ரீவைண்ட் 2023 : டென்னிஸ் விளையாட்டின் சிறந்த தருணங்கள்
2023 ஆம் ஆண்டு நடந்த நான்கு டென்னிஸ் கிராண்ட் ஸ்லாம் போட்டிகள் முழுவதும் பல விறுவிறுப்பான போட்டிகளை கொண்டிருந்தன. டென்னிஸ் உலகின் தலைசிறந்த தொடர்கள் என அழைக்கப்படுவது கிராண்ட்ஸ்லாம் போட்டிகள்தான். இது ஜனவரியில் ஆஸ்திரேலிய ஓபனில் தொடங்கி பின்னர் பிரெஞ்சு ஓபன், விம்பிள்டன் ஓபன் மற்றும் யுஎஸ் ஓபன் என மொத்தம் நான்கு போட்டித் தொடர்களை கொண்டுள்ளது. 2023 முடிந்து 2024 தொடங்க உள்ள இந்த சமயத்தில் 2023 ஆம் ஆண்டு நடந்த நான்கு கிராண்ட்ஸ்லாம் போட்டிகளில் வெற்றி பெற்றவர்கள் குறித்து இதில் விரிவாக பார்க்கலாம்.
ஆஸ்திரேலிய ஓபனில் கம்பேக் கொடுத்த நோவக் ஜோகோவிச்
2022 சீசனில் கொரோனா தடுப்பூசி போடாததால் நோவக் ஜோகோவிச்சுக்கு அனுமதி மறுக்கப்பட்ட நிலையில், 2023 சீசனில் ஆடவர் ஒற்றையர் பிரிவில் நட்சத்திர டென்னிஸ் வீரர் நோவக் ஜோகோவிச் சிறந்த மறுபிரவேசம் செய்தார். இந்த தொடரின் இறுதிப்போட்டியில் ஸ்டெபனோஸ் சிட்சிபாஸை வீழ்த்தி 22வது முறையாக கிராண்ட்ஸ்லாம் பட்டத்தை வென்றார். மேலும் 10வது முறையாக ஆஸ்திரேலிய ஓபன் பட்டத்தையும் வென்றார். இதேபோல் மகளிர் ஒற்றையர் பிரிவு இறுதி ஆட்டத்தில் எலினா ரைபாகினாவை தோற்கடித்து அரினா சபலெங்கா பட்டம் வென்றார். இது அவரது முதல் பெரிய ஒற்றையர் பட்டமாகும்.
பிரெஞ்சு ஓபனில் மீண்டும் பட்டம் வென்ற நோவக் ஜோகோவிச்
பாரிசின் களிமண் மைதானத்தில் நடைபெற்ற பிரெஞ்சு ஓபன் போட்டியில் நட்சத்திர வீரர் ரஃபேல் நடால் காயம் காரணமாக பங்கேற்கவில்லை. இந்நிலையில், ஆஸ்திரேலிய ஓபனில் பட்டம் வென்ற தெம்புடன் களமிறங்கிய நோவக் ஜோகோவிச் இதிலும் இறுதிப்போட்டிக்கு முன்னேறினார். இறுதிப்போட்டியில் காஸ்பர் ரூடை எதிர்கொண்ட நோவக் ஜோகோவிச் 7-6, 6-3 மற்றும் 7-5 என்ற செட் கணக்கில் போராடி வென்று பட்டத்தை கைப்பற்றினார். இதற்கிடையே மகளிர் பிரிவில், இகா ஸ்வியாடெக் தனது களிமண் மைதானத்தின் ஆதிக்கத்தை உறுதிப்படுத்தி, தனது இரண்டாவது பிரெஞ்சு ஓபன் பட்டத்தை வென்று, களிமண் மைதானத்தில் தனது ஆதிக்கத்தை மீண்டும் நிலைநாட்டினார்.
விம்பிள்டனில் ஆச்சரியம் கொடுத்த கார்லஸ் அல்கராஸ்
இங்கிலாந்தின் லண்டனில் உள்ள அழகுபடுத்தப்பட்ட புல்வெளிகளில் நடைபெற்ற இந்த தொடரில் ஆடவர் ஒற்றையர் பிரிவில் நட்சத்திர வீரர் நோவக் ஜோகோவிச் இறுதிப்போட்டியில் இளம் வீரர் கார்லஸ் அல்கராஸை எதிர்கொண்டார். இருவருக்கும் இடையே நடந்த கடுமையான மோதலில் கார்லஸ் அல்கராஸ் நோவக் ஜோகோவிச்சை தோற்கடித்து பட்டம் வென்றார். இதன் மூலம் விம்பிள்டன் பட்டம் வென்ற மூன்றாவது இளம் டென்னிஸ் வீரர் என்ற சிறப்பையும் அவர் பெற்றார். இதற்கிடையே, மகளிர் ஒற்றையர் பிரிவில் யாரும் எதிர்பாராத வகையில் தரவரிசையில் இல்லாத செக் குடியரசு நாட்டின் மார்கெட்டா வோண்ட்ரூசோவா பட்டம் வென்று ஆச்சரியப்படுத்தினார்.
யுஎஸ் ஓபனில் சாதனை படைத்த ரோஹன் போபண்ணா
2023 கிராண்ட்ஸ்லாம் தொடர்களின் கடைசி போட்டியான யுஎஸ் ஓபனில் நோவக் ஜோகோவிச் டிமிட்ரி மெட்வதேவை தோற்கடித்து தனது 24வது கிராண்ட்ஸ்லாம் பட்டத்தை வென்றார். இதன் மூலம் அதிக கிராண்ட்ஸ்லாம் பட்டங்களை வென்றவர் என்ற செரீனா வில்லியம்ஸின் சாதனையை சமன் செய்தார். மகளிர் ஒற்றையர் பிரிவு யுஎஸ் ஓபன் கிராண்ட்ஸ்லாம் போட்டியில் அமெரிக்காவைச் சேர்ந்த கோகோ காப் பட்டம் வென்றார். இதற்கிடையே யுஎஸ் ஓபன் இரட்டையர் போட்டியில் இந்தியாவின் ரோஹன் போபண்ணா ஆஸ்திரேலியாவின் மேத்யூ எப்டனுடன் சேர்ந்து இறுதிப்போட்டி வரை முன்னேறினார். இதன் மூலம் ரோஹன் போபண்ணா யுஎஸ் ஓபன் இரட்டையர் வரலாற்றில் இறுதிப்போட்டியில் விளையாடிய வயதான வீரர் என்ற சாதனை படைத்தார்.