வக்ஃப் வாரிய சட்டத் திருத்தம் மீதான வழக்கில் இடைக்கால உத்தரவை செப்.15இல் வெளியிடுவதாக உச்ச நீதிமன்றம் அறிவிப்பு
செய்தி முன்னோட்டம்
வக்ஃப் வாரிய திருத்தச் சட்டத்தின் அரசியலமைப்புச் சட்டம் செல்லுபடியாகும் தன்மை குறித்து தாக்கல் செய்யப்பட்ட மனுக்கள் மீதான இடைக்கால உத்தரவை உச்ச நீதிமன்றம் திங்கட்கிழமை (செப்டம்பர் 15) அறிவிக்க உள்ளது. முன்னதாக, தலைமை நீதிபதி பி.ஆர்.கவாய் தலைமையிலான அமர்வு, மே 22 அன்று இந்த உத்தரவை ஒத்தி வைத்தது. இந்த இடைக்கால உத்தரவு, விசாரணையின்போது உச்ச நீதிமன்றம் எழுப்பிய மூன்று முக்கிய சட்ட மற்றும் நடைமுறை சார்ந்த கேள்விகளுக்குத் தீர்வு காணும் என்று எதிர்பார்க்கப்படுகிறது. நீதிமன்றத்தின் முன் உள்ள முக்கியக் கேள்விகளில் ஒன்று, ஏற்கனவே நீதிமன்றத்தால் வக்பு என அறிவிக்கப்பட்ட சொத்து, வழக்கு நிலுவையில் இருக்கும்போது, அந்தத் தகுதியிலிருந்து நீக்கப்படுமா என்பதுதான்.
அதிகாரம்
சட்டத் திருத்தத்தில் நீதிமன்றத்தின் அதிகாரம்
இந்தச் சட்டத் திருத்தத்தின்படி, ஒரு மாவட்ட ஆட்சியர் ஒரு சொத்து வக்ஃப் சொத்தா அல்லது அரசு நிலமா என ஆராய்ந்து வரும்போது, அது வக்பு நிலமாக கருதப்படாது. இந்த விதி வழக்கு நிலுவையில் இருக்கும் வரை நீடிக்குமா என்பதையும் நீதிமன்றம் முடிவு செய்யும். இடைக்கால உத்தரவின் மூன்றாவது அம்சம், வக்ஃப் வாரியங்கள் மற்றும் மத்திய வக்ஃப் கவுன்சிலின் கலவை குறித்துப் பேசும் என்று எதிர்பார்க்கப்படுகிறது. ஓய்வு பெற்ற நீதிபதிகள் தவிர, இந்த அமைப்புகளில் முஸ்லீம்களை மட்டுமே நியமிக்கச் சட்டம் அனுமதிக்கிறதா, மேலும், இதுபோன்ற கட்டுப்பாடுகள் அரசியலமைப்பு உரிமைகளின் பின்னணியில் சட்டப்பூர்வமாக நிலைநிறுத்தக்கூடியதா என்றும் நீதிமன்றம் கேள்வி எழுப்பியுள்ளது. இந்த இடைக்கால உத்தரவின் முடிவு நாடு முழுவதும் எதிர்பார்ப்பை ஏற்படுத்தி உள்ளது.