4 மாவட்டங்களுக்கு மஞ்சள் அலர்ட்; நவம்பர் 15 வரை கனமழை தொடரும்; வானிலை மையம் தகவல்
செய்தி முன்னோட்டம்
தமிழகத்தில் வடகிழக்குப் பருவமழை தீவிரமடைந்து வரும் சூழலில், அடுத்த சில நாட்களுக்கான மழை குறித்த விரிவான அறிக்கையை சென்னை மண்டல வானிலை ஆய்வு மையம் வெளியிட்டுள்ளது. அர்னாப் மற்றும் முரசு ஆகிய இரு புயல்கள் காரணமாக ஏற்கனவே வட மற்றும் தென் மாவட்டங்களில் பரவலாக கனமழை பெய்துள்ளது. தற்போது இந்த புயல்கள் ஆந்திரக் கடலோரப் பகுதிகளில் கரையை கடந்த நிலையில், தமிழகத்தில் அடுத்தடுத்த நாட்களில் பெய்யவுள்ள மழை குறித்த விபரங்களை வானிலை மையம் எக்ஸ் தளத்தில் பதிவிட்டுள்ளது.
நவம்பர் 10, 11
நவம்பர் 10 மற்றும் 11 ஆகிய தேதிகளுக்கான மழை அறிவிப்பு
நாளை (நவம்பர் 10) ராமநாதபுரம் மற்றும் தூத்துக்குடி ஆகிய இரண்டு மாவட்டங்களில் கனமழை பெய்ய வாய்ப்புள்ளதாக குறிப்பிடப்பட்டுள்ளது.
மேலும் மயிலாடுதுறை, தஞ்சாவூர், திண்டுக்கல், தேனி, மதுரை, சிவகங்கை, திருவாரூர், புதுக்கோட்டை, விருதுநகர், தென்காசி, திருநெல்வேலி மற்றும் கன்னியாகுமரி ஆகிய மாவட்டங்களில் மிதமான மழை பெய்யக்கூடும்.
தொடர்ந்து நவம்பர் 11 ஆம் தேதி தென் மாவட்டங்களில் மிதமான மழையும், வட மாவட்டங்களில் லேசான மழையும் பெய்யும் எனத் தெரிவிக்கப்பட்டுள்ளது.
மாவட்டவாரியான விபரம்
நவம்பர் 12 முதல் 14 வரையிலான மாவட்ட வாரியான மழை விபரம்
நவம்பர் 12 அன்று மயிலாடுதுறை, தஞ்சாவூர், திருவாரூர், நாகப்பட்டினம், புதுக்கோட்டை, நெல்லை மற்றும் கன்னியாகுமரி மாவட்டங்களில் மிதமான மழை பெய்யும்.
தொடர்ந்து நவம்பர் 13 மற்றும் 14 ஆகிய தேதிகளில் சென்னை, திருவள்ளூர், காஞ்சிபுரம், செங்கல்பட்டு, ராணிப்பேட்டை, கோவை, நீலகிரி மற்றும் தென்காசி உள்ளிட்ட மாவட்டங்களில் லேசான மழைக்கு வாய்ப்புள்ளது.
புதுச்சேரி மற்றும் கடலோரப் பகுதிகளிலும் இந்த நாட்களில் லேசான மழை பதிவாகக்கூடும் என வானிலை மையம் தெரிவித்துள்ளது.
மஞ்சள் அலர்ட்
நவம்பர் 15 ஆம் தேதி 4 மாவட்டங்களுக்கு மஞ்சள் எச்சரிக்கை
வரும் நவம்பர் 15 ஆம் தேதி மயிலாடுதுறை, தஞ்சாவூர், திருவாரூர் மற்றும் நாகப்பட்டினம் ஆகிய 4 டெல்டா மாவட்டங்கள் மற்றும் காரைக்கால் பகுதியில் கனமழை பெய்ய வாய்ப்புள்ளதால் மஞ்சள் அலர்ட் விடுக்கப்பட்டுள்ளது.
அதேநாளில் சென்னை, திருவள்ளூர், காஞ்சிபுரம், செங்கல்பட்டு, விழுப்புரம், கடலூர், திருச்சி, புதுக்கோட்டை, ராமநாதபுரம் மற்றும் தூத்துக்குடி உள்ளிட்ட மாவட்டங்களில் மிதமான மழை பெய்யக்கூடும்.
பொதுமக்கள் தேவையான முன்னெச்சரிக்கை நடவடிக்கைகளை மேற்கொள்ள அறிவுறுத்தப்பட்டுள்ளனர்.