துபாயிலிருந்து டெல் அவீவ் சென்ற பிளைதுபாய் விமானத்தில் அவசரநிலை பிரகடனம்: வான்வழியில் பரபரப்பு
செய்தி முன்னோட்டம்
துபாயிலிருந்து இஸ்ரேலின் டெல் அவீவ் நகருக்குப் பறந்து கொண்டிருந்த பிளைதுபாய் நிறுவனத்தின் போயிங் 737 மேக்ஸ் விமானம், நடுவானில் திடீரென அவசரநிலையை பிரகடனப்படுத்தி, சவுதி அரேபிய வான்வெளியில் பாதையை மாற்றித் திரும்பிய சம்பவம் பெரும் பரபரப்பை ஏற்படுத்தியுள்ளது. துபாயிலிருந்து புறப்பட்ட பயணிகள் விமானம் யோர்டான் எல்லை மற்றும் வடக்கு சவுதி அரேபிய வான்வெளியைக் கடந்தபோது, அதன் பறக்கும் உயரம் மற்றும் வேகத்தில் திடீர் மாற்றங்கள் ஏற்பட்டன. இதனைத் தொடர்ந்து, சர்வதேச அளவில் பொதுவான அவசரநிலையைக் குறிக்கும் 'Squawk 7700' என்ற சிக்னல் குறியீட்டை விமானம் அனுப்பியது. பின்னர் விமானம் 15,000 அடி என்ற வழக்கத்திற்கு மாறான குறைந்த உயரத்தில் பறந்தவாறு பாதையை மாற்றத் தொடங்கியது.
அச்சுறுத்தல்
கடத்தல் அச்சுறுத்தல் சிக்னல்?
விமான கண்காணிப்புத் தரவுகளின்படி, விமானம் நடுவானில் பறக்கும் போது விமானக் கடத்தலை குறிக்கும் 'Squawk 7500' என்ற அவசரக் குறியீட்டையும் அனுப்பியதாக முதற்கட்ட தகவல்கள் தெரிவிக்கின்றன.
150-க்கும் மேற்பட்ட இஸ்ரேலிய பயணிகள் பயணித்த விமானத்தில் பாதுகாப்பு அச்சுறுத்தல் ஏற்பட்டிருக்கலாம் என்ற சந்தேகத்தின் பேரில், இஸ்ரேலிய விமானப்படை உடனடியாக தனது போர் விமானங்களை கண்காணிப்பு பணிக்காக அனுப்பி வைத்தது.
இருப்பினும், இந்த சம்பவம் தொழில்நுட்பக் கோளாறால் ஏற்பட்டதா அல்லது பாதுகாப்பு அச்சுறுத்தலா என்பது குறித்து அதிகாரப்பூர்வமான உறுதியான தகவல்கள் இன்னும் வெளிவரவில்லை.
மத்திய கிழக்கு வான்வெளியில் ஏற்கனவே கட்டுப்பாடுகளும் எச்சரிக்கைகளும் நீடித்து வரும் சூழலில், இச்சம்பவம் அப்பகுதியில் பெரும் பதற்றத்தை உருவாக்கியுள்ளது.