உலக துப்பாக்கி சுடுதல்: 2-வது தங்கப் பதக்கத்தை வென்று இந்திய மகளிர் அணி சாதனை
செய்தி முன்னோட்டம்
கத்தார் தலைநகர் தோஹாவில் உள்ள லுசைல் துப்பாக்கி சுடுதல் வளாகத்தில் நடைபெற்று வரும் 2026 ஐஎஸ்எஸ்எஃப் உலக துப்பாக்கி சுடுதல் சாம்பியன்ஷிப் தொடரில், மகளிர் 25 மீட்டர் பிஸ்டல் அணிகள் பிரிவில் இந்தியா தனது இரண்டாவது தங்கப் பதக்கத்தை கைப்பற்றி புதிய வரலாறு படைத்துள்ளது. இந்தியாவின் நட்சத்திர வீராங்கனைகளான மனு பாக்கர், இஷா சிங் மற்றும் திவ்யா ஆகியோர் அடங்கிய இந்தியக் கூட்டணி மொத்தம் 1791-68x புள்ளிகளைக் குவித்து முதலிடம் பிடித்து தங்கப் பதக்கத்தைத் தட்டிச் சென்றது. இப்போட்டியில் தென் கொரியா வெள்ளிப் பதக்கத்தையும், வியட்நாம் வெண்கலப் பதக்கத்தையும் வென்றன.
இரட்டை மகிழ்ச்சி
தனிநபர் இறுதிப் போட்டிக்குத் தகுதி
அணிகள் பிரிவில் தங்கம் வென்றதோடு மட்டுமின்றி, தனிநபர் பிரிவின் இறுதிச் சுற்றுக்கும் மனு பாக்கர் மற்றும் இஷா சிங் தகுதி பெற்று நாட்டிற்கு இரட்டை மகிழ்ச்சியை ஏற்படுத்தியுள்ளனர்.
தகுதிச் சுற்றில் அபாரமாகச் செயல்பட்ட இஷா சிங் 590-25x புள்ளிகளுடன் மூன்றாவது இடத்தையும், மனு பாக்கர் 587-24x புள்ளிகளுடன் ஆறாவது இடத்தையும் பிடித்து முதல் எட்டு இடங்களுக்குள் நுழைந்து இறுதிச் சுற்றை உறுதி செய்தனர்.
சக இந்திய வீராங்கனையான திவ்யா 584 புள்ளிகளுடன் பத்தாவது இடத்தைப் பெற்று நூலிழையில் இறுதி வாய்ப்பைத் தவறவிட்டார்.
ஒலிம்பிக்
ஒலிம்பிக் வாய்ப்பும் பதக்கப் பட்டியலும்
தனிநபர் இறுதிப் போட்டியில் களமிறங்கும் மனு பாக்கர் மற்றும் இஷா சிங் இருவரும் பதக்கம் வெல்வதுடன், 2028 லாஸ் ஏஞ்சல்ஸ் ஒலிம்பிக் போட்டிக்கான ஒதுக்கீட்டு இடத்தைப் பிடிக்கும் அரிய வாய்ப்பையும் பெற்றுள்ளனர்.
நடப்பு தொடரில் மகளிர் பிரிவில் இந்திய அணி பெற்றுள்ள முதல் தங்கம் இதுவாகும். முன்னதாக ஆடவர் 50 மீட்டர் பிஸ்டல் அணிகள் பிரிவில் இந்தியா முதல் தங்கத்தை வென்றிருந்தது.
இந்த வெற்றியின் மூலம் 2 தங்கம், 5 வெள்ளி மற்றும் ஒரு வெண்கலம் என மொத்தம் 8 பதக்கங்களுடன் சீனாவுக்கு அடுத்தபடியாக இந்தியா பதக்கப் பட்டியலில் இரண்டாவது இடத்தில் நீடிக்கிறது.