போர் நிலை அறிவிப்பு: இஸ்ரேல் மற்றும் பாலஸ்தீனம் ஏன் மோதிக் கொள்கின்றன?
ஒவ்வொரு சனிக்கிழமையும் நமது NewsBytesயில் வெளியாகும் வரலாற்று நிகழ்வு கட்டுரையை படித்து, இந்திய மற்றும் உலக வரலாற்று நிகழ்வுகளை விரிவாக தெரிந்துகொள்ளுங்கள். இஸ்ரேலுக்கு எதிராக பாலஸ்தீன போராளிகள் இன்று அதிகாலை நடத்திய மிகப்பெரும் தாக்குதலைத் தொடர்ந்து இஸ்ரேலில் 'போர் நிலை' பிரகடனப்படுத்தப்பட்டுள்ளது. 5000 ராக்கெட்டுகளை வைத்து நடத்தப்பட்ட இந்த தாக்குதலில் 40 இஸ்ரேலியர்கள் கொல்லப்பட்டனர், 500 பேர் காயமடைந்தனர். இது குறித்து ஒரு வீடியோவை வெளியிட்டிருக்கும் இஸ்ரேல் பிரதமர் பெஞ்சமின் நெதன்யாகு, "இஸ்ரேல் குடிமக்களே! நாம் போரில் இருக்கிறோம். இது ஒரு மோதல் அல்ல, நடவடிக்கையும் அல்ல -இது போர்! நாம் இதில் வெற்றி பெறுவோம்." என்று கூறியுள்ளார். இந்நிலையில், இஸ்ரேல் மற்றும் பாலஸ்தீனத்திற்கு இடையிலான பிரச்சனையின் வரலாறு குறித்து இப்போது பார்க்கலாம்.
பிரிட்டன் ஆட்சியில் தொடங்கிய பிரிவினைகள்
முதலாம் உலகப் போரில் ஒட்டோமான் பேரரசு தோற்கடிக்கப்பட்டதை அடுத்து, யூத சிறுபான்மையினரும், அரேபிய பெரும்பான்மையினரும் வாழ்ந்த பாலஸ்தீனத்தை பிரிட்டன் கைப்பற்றியது. அதன் பிறகு, பாலஸ்தீனத்தை யூதர்களின் தாயகமாக உருவாக்குவதற்கு சர்வதேச சமூகமும் பிரிட்டனும் முயற்சித்தது. இதனால், யூதர்கள் மற்றும் அரேபியர்களுக்கு இடையே பதட்டம் அதிகரித்தது. 1920கள் மற்றும் 1940களில், பல யூதர்கள் ஐரோப்பாவில் துன்புறுத்தப்பட்டதால், அதில் இருந்து தப்பிக்க அவர்கள் ஐரோப்பாவில் இருந்து பாலஸ்தீனத்திற்கு குடி பெயர்ந்தனர். அதனை தொடர்ந்து, யூதர்களுக்கும் அரேபியர்களுக்கும் இடையிலான உரசலும், பிரிட்டிஷ் ஆட்சிக்கு எதிரான எதிர்ப்பும் தீவிரமடைந்தன. 1947இல், ஐக்கிய நாடுகள் சபை பாலஸ்தீனத்தை இரு நாடுகளாக பிரிக்க வாக்களித்தது.
பாலஸ்தீனியர்களுக்கு நேர்ந்த அவலம்
இந்த திட்டத்தை யூத தலைமை ஏற்றுக்கொண்டது. ஆனால் அரபு தரப்பு அதை முற்றிலுமாக நிராகரித்துவிட்டது. அதனால், அது ஒருபோதும் செயல்படுத்தப்படவில்லை. 1948இல், இந்த சண்டையை முடிவுக்கு கொண்டுவர முடியாமல், பிரிட்டிஷ் அதிகாரிகள் பின்வாங்கிவிட்டனர். அதன் பின், யூத தலைவர்கள் இஸ்ரேல் என்ற நாட்டை நிறுவினர். பல பாலஸ்தீனியர்கள் இதை கடுமையாக எதிர்த்தார்கள். அதனால் அப்போது போர் வெடித்தது. அண்டை நாடுகளான அரபு நாடுகள் ராணுவ பலத்துடன் இந்த போரில் தலையிட்டன. அப்போது நூறாயிரக்கணக்கான பாலஸ்தீனியர்கள் தங்கள் வீடுகளை விட்டு வெளியேற்றப்பட்டனர். அதில் பெரும்பாலானோர் அண்டை நாடுகளில் அகதிகளாக புகுந்தனர். தற்போது, பெரும்பாலான பாலஸ்தீனிய அகதிகள் மற்றும் அவர்களது சந்ததியினர் காசா, மேற்குக் கரை, கிழக்கு ஜோர்டான்,சிரியா மற்றும் லெபனான் ஆகிய நாடுகளில் வாழ்கின்றனர்.
பாலஸ்தீனியர்கள் எதற்காக போராடி வருகின்றனர்?
1987ஆம் ஆண்டில், ஹரகாத் அல்-முகவாமா அல்-இஸ்லாமியா(இஸ்லாமிய எதிர்ப்பு இயக்கம்) என்ற இராணுவத் திறன் கொண்ட ஒரு அரசியல் குழு, பாலஸ்தீனிய மதகுரு ஷேக் அகமது யாசினால் தொடங்கப்பட்டது. இது சுருக்கமாக ஹமாஸ் என்று அழைக்கபடுகிறது. பாலஸ்தீனியர்களின் தனி நாட்டிற்காக போராடும் ஒரு முக்கிய குழு இதுவாகும். இந்த குழு காசா என்ற பகுதியை கைக்குள் வைத்திருக்கிறது. இஸ்ரேலை ஒப்பிடும் போது காசா என்பது மிக சிறிய பகுதியாகும். பாலஸ்தீனியர்கள் இஸ்ரேலின் ஒரு பகுதியாக இருக்கும் தங்களுக்கு சொந்தமான நிலத்தை கோரி போராடி வருகின்றனர். ஆனால், பாலஸ்தீனியர்களை அவர்களுக்கு சொந்தமான வீடுகளுக்குத் திரும்ப அனுமதித்தால் அது யூத நாடான தங்களது நாட்டை அச்சுறுத்தும் என்று இஸ்ரேல் கூறிவருகிறது.
நிலத்தை பிரிப்பதில் உள்ள சிக்கல்கள்
காசா பகுதியை பயங்கரவாத அமைப்பாக கருதப்படும் பாலஸ்தீனியர்களின் 'ஹமாஸ்' ஆட்சி செய்கிறது. காசாவின் எல்லைகள் இஸ்ரேல் மற்றும் எகிப்தின் கட்டுப்பாட்டில் உள்ளன. மேற்குக் கரை என்னும் பகுதி இன்னும் இஸ்ரேலால் ஆக்கிரமிக்கப்பட்டுள்ளது. ஆனால், மேற்குக் கரை, தங்களுக்கு சொந்தமானது என்று பாலஸ்தீனியர்கள் கூறி வருகின்றனர். காசா, மேற்குக் கரை மற்றும் கிழக்கு ஜெருசலேமில் வசிக்கும் இஸ்ரேல் மற்றும் பாலஸ்தீனர்களுக்கு இடையே பதற்றம் தற்போது வரை நிலவி வருகிறது. ஜெருசலேம் முழுவதையும் தனது தலைநகராக இஸ்ரேல் கோருகிறது. பாலஸ்தீனியர்கள் கிழக்கு ஜெருசலேமை எதிர்கால பாலஸ்தீனிய அரசின் தலைநகர் என்று கூறுகின்றனர். இதனால், அந்த நாட்டை பிரிப்பதில் பல பிரச்சனைகள் உள்ளன. இந்நிலையில், தங்களுக்கான நாட்டை கோரி பாலஸ்தீனியர்கள் தற்போது ஒரு பெரும் போரை தொடங்கியுள்ளனர்.
இஸ்ரேல்-பாலஸ்தீனம்: தற்போதைய நிலை
இஸ்ரேலுக்கு எதிரான போரில் இணையுமாறு மேற்குக்கரை, அரபு மற்றும் இஸ்லாமிய நாடுகளில் உள்ள தனது போராளிகளுக்கு ஹமாஸ் அழைப்பு விடுத்துள்ளது. ஹமாஸ் பயங்கரவாத அமைப்பை ஒடுக்கும் நோக்கத்தோடு, இஸ்ரேலும் எகிப்தும் காசா பகுதியின் எல்லைகளில் கடுமையான கட்டுப்பாடுகளை விதித்துள்ளன. இதனால், காசாவில் கடும் மனிதாபிமான நெருக்கடி ஏற்பட்டுள்ளது. அங்கு வாழும் பலர் உணவு மற்றும் தண்ணீர் போன்ற அடிப்படைத் தேவைகளைப் பெற போராடுகிறார்கள். காசா முற்றுகை, மேற்குக்கரை தடுப்புச்சுவர், பாலஸ்தீன வீடுகளை அழித்தல் போன்ற இஸ்ரேலின் நடவடிக்கைகளால் தாங்கள் பாதிக்கப்படுவதாக காசா மற்றும் மேற்குக்கரையில் வாழும் பாலஸ்தீனியர்கள் கூறுகின்றனர். பாலஸ்தீன வன்முறையில் இருந்து தங்கள் நாட்டை பாதுகாப்பதற்காகவே தாங்கள் செயல்படுவதாக இஸ்ரேல் கூறுகிறது.
