8 நாடுகளில் பரவும் புதிய கொரோனா வைரஸ் PJ.2.1: அதிவேக உருமாற்றம் குறித்து உலக சுகாதார அமைப்பு எச்சரிக்கை
செய்தி முன்னோட்டம்
கொரோனா வைரஸின் புதிய மரபணு உருமாற்றப் பிரிவான 'PJ.2.1' (SARS-CoV-2 lineage PJ.2.1), அமெரிக்கா, ஐரோப்பா, ஆசியா உள்ளிட்ட பல கண்டங்களில் உள்ள 8 நாடுகளில் வேகமாகப் பரவி வருவதைத் தொடர்ந்து, உலக சுகாதார நிறுவனம் (WHO) மற்றும் சர்வதேச சுகாதாரக் கண்காணிப்பு அமைப்புகள் இதனைத் தீவிரமாகக் கண்காணித்து வருகின்றன. கடந்த மே 2 அன்று கனடாவின் ஒன்டாரியோ மாகாணத்தில் முதன்முறையாகக் கண்டறியப்பட்ட இந்த வைரஸ், தற்போது அமெரிக்கா, ஸ்பெயின், பிரான்ஸ், சிங்கப்பூர், ஆஸ்திரேலியா, நியூசிலாந்து மற்றும் இஸ்ரேல் ஆகிய நாடுகளில் உறுதி செய்யப்பட்டுள்ளது. வழக்கத்திற்கு மாறாக இதன் ஸ்பைக் புரோட்டீனில் அதிகளவிலான புதிய மரபணு மாற்றங்கள் நிகழ்ந்துள்ளதால், விஞ்ஞானிகள் இதனை 'சால்டேஷன் வகை' உருமாற்றமாக வகைப்படுத்தியுள்ளனர்.
பரிசோதனை அவசியம்
பருவகால காய்ச்சல் போன்ற அறிகுறிகள்
இந்த புதிய PJ.2.1 வகைக்கு என்று பிரத்யேகமான அல்லது வித்தியாசமான புதிய அறிகுறிகள் எதுவும் இதுவரை கண்டறியப்படவில்லை.
பாதிக்கப்பட்டவர்களுக்கு வழக்கமான மேல் சுவாசக்குழாய் பாதிப்புகளான காய்ச்சல், இருமல், தொண்டை வலி, மூக்கடைப்பு, தலைவலி, உடல் சோர்வு மற்றும் தசை வலி போன்ற பொதுவான கோவிட் அறிகுறிகளே காணப்படுகின்றன. சிலருக்கு லேசான செரிமானக் கோளாறுகள், வாசனை மற்றும் சுவை இழப்பு ஏற்படலாம்.
இதன் அறிகுறிகள் சாதாரண சளி மற்றும் பருவகால ஃப்ளூ காய்ச்சலுடன் ஒத்துப்போவதால், வெறும் அறிகுறிகளை வைத்து மட்டுமே இந்தத் தொற்றைக் கண்டறிய முடியாது என்றும், ஆன்டிஜென், ஆர்டி-பிசிஆர் பரிசோதனைகள் மற்றும் ஜீனோம் சீக்வென்சிங் மூலமாக மட்டுமே இத்தன்மையை உறுதி செய்ய முடியும் என்றும் சுகாதாரத்துறை நிபுணர்கள் தெளிவுபடுத்தியுள்ளனர்.
ஆய்வக முடிவுகள்
தடுப்பூசியின் செயல்திறன்
புகழ்பெற்ற 'ஜர்னல் ஆஃப் இன்ஃபெக்ஷன்' இதழில் வெளியிடப்பட்டுள்ள சமீபத்திய ஆய்வின்படி, PJ.2.1 வைரஸானது மனித செல்களில் உள்ள 'ACE2' ஏற்பிகளுடன் மிக எளிதாக இணையும் அதீத ஆற்றலைக் கொண்டுள்ளது.
இதன் காரணமாக மனித உடலுக்குள் மிக எளிதாகவும் விரைவாகவும் உட்சென்று முந்தைய வைரஸ்களை விட வேகமாகப் பரவ முடிகிறது.
இருப்பினும், முந்தைய கொரோனா வகைகளுடன் ஒப்பிடும்போது இந்த வகை கடுமையான உடல்நலக் குறைவையோ, அதிக மருத்துவமனை சேர்க்கையையோ அல்லது உயிரிழப்பையோ ஏற்படுத்துவதற்கான எந்தவொரு ஆதாரமும் இதுவரை ஆய்வகங்களில் நிரூபிக்கப்படவில்லை.
மேலும் தற்போது புழக்கத்தில் உள்ள மேம்படுத்தப்பட்ட தடுப்பூசிகள் மூலம் பெறப்பட்ட நோய் எதிர்ப்புச் சக்தியை இந்த வைரஸ் முறியடிக்கவில்லை என்பதால், வழக்கமான பாதுகாப்பு நெறிமுறைகளைப் பின்பற்றினாலே போதுமானது என நிபுணர்கள் தெரிவித்துள்ளனர்.