சர்ச்சைகளுக்கு மத்தியில் நடைபெற்ற கொல்கத்தா மருத்துவமனை சீரமைப்பு பணிகள்
செய்தி முன்னோட்டம்
கொல்கத்தா மருத்துவமனையில் பயிற்சி மருத்துவர் ஒருவர் பலாத்காரம் செய்து கொலை செய்யப்பட்ட வழக்கில், பாதிக்கப்பட்டவரின் உடல் மீட்கப்பட்ட ஆர்.ஜி.கார் மருத்துவக் கல்லூரி மற்றும் மருத்துவமனை கருத்தரங்கு அறைக்கு அருகில் உள்ள அறையில் சீரமைப்புப் பணிகள் தொடர்பாக அரசியல் ரீதியான சர்ச்சை வெடித்துள்ளது.
பாரதிய ஜனதா கட்சியின் தகவல் தொழில்நுட்ப பிரிவு தலைவர் அமித் மால்வியா, குற்றம் நடந்த மார்பு மருத்துவ பிரிவில் சுவர்கள் இடிக்கப்பட்டது என்று கூறினார்.
இது மேற்கு வங்க முதல்வர் மம்தா பானர்ஜியும், கொல்கத்தா காவல்துறையும் செய்யும் அக்கறையின்மை மற்றும் மூடிமறைக்கும் முயற்சி என்று அவர் குற்றம் சாட்டினார்.
குற்றச்சாட்டுகள்
இடதுசாரிக் குழுக்கள் ஆதாரங்களை சிதைப்பதாக குற்றம் சாட்டுகின்றன
இந்திய ஜனநாயக வாலிபர் கூட்டமைப்பு (DYFI) மற்றும் CPI(M) உடன் இணைந்த இந்திய மாணவர் கூட்டமைப்பு (SFI) ஆகிய இரண்டும் மருத்துவமனையின் சீரமைப்புப் பணிகளுக்கு எதிர்ப்பு தெரிவித்தன.
இதற்கிடையே இடதுசாரிகள் இணைந்த டாக்டர்கள் கூட்டு மன்றத்தின் உறுப்பினரான டாக்டர் சுபர்ணா கோஸ்வாமி, பயிற்சி மருத்துவரின் பலாத்காரத்தில் பல நபர்கள் ஈடுபட்டிருக்கலாம் என்று பிரேத பரிசோதனை அறிக்கை பரிந்துரைத்தது என தெரிவித்தார்.
மறுசீரமைப்பு பணிகள் தொடங்குவதற்கு சில நாட்களுக்கு முன்பு, பாதிக்கப்பட்டவரின் உடல் கருத்தரங்கு அறையில் கண்டெடுக்கப்பட்டது.
புதுப்பித்தல்
மருத்துவமனை அதிகாரிகளின் நடவடிக்கைகள் கேள்விகளை எழுப்புகின்றன
மாணவர்களின் கோரிக்கையை ஏற்று ஓய்வறை கட்டுவதற்காக ஒரு அறையையும், அருகில் உள்ள பெண்கள் கழிப்பறையையும் இடித்து அகற்ற மருத்துவமனை அதிகாரிகள் உத்தரவிட்டதாக இந்தியன் எக்ஸ்பிரஸ் செய்தி வெளியிட்டுள்ளது.
இந்த பகுதிகள் மருத்துவரின் உடல் கண்டெடுக்கப்பட்ட இடத்தில் இருந்து சில அடி தூரத்தில் இருந்தன.
இந்த நடவடிக்கை அதிகாரிகளின் நோக்கங்கள் குறித்து கேள்விகளை எழுப்பியுள்ளது, பலர் ஆதாரங்களை சிதைக்கும் முயற்சி என சந்தேகிக்கின்றனர்.
கைது
குடிமை தன்னார்வ தொண்டர் கைது; வழக்கை சிபிஐ கைப்பற்றியது
இந்த சம்பவம் தொடர்பாக கொல்கத்தா காவல்துறை குடிமைத் தன்னார்வ தொண்டரான சஞ்சோய் ராய் என்பவரை கைது செய்துள்ளது.
இந்த வழக்கை கையாள்வதில் அதிருப்தி தெரிவித்த கொல்கத்தா உயர்நீதிமன்றம், இந்த வழக்கை சிபிஐ விசாரணைக்கு உத்தரவிட்டது, அனைத்து ஆவணங்களையும் உடனடியாக ஒப்படைக்க கொல்கத்தா காவல்துறைக்கு உத்தரவிட்டது.
ஆர்.ஜி. கர் மருத்துவக் கல்லூரி மற்றும் மருத்துவமனைக்கு அடிக்கடி சென்று வந்த ராய், குற்றம் நடந்த இடத்தில் தனது புளூடூத் ஹெட்ஃபோன்களை விட்டுச் சென்றார்.
இதுவே அவரை குற்றவாளியாக கண்டுக்கொள்ள முக்கிய ஆதாரமாக இருந்தது என விசாரணை அதிகாரிகள் தெரிவித்தனர்.
அதன்பின்னர் எடுக்கப்பட்ட DNA சாட்சியங்களும் இவருடன் ஒத்துபோகவே இவரை குற்றவாளியாக கைது செய்தது காவல்த்துறை.