வங்கக்கடலில் இன்று காற்றழுத்த தாழ்வு உருவாக வாய்ப்பு: வானிலை மையம் எச்சரிக்கை
செய்தி முன்னோட்டம்
வங்கக்கடலில் இன்று புதிய காற்றழுத்த தாழ்வு பகுதி உருவாகும் வாய்ப்பு இருப்பதாக இந்திய வானிலை ஆய்வு மையம் அறிவித்துள்ளது. வானிலை மையம் வெளியிட்ட அறிக்கையில் கூறியதாவது: நேற்று காலை வரை கடந்த 24 மணி நேரத்தில், சென்னை மணலியில் 6 செ.மீ. அதிகபட்ச மழை பதிவாகியுள்ளது. பின்னதாக, திருவள்ளூர் மாவட்டம் செங்குன்றத்தில் 4 செ.மீ. மற்றும் புழல், மணலி புதுநகர், நீலகிரி மாவட்டம் அழகரை எஸ்டேட் உள்ளிட்ட பகுதிகளில் தலா 3 செ.மீ. மழை பதிவாகியுள்ளது. மத்திய வங்கக்கடல் பகுதியில் வளிமண்டல மேலடுக்கு சுழற்சி ஒன்று நிலவுகிறது. இதன் தாக்கமாக மத்திய மேற்கு மற்றும் வட மேற்கு வங்கக்கடல் பகுதிகளில் இன்று காற்றழுத்த தாழ்வு உருவாகக்கூடும் என கணிக்கப்படுகிறது.
வானிலை அறிக்கை
சென்னையில் மித மழைக்கு வாய்ப்பு
தமிழகம் மற்றும் புதுச்சேரியில், குறிப்பாக வடக்கு, தென் மாவட்டங்களில் சில இடங்களில் இன்று இடியுடன் கூடிய மிதமான மழை பெய்யக்கூடும். ஆகஸ்ட் 18 வரை இந்த மழை தொடரும் என எதிர்பார்க்கப்படுகிறது. நீலகிரி, திருவள்ளூர், ராணிப்பேட்டை ஆகிய மாவட்டங்களில் இன்று கனமழை ஏற்படக்கூடிய சாத்தியம் உள்ளது. சென்னை மற்றும் அதன் புறநகர் பகுதிகளில் வானம் ஓரளவு மேகமூட்டமாக காணப்படும். சில இடங்களில் இடியுடன் லேசான மழை அல்லது மிதமான மழை பெய்யக்கூடும். இதற்கிடையில், தமிழகத்தின் தெற்குப்பகுதிகளில் கடலோரப் பகுதிகள், மன்னார் வளைகுடா, குமரிக்கடல் பகுதிகளில் இன்றும், நாளையும் மணிக்கு 40 முதல் 50 கி.மீ. வேகத்தில், இடைக்கிடையே 60 கி.மீ. வேகத்தில் சூறாவளி காற்று வீச வாய்ப்பு உள்ளது.