உலகில் மக்கள் வாழ விலையுயர்ந்த நகரங்கள் எவை?
உலகில் மக்கள் வாழ மிக விலையுயர்ந்த நகரங்கள் பட்டியலில் சிங்கப்பூர் தொடர்ந்து முதலிடத்தில் நீடிக்கிறது. பொருளாதார புலனாய்வு பிரிவு வெளியிட்டுள்ள இந்த அறிக்கையில் எந்த ஒரு இந்திய நகரமும் இடம்பெறவில்லை. பொருளாதார புலனாய்வு பிரிவு(Economist Intelligence Unit), அத்தியாவசிய பொருட்களின் விலை ஏற்றத்தால், இந்த ஆண்டு சராசரி வாழ்வாதார செலவுகள் 7.4% அதிகரித்துள்ளதாக கூறுகிறது. அதிகரிக்கும் வட்டி விகிதம், உலகளாவிய மோதல்கள் மற்றும் கடுமையான பாதிப்புகள் காரணமாக பணம் வீக்கம் குறையும் என, பொருளாதார புலனாய்வு பிரிவின், உலகளாவிய வாழ்க்கைச் செலவுத் தலைவரான உபாசனா தத் கணித்திருப்பதாக சிஎன்என் கூறுகிறது.
உலகின் டாப் 10 விலை உயர்ந்த நகை நங்கள் எவை?
சிங்கப்பூர் மற்றும் ஸ்விட்சர்லாந்து தலைநகரான சூரிச் இந்த பட்டியலில் முதலிடத்தை பிடித்துள்ளன. போக்குவரத்து, ஆடை, மளிகை பொருட்கள் மற்றும் மது உள்ளிட்ட பல்வேறு பொருட்களின் விலை ஏற்றம், சிங்கப்பூரை கடந்த 11 ஆண்டுகளில், ஒன்பதாவது ஆண்டாக முதலிடத்தில் வைத்துள்ளது. சுவிஸ் நாணயமான பிராங்கின் வலிமை, மளிகை பொருட்கள், கேளிக்கை உள்ளிட்டவற்றின் விலையேற்றம், சூரிச் நகரை இப்பட்டியலில் இரண்டாம் இடத்தில் வைத்துள்ளது. மூன்றாவது இடத்தை மற்றொரு ஸ்விட்சர்லாந்து நகரமான ஜெனிவாவும், அமெரிக்க நகரமான நியூயார்க்கும் பிடித்துள்ளன.
தரவரிசையில் வீழ்ச்சி அடைந்த ஆசிய நகரங்கள்
ஹாங்காங் இப்பட்டியலில் ஐந்தாம் இடத்தை பிடித்துள்ள நிலையில், லாஸ் ஏஞ்சலஸ் நகரம் ஆறாம் இடத்தை பிடித்துள்ளது. பாரிஸ், கோபன்ஹேகன், சான் பிரான்சிஸ்கோ மற்றும் டெல் அவிவ் ஆகியவை முதல் 10 இடங்களைப் பிடித்தன. குறிப்பிடத்தக்க மாற்றமாக, ஆசிய நகரங்கள் குறைவான விலை ஏற்றத்தையே பதிவு செய்துள்ளன. இதனால்,பெய்ஜிங், நான்ஜிங், டேலியன் மற்றும் வுக்ஸி உள்ளிட்ட சீன நகரங்கள் மற்றும் ஜப்பானின் டோக்கியோ மற்றும் ஒசாகா நகரங்கள் இந்த ஆண்டு பட்டியலில் வீழ்ச்சி அடைந்துள்ளது குறிப்பிடத்தக்கது. மேலும் ரஷ்ய நகரங்களான மாஸ்கோ மற்றும் செயின்ட் பீட்டர்ஸ்பர்க் இந்த பட்டியலில் சரிவை கண்டுள்ளன. இந்த ஆண்டு தரவரிசையில் முறையே 105 இடங்கள் சரிந்து 142 ஆகவும், 74 இடங்கள் 147 ஆகவும் உள்ளன.
இந்த ஆய்வு எவ்வாறு மேற்கொள்ளப்படுகிறது?
இந்த ஆண்டு நடத்தப்பட்ட ஆய்வில் 173 நகரங்கள் ஆய்வுக்கு உட்படுத்தப்பட்டுள்ளன. கடந்த ஆண்டு 450% விலைவாசி உயர்வைக் கண்ட வெனிசுலாவின் கராகஸ் மற்றும் போரால் பாதிப்படைந்த கீவ் நகரங்கள் ஆய்விற்கு எடுத்துக்கொள்ளப்படவில்லை. இந்த தரவுகள், 200 பல்வேறு தயாரிப்புகள் மற்றும் சேவைகளில் 400க்கும் மேற்பட்ட தனிப்பட்ட விலைகளை ஒப்பிடுவதன் மூலம் கிடைக்கப்பெறுகிறது. மேலும், சிரியாவின் டமாஸ்கஸ், உலகின் மிகவும் மலிவான நகரமாக அறிவிக்கப்பட்டுள்ளது.
