FIFA 2026: 39 வயதில் ஹாட்ரிக் சாதனை; மெஸ்ஸியின் உபிட்னெஸ் சீக்ரெட் இதுதான்
செய்தி முன்னோட்டம்
முப்பதுகளின் இறுதியை எட்டும் கால்பந்து வீரர்கள் பலரும் ஓய்வு பெற்று பயிற்சியாளர்களாக மாறிவிடும் சூழலில், தனது 39ஆவது வயதிலும் லியோனல் மெஸ்ஸி புதிய வரலாற்றைப் படைத்து வருகிறார். தற்போதைய உலகக்கோப்பை கால்பந்து போட்டியின் முதல் ஆட்டத்தில், அல்ஜீரியாவுக்கு எதிரான போட்டியில் மெஸ்ஸி அடித்த ஹாட்ரிக் கோல்களின் உதவியுடன் அர்ஜென்டினா 3-0 என்ற கணக்கில் வெற்றி பெற்றுள்ளது. இது அர்ஜென்டினா அணிக்காக அவர் விளையாடும் 200ஆவது சர்வதேசப் போட்டியாகும். அத்துடன் உலகக்கோப்பை வரலாற்றில் ஹாட்ரிக் கோல் அடித்த மிக வயதான வீரர் என்ற சாதனையையும், ஜெர்மனி ஜாம்பவான் மிரோஸ்லாவ் குளோசேயின் உலகக்கோப்பை வரலாற்றுச் சாதனையைச் சமன் செய்தும் அவர் புதிய மைல்கல்லை எட்டியுள்ளார்.
உடல் வலிமை
வேகத்தை விட வலிமைக்கே முன்னுரிமை
இளமைக்காலத்தில் அசுர வேகத்துடன் மைதானத்தில் வலம் வந்த மெஸ்ஸி, தற்பொழுது வயதுக்கேற்ப மிகவும் புத்திசாலித்தனமான ஆட்டக்காரராக மாறியுள்ளார். வேகத்தை மட்டுமே நம்பியிருக்காமல் தற்பொழுது தசை வலிமை, உடலின் சமநிலை, நெகிழ்வுத்தன்மை மற்றும் இயக்கத் திறன் ஆகியவற்றில் கவனம் செலுத்துகிறார். இந்த செயல்பாட்டுப் பயிற்சிகள் (Functional exercises) அவரது வயிற்றுப்பகுதித் தசைகளின் உறுதிக்கும், கீழ் உடல் வலிமைக்கும் உதவுகின்றன. இது மூட்டுகளைப் பாதுகாத்து, காயங்கள் ஏற்படும் அபாயத்தைக் குறைத்து, அவரைத் தொடர்ந்து சுறுசுறுப்புடன் செயல்பட வைக்கிறது.
உடற்பயிற்சி
உடலை மீட்டெடுக்கும் தினசரி வழக்கம்
விளையாட்டு அறிவியல் நிபுணர்களின் கூற்றுப்படி, கடுமையான போட்டிக்குப் பின் உடலை மீண்டும் பழைய நிலைக்குக் கொண்டு வரும் 'மீட்டெடுப்பு' முறையில்தான் வீரர்கள் உண்மையிலேயே மேம்படுகிறார்கள். மெஸ்ஸி போதிய உறக்கம், உடலை நீட்டி முடக்கும் பயிற்சிகள் (Stretching), பிசியோதெரபி மற்றும் போட்டிக்குப் பிந்தைய மறுவாழ்வுப் பயிற்சிகளுக்குத் தினசரி முன்னுரிமை அளிக்கிறார். தசைத் திசுக்களைப் பழுதுபார்க்கவும், வீக்கங்களைக் குறைக்கவும், மசாஜ் தெரபி, குளிர்ந்த நீர் சிகிச்சை மற்றும் சுருக்க சிகிச்சை (Compression therapy) போன்ற நவீன முறைகளை அவர் பயன்படுத்துகிறார்.
ஊட்டச்சத்து
ஆரோக்கியமான மத்திய தரைக்கடல் உணவுமுறை
மெஸ்ஸியின் நீண்ட காலக் கால்பந்து பயணத்திற்கு அவரது முறையான ஊட்டச்சத்தும் முக்கியப் தூணாக உள்ளது. அவர் உலகப் புகழ்பெற்ற 'மத்திய தரைக்கடல் உணவுமுறையை' (Mediterranean diet) தீவிரமாகப் பின்பற்றுகிறார். பின்வரும் உணவுகள் முதன்மையாக இடம்பெறுகின்றன கொழுப்பு குறைந்த புரதங்கள் புதிய பழங்கள் மற்றும் காய்கறிகள் முழு தானியங்கள் மற்றும் ஆரோக்கியமான கொழுப்புகள் போதிய அளவு நீர்ச்சத்து இந்த ஊட்டச்சத்துக்கள் நிறைந்த உணவுகள் அவரது ஆற்றலைத் தக்கவைக்கவும், தசை சோர்வை நீக்கவும் உதவுகின்றன. பதப்படுத்தப்பட்ட உணவுகள் மற்றும் சர்க்கரையை அவர் முற்றிலுமாகத் தவிர்க்கிறார்.
மனநலமும் விவேகமான பயிற்சியும்:
ஆரோக்கியமான வாழ்விற்கான பாடங்கள்:
மெஸ்ஸியின் தொடர்ச்சியான வெற்றிக்கு அதிகப்படியான பயிற்சிகளைத் தவிர்த்து, தேவையான அளவு மட்டும் திட்டமிட்டுப் பயிற்சி செய்யும் முறையே காரணமாகும். விளையாட்டு விஞ்ஞானம் மூலம் அவரது உடலின் பணிச்சுமை கண்காணிக்கப்பட்டு, தீவிரப் பயிற்சி நாட்களும், இலகுவான ஓய்வு நாட்களும் சமமாகப் பிரிக்கப்படுகின்றன. இவற்றுடன், அழுத்தமான சூழலிலும் அமைதியாக முடிவெடுத்தல் மற்றும் மனக் கட்டுப்பாடு போன்ற மனநலத் தகுதிகளும் மெஸ்ஸியின் சாதனைகளுக்கு முக்கியக் காரணமாக அமைகின்றன. தினசரி உடற்பயிற்சி மற்றும் தசை வலிமையை மேம்படுத்துதல். தரமான உறக்கம் மற்றும் உடலுக்குப் போதிய ஓய்வு அளித்தல். ஊட்டச்சத்துக்கள் நிறைந்த சமச்சீர் உணவை உட்கொள்ளுதல். உடலின் தேவையை உணர்ந்து, அதிகப்படியான சோர்வைத் தவிர்த்தல். உடற்தகுதியுடன் மன நலத்தையும் சீராகப் பராமரித்தல்.