"போர் நிறுத்தம் செய்யப்படும் வரை பிணையக்கைதிகளை விடுவிக்க மாட்டோம்": ஹமாஸ்
செய்தி முன்னோட்டம்
போர் நிறுத்தம் அறிவிக்கப்படும் வரை, பிடித்து வைத்திருக்கும் பிணைய கைதிகளை விடுவிக்க மாட்டோம் என ஹமாஸ் அமைப்பு தெரிவித்துள்ளது.
ரஷ்ய தலைநகர் மாஸ்கோவிற்கு பயணம் மேற்கொண்டுள்ள ஹமாஸ் தலைவர்கள், இவ்வாறு தெரிவித்ததாக ரஷ்ய ஊடகங்கள் செய்தி வெளியிட்டுள்ளன.
கடத்தப்பட்டவர்களை கண்டறிய நேரம் தேவைப்படுவதாக, ஹமாஸ் அமைப்பின் அபு ஹமீத் தெரிவித்ததாக, ரஷ்ய செய்தித்தாள் கொமர்சன்ட் செய்தி வெளியிட்டுள்ளது.
மேலும் அவர், "அவர்கள் பல டஜன் கணக்கான மக்களை பிணையக் கைதிகளாக பிடித்து சென்றனர். காசா பகுதியில் அவர்களை கண்டறிந்து விடுதலை செய்ய எங்களுக்கு நேரம் வேண்டும்" என தெரிவித்ததாக செய்தி வெளியாகி உள்ளது.
2nd card
50 பிணைய கைதிகள் கொல்லப்பட்டுள்ளனர்- அபு ஹமீத்
ஹமாஸ் உறுப்பினரான அபு ஹமீத், பிணையக் கைதிகளை, போர் தொடங்கிய ஆரம்ப நாட்களில் விடுதலை செய்ய ஹமாஸ் எண்ணியதாக தெரிவித்துள்ளார்.
மேலும் அவர் காசாவில், இஸ்ரேல் ராணுவத்தினர் நடத்திய தாக்குதலில், 50க்கும் மேற்பட்ட பிணைய கைதிகள் கொல்லப்பட்டுள்ளதாக தெரிவித்துள்ளார்.
கடந்த அக்டோபர் 7ஆம் தேதி, இஸ்ரேல் மீது 5,000க்கும் மேற்பட்ட ராக்கெட்டுகளை ஏவி, ஹமாஸ் தாக்குதலை தொடங்கியது.
பின் தரை வழியாக இஸ்ரேலுக்குள் ஊடுருவிய ஹமாஸ் அமைப்பினர், 234 பிணைய கைதிகளை பிடித்துச் சென்றதாக இஸ்ரேல் தெரிவித்துள்ளது.
இதில் தற்போது வரை, அமெரிக்காவைச் சேர்ந்த இருவரும், இஸ்ரேலைச் சேர்ந்த இருவரும் விடுவிக்கப்பட்டுள்ளனர்.
அதேசமயம் போர் நிறுத்தம், ஹமாஸ் அமைப்புக்கு மீண்டும் ஒருங்கிணைந்த நேரம் வழங்கும் என்பதால், அதை ஆதரிக்கவில்லை என அமெரிக்கா தெரிவித்துள்ளது.