உலக அளவில் டிரெண்டாகும் தமிழ்நாட்டின் தோசை; டாப் 100 பட்டியலில் இடம்பிடித்து அசத்தல்
செய்தி முன்னோட்டம்
உலக அளவில் மிகவும் பிரபலமான 'டேஸ்ட் அட்லஸ்' (TasteAtlas) உணவு வழிகாட்டி தளம், உலகின் மிகச்சிறந்த 100 பான்கேக் உணவுகளின் புதிய பட்டியலை வெளியிட்டுள்ளது. இதில் ஆச்சரியமளிக்கும் விதமாக, பிரான்ஸ் நாட்டின் புகழ்பெற்ற 'கிரேப்ஸ்' மற்றும் லாட்வியாவின் உருளைக்கிழங்கு பான்கேக்குகளுக்கு இணையாக, இந்தியாவின் பாரம்பரிய உணவுகளான தோசை, ஆப்பம் உள்ளிட்ட 11 உணவுகள் சர்வதேச அளவில் அங்கீகாரம் பெற்றுள்ளன. பொதுவாகப் பான்கேக் என்றாலே மேற்கத்திய நாடுகளில் இனிப்பு வகையாகக் கருதப்படும் வேளையில், இந்தியாவின் புளிக்கப்பட்ட மாவு மற்றும் காரசாரமான மசாலாக்கள் கொண்டு தயாரிக்கப்படும் உணவுகள் இந்த பட்டியலில் முக்கிய இடங்களைப் பிடித்துள்ளது ஆச்சரியப்படுத்துகிறது.
பட்டியல்
உலக பட்டியலில் இந்திய உணவுகள்
மசாலா தோசை: உலகளவில் 6-வது இடத்தைப் பிடித்து டாப் 10 பட்டியலில் நுழைந்து சாதனை படைத்துள்ளது. சாதாரண தோசை மற்றும் பேப்பர் தோசை: தமிழ்நாட்டின் பாரம்பரிய அடையாளமான தோசை 15-வது இடத்தையும், பேப்பர் தோசை 35-வது இடத்தையும் பிடித்துள்ளன. ஆப்பம் மற்றும் உத்தப்பம்: கேரளா மற்றும் தமிழ்நாட்டின் முக்கிய உணவான ஆப்பம் 60-வது இடத்திலும், உத்தப்பம் 74-வது இடத்திலும் உள்ளன.
பிற இந்திய உணவுகள்
பட்டியலில் இடம்பெற்ற பிற இந்திய மாநிலங்களின் உணவுகள்
தென்னிந்திய உணவுகள் மட்டுமின்றி, இந்தியாவின் பல்வேறு மாநிலங்களை சேர்ந்த உணவுகளும் இந்த சர்வதேசப் பட்டியலில் அங்கீகாரம் பெற்றுள்ளன: பெசரட்டு (ஆந்திரா): 63-வது இடம் நீர் தோசை (கர்நாடகா): 84-வது இடம் மால்புவா: 85-வது இடம் கள்ளப்பம் (கேரளா): 95-வது இடம் ரவா தோசை: 96-வது இடம் பிதா (ஒடிசா): 98-வது இடம் சுமார் 8,811-க்கும் மேற்பட்ட பயனாளர்களின் நம்பகமான வாக்குகள் மற்றும் மதிப்பீடுகளின் அடிப்படையில் இந்த பட்டியல் தயாரிக்கப்பட்டுள்ளது. இந்த பட்டியலில் லாட்வியாவின் 'Kartupeļu pankūkas' உருளைக்கிழங்கு பான்கேக் முதலிடத்தைப் பிடித்துள்ளது. இருப்பினும், பாரம்பரிய உணவுகளுக்குப் பெருமை சேர்க்கும் இந்த பட்டியலில், இந்தியாவின் எளிய காலை உணவுகள் பலவும் சர்வதேச அளவில் கவனத்தைப் பெற்றுள்ளது இந்திய உணவு கலாச்சாரத்திற்கு கிடைத்துள்ள மிகப்பெரிய வெற்றியாகும்.