சீனாவில் அதிகரிக்கும் சுவாச நோய்த்தொற்றுகள்: உஷார் நிலையில் இந்திய மாநிலங்கள்
செய்தி முன்னோட்டம்
சீனாவில் குழந்தைகளிடையே சுவாச நோய்தொற்று அதிகரித்து வருவதால், நாடு முழுவதும் உள்ள மருத்துவமனைகளின் தயார்நிலையை உறுதி செய்யுமாறு, அனைத்து மாநிலங்களுக்கும் யூனியன் பிரதேசங்களுக்கும் மத்திய அரசு அறிவுறுத்தி இருந்தது.
இந்நிலையில், மத்திய அரசின் அறிவுறுத்தலுக்கு இணங்க, அனைத்து மருத்துவமனைகளும் உஷார் நிலையில் இருக்குமாறு குறைந்தது 5 மாநில அரசுகள் கேட்டு கொண்டுள்ளன.
ராஜஸ்தான், கர்நாடகா, குஜராத், உத்தரகாண்ட் மற்றும் தமிழ்நாடு ஆகிய மாநில அரசுகள், சுவாசக் கோளாறுகளுடன் வரும் நோயாளிகளைச் சமாளிப்பதற்கான தயார்நிலையை உறுதி செய்யுமாறு மருத்துவமனைகளுக்கு அறிவுறுத்தியுள்ளன.
பருவகால காய்ச்சல் குறித்து பொதுமக்கள் எச்சரிக்கையாக இருக்குமாறு கர்நாடக சுகாதாரத் துறை கேட்டுக் கொண்டுள்ளது.
பருவகால காய்ச்சலின் அறிகுறிகள், ஆபத்து காரணிகள், செய்ய வேண்டியவை மற்றும் செய்யக்கூடாதவை ஆகிவற்றையும் கர்நாடக அரசு குறிப்பிட்டுள்ளது.
டக்லவ்க்ம்
உஷார் நிலையில் ராஜஸ்தான், குஜராத் மற்றும் உத்தரகாண்ட்
நிலைமை "தற்போது கவலைக்கிடமாக இல்லை", ஆனால் மருத்துவ ஊழியர்கள் விழிப்புடன் இருக்க வேண்டும் மற்றும் தொற்று நோய்கள் பரவாமல் தடுக்க வேண்டும் என்று ராஜஸ்தான் சுகாதாரத் துறை தெரிவித்துள்ளது. குழந்தைகள் பிரிவு மற்றும் மருத்துவப் பிரிவுகளில் போதுமான ஏற்பாடுகள் செய்யப்பட வேண்டும் என்றும் ராஜஸ்தான் அரசு கேட்டு கொண்டுள்ளது.
குஜராத்தில், சீனாவின் நிலைமையைக் கருத்தில் கொண்டு முன்னெச்சரிக்கை நடவடிக்கையாக கோவிட்-19யின் போது உருவாக்கப்பட்ட சுகாதார உள்கட்டமைப்புகள் பலப்படுத்தப்பட்டுள்ளது. மேலும், சுகாதார பணியாளர்கள் தங்கள் தயார்நிலையை உறுதி செய்யுமாறு குஜராத் அரசு கேட்டுக் கொண்டுள்ளது.
உத்தரகாண்டின் சாமோலி, உத்தர்காஷி மற்றும் பித்தோராகர் ஆகிய மூன்று மாவட்டங்கள் இந்திய-சீன எல்லையில் உள்ளதால், உத்தரகாண்ட் அரசு, சுவாசக் கோளாறுகள் தொடர்பான கண்காணிப்பை அதிகரிக்குமாறு சுகாதார அதிகாரிகளுக்கு உத்தரவிட்டுள்ளது.