ஹார்முஸ் நீரிணையை மூடிய ஈரான்: உலக நாடுகளுக்கு என்ன பாதிப்பு?
செய்தி முன்னோட்டம்
அமெரிக்க ராணுவம் ஈரானிய இலக்குகள் மீது தொடர்ந்து இரண்டாவது நாளாக நடத்திய வான்வழித் தாக்குதல்களால் மத்திய கிழக்கு பிராந்தியத்தில் முழு அளவிலான போர் மூளும் அபாயம் ஏற்பட்டுள்ளது. இதற்கு பதிலடியாக, முக்கியமான எரிசக்தி வழித்தடமான ஹார்முஸ் நீரிணையை முழுமையாக மூடுவதாக ஈரான் அறிவித்துள்ளதால் உலகளாவிய எரிபொருள் விநியோகத்தில் கடுமையான நெருக்கடி உருவாகியுள்ளது. சர்வதேச சந்தையில் தினசரி நுகரப்படும் கச்சா எண்ணெயில் கிட்டத்தட்ட 20% இந்த ஹார்முஸ் நீரிணை வழியாகவே கொண்டு செல்லப்படுகிறது. சவூதி அரேபியா, ஈராக், குவைத் மற்றும் ஐக்கிய அரபு அமீரகம் போன்ற முன்னணி எண்ணெய் உற்பத்தி நாடுகள் தங்களின் ஏற்றுமதிக்கு இந்த ஒரே ஒரு பாதையையே நம்பியுள்ளன. இதனால் இப்பாதையின் முடக்கம் உலக அளவில் பெரும் விநியோகத் தட்டுப்பாட்டை ஏற்படுத்தும்.
விலை ஏற்றம்
எரிவாயு தட்டுப்பாடு மற்றும் விலை ஏற்றம்
எண்ணெய் மட்டுமன்றி, உலகளவில் ஏற்றுமதி செய்யப்படும் திரவமாக்கப்பட்ட இயற்கை எரிவாயுவில் (LNG) 20 விழுக்காடு இந்த நீரிணை வழியாகவே கடத்தப்படுகிறது. குறிப்பாக கத்தார் நாட்டின் எரிவாயு ஏற்றுமதி இதனால் கடுமையாகப் பாதிக்கப்பட்டுள்ளது. ஈரானின் இந்த அதிரடி அறிவிப்பு வெளியான சில மணி நேரங்களிலேயே சர்வதேச சந்தையில் பிரெண்ட் கச்சா எண்ணெய் விலை 2.47% உயர்ந்து பேரல் 95.40 டாலராகவும், அமெரிக்க டபிள்யூடிஐ (WTI) கச்சா எண்ணெய் விலை 2.89% உயர்ந்து 92.63 டாலராகவும் எகிறியுள்ளது.
பொருளாதாரத் தாக்கம்
பணவீக்கம் மற்றும் இந்திய பொருளாதாரத் தாக்கம்
கச்சா எண்ணெய் விலை தொடர்ந்து அதிகரித்தால், அது உலக நாடுகளில் மீண்டும் கடுமையான பணவீக்கத்தை (Inflation) ஏற்படுத்தும் என ஐநா வர்த்தக அமைப்பு (UNCTAD) எச்சரித்துள்ளது. எரிபொருள் விலை உயர்வால் போக்குவரத்து மற்றும் உற்பத்திச் செலவுகள் அதிகரித்து, உணவுப் பொருட்களின் விலையும் உயரும் அபாயம் உள்ளது. கச்சா எண்ணெய் தேவையின் பெரும்பகுதியை இறக்குமதி மூலம் பூர்த்தி செய்யும் இந்தியா போன்ற வளரும் நாடுகளின் பொருளாதார வளர்ச்சி மற்றும் வேலைவாய்ப்புகளில் இது நீண்டகாலப் பாதிப்புகளை ஏற்படுத்தக்கூடும் என்பதால் உலக நாடுகள் கவலையடைந்துள்ளன.