றும் திட்டவட்டமாகத் தெரிவித்துள்ளார்.
மேலும் எந்தவொரு புதிய தாக்குதலுக்கும் உடனடிப் பதிலடி கொடுக்கப்படும் என ஈரான் ராணுவமும் எச்சரித்துள்ளது.