மிஸ்டர் பீஸ்ட் சவாலில் வென்ற ஹர்திக் பாண்டியா: ரூ.95 லட்சம் பரிசுத்தொகையை தானமாக வழங்கினார்
செய்தி முன்னோட்டம்
கிரிக்கெட் மட்டையை ஓரம் கட்டிவிட்டு பேஸ்பால் பேட்டை கையில் எடுத்த இந்திய அணியின் முன்னணி நட்சத்திர ஆல்ரவுண்டர் ஹர்திக் பாண்டியா, சர்வதேச அளவில் புகழ்பெற்ற யூடியூப் நட்சத்திரமான மிஸ்டர் பீஸ்ட் நடத்திய பேஸ்பால் சவாலில் வெற்றி பெற்று ஒரு லட்சம் அமெரிக்க டாலர்களை (இந்திய மதிப்பில் சுமார் ரூ.94.9 லட்சம்) அள்ளியுள்ளார். மேலும், அந்த பிரம்மாண்ட பரிசுத் தொகை முழுவதையும் தனக்கென வைத்துக்கொள்ளாமல், ஆதரவற்ற நாய்கள் மற்றும் விளிம்புநிலை ஏழைக் குழந்தைகளின் நலனுக்காக இயங்கும் தொண்டு நிறுவனங்களுக்கு உடனடியாக நன்கொடையாக வழங்கிப் பலரது பாராட்டுகளையும் பெற்றுள்ளார்.
மிஸ்டர் பீஸ்ட் சேலஞ்
பாண்டியாவின் சாகசம்
கோடிக்கணக்கான பார்வையாளர்களை கொண்ட மிஸ்டர் பீஸ்ட், உலகின் முன்னணி விளையாட்டு நட்சத்திரங்களை ஒருங்கிணைத்து பிரத்யேக சவால் வீடியோ ஒன்றை உருவாக்கினார்.
இதில் இந்திய கிரிக்கெட் அணியின் சார்பாகக் கலந்துகொண்ட 33 வயதான ஹர்திக் பாண்டியா, பேஸ்பால் பந்துகளை மைதானத்திற்கு வெளியே விளாசும் ஹோம் ரன் சவாலில் மிஸ்டர் பீஸ்ட்டை நேரடியாக எதிர்த்து விளையாடினார்.
தனது அசாத்திய பேட்டிங் திறனால் அதிக ஹோம் ரன்களை அடித்து எதிரணியை வீழ்த்திய பாண்டியா, ஒரு லட்சம் டாலர் பரிசுத் தொகையைத் தட்டிச் சென்றார்.
அந்தத் தொகையை உடனடியாகச் சமூக நலப் பணிகளுக்காக வழங்கியதன் மூலம், விளையாட்டைத் தாண்டி தனது மனிதநேயப் பண்பையும் அவர் வெளிப்படுத்தியுள்ளார்.
அடுத்தகட்ட பயணம்
சர்வதேச கிரிக்கெட் இடைவெளி
கடந்த 2026 டி20 உலகக்கோப்பை இறுதிப்போட்டிக்குப் பிறகு இந்திய அணிக்காக விளையாடாத ஹர்திக் பாண்டியா, ஐபிஎல் தொடரில் மும்பை இந்தியன்ஸ் அணிக்காக மே 24 அன்று விளையாடியதே அவரது கடைசிப் போட்டி ஆட்டமாக அமைந்தது.
அதைத் தொடர்ந்து ஆப்கானிஸ்தான் தொடர், அயர்லாந்து மற்றும் இங்கிலாந்து சுற்றுப்பயணம், வெஸ்ட் இண்டீஸ் தொடர் எனத் தொடர்ச்சியாக விலகியிருந்த அவர், தற்போது நடைபெற்று வரும் நியூசிலாந்து சுற்றுப்பயணத்திலும் இடம்பெறவில்லை.
கிரிக்கெட் களத்திலிருந்து தற்காலிகமாக விலகியிருக்கும் சூழலில், மாற்று விளையாட்டிலும் தனது ஆதிக்கத்தை நிலைநாட்டி, சமூகப் பணிகளுக்குத் தோள் கொடுத்து ரசிகர்களின் கவனத்தை ஈர்த்துள்ளார்.