வீட்டிற்கே வரும் குழாய் வழி எரிவாயு (PNG): விண்ணப்பிப்பது எப்படி? முழு விவரம் உள்ளே
செய்தி முன்னோட்டம்
சர்வதேச அளவில் நிலவும் எரிபொருள் தட்டுப்பாட்டை கருத்தில் கொண்டு, மத்திய அரசு குழாய் வழி இயற்கை எரிவாயு (PNG) விநியோகத்தை வேகப்படுத்தியுள்ளது. சிலிண்டர்களை சார்ந்திருப்பதை குறைத்து, பாதுகாப்பான மற்றும் மலிவான எரிசக்திக்கு மக்களை மாற்றுவதே இதன் நோக்கமாகும். PNG என்பது நேரடியாக நிலத்தடி குழாய்கள் மூலம் உங்கள் சமையலறைக்கே விநியோகிக்கப்படும் இயற்கை எரிவாயு ஆகும். இதில் சிலிண்டர்களை சேமித்து வைக்கவோ அல்லது அடிக்கடி மாற்றவோ வேண்டிய அவசியம் இல்லை. நேற்று மத்திய அரசு வெளியிட்டுள்ள புதிய விதிகளின்படி, பிஎன்ஜி இணைப்பு பெற்றவர்கள் தங்களது பழைய எல்பிஜி சிலிண்டர் இணைப்பைத் தொடர்ந்து வைத்திருக்க முடியாது. அதனை சரண்டர் செய்ய வேண்டும் அல்லது ரத்து செய்ய வேண்டும்.
நன்மைகள்
ஏன் PNG-க்கு மாற வேண்டும்?
எல்பிஜி சிலிண்டருடன் ஒப்பிடும்போது பிஎன்ஜி மிகவும் மலிவானது. டெல்லி, மும்பை போன்ற நகரங்களில் ஒரு சிலிண்டரின் விலை ₹913 வரை உள்ள நிலையில், பிஎன்ஜி மூலம் மாதத்திற்கு பல நூறு ரூபாயைச் சேமிக்க முடியும். சிலிண்டர் தீர்ந்துவிடும் என்ற கவலை இல்லை; 24 மணி நேரமும் தடையின்றி எரிவாயு கிடைக்கும். இது மற்ற எரிபொருட்களை விடக் குறைவான கரியமில வாயுவை வெளியேற்றுவதால் சுற்றுச்சூழலுக்கு உகந்தது.
செயல்முறை
விண்ணப்பிப்பது எப்படி?
IGL, MGL, GAIL போன்ற நிறுவனங்களின் இணையதளம் மூலம் எளிதாக விண்ணப்பிக்கலாம்: 1. உங்கள் பகுதிக்கான எரிவாயு நிறுவன இணையதளத்திற்குச் செல்லவும். 2."New PNG Connection" தேர்வு செய்யவும். 3. உங்கள் பெயர், முகவரி மற்றும் ஆதார் விவரங்களை உள்ளிடவும். 4. தேவையான ஆவணங்களைப் பதிவேற்றி, பதிவுக்கட்டணத்தைச் செலுத்தவும். 5. விண்ணப்பம் அங்கீகரிக்கப்பட்டதும், உங்களுக்கு ஒரு தனித்துவமான BP Number வழங்கப்படும். PNG இணைப்பை பெற தேவையான ஆவணங்கள்: அடையாளச் சான்று: ஆதார், பான் கார்டு அல்லது வாக்காளர் அடையாள அட்டை. முகவரிச் சான்று: மின்சார பில் அல்லது வாடகை ஒப்பந்தம். உரிமைச் சான்று: சொத்து வரி ரசீது அல்லது விற்பனைப் பத்திரம் (வாடகைதாரர்கள் எனில் வீட்டின் உரிமையாளரிடம் NOC பெற வேண்டும்).
கட்டணங்கள்
கட்டண விவரம்
சாதாரண இணைப்பு: ₹6,000 வரை (திரும்பப் பெறத்தக்க வைப்புத்தொகை). ஸ்மார்ட் மீட்டர் இணைப்பு: ₹9,000 வரை நீங்கள் விண்ணப்பித்த பின்னர் வரும் ஒப்புதல் கிடைத்த பிறகு, தரப்படும் BP எண்ணை பத்திரமாக வைத்திருக்க வேண்டும். பின்னர், சேவை வழங்குநர் உங்கள் வீட்டில் ஒரு குழாய், எரிவாயு மீட்டர், வால்வுகள் மற்றும் சீராக்கி ஆகியவற்றை நிறுவுவார். அவை நிறுவப்பட்டவுடன், சமையல் மற்றும் பிற வீட்டுத் தேவைகளுக்காக உங்களுக்குத் தடையற்ற இயற்கை எரிவாயு விநியோகம் கிடைக்கும்.