வாரம் 70 நேரம் வேலை செய்வது குறித்து காங்கிரஸ் தலைவர் மணீஷ் திவாரியின் கருத்து சர்ச்சையாகியுள்ளது
காங்கிரஸ் மூத்த தலைவர் மணீஷ் திவாரி, இன்ஃபோசிஸ் இணை நிறுவனர் நாராயண மூர்த்தி கூறிய 70 மணிநேர வேலை குறித்து பேசியுள்ளார். நாராயணமூர்த்தி, இந்தியாவின் உற்பத்தித்திறனை மேம்படுத்துவதற்காக இளைஞர்கள் வாரத்தில் 70 மணி நேரம் வேலை செய்ய வேண்டும் என்று கூறிய ஆலோசனையை, மணீஷ் திவாரி ஒப்பு கொண்டுள்ளார். எக்ஸ்இல் பதிவிட்டுள்ள மணீஷ் திவாரி, வாரத்திற்கு 70 மணிநேரம் வேலை செய்வது, ஒரு நாள் விடுமுறை எடுப்பது மற்றும் ஆண்டுதோறும் 15 விடுமுறை நாட்கள் என்பது நிலையான நடைமுறையாக இருக்க வேண்டும் என்று பரிந்துரைத்தார். சுவாரஸ்யமாக, வேலையில்லா திண்டாட்டம் தொடர்பாக ஆளும் பாரதிய ஜனதா கட்சி (BJP) தலைமையிலான அரசாங்கத்தை குறிவைத்து,"போதுமான வேலை இருந்தால்", 70 மணிநேரம் உழைக்கலாம் என்றும் அவர் கூறினார்.
நாராயணமூர்த்தி கூறியது என்ன?
கடந்த வாரம், நாராயணமூர்த்தி, இந்தியாவில் இளைஞர்கள் வாரத்திற்கு 70 மணிநேரம் உழைத்து நாட்டின் உற்பத்தியை விரைவுபடுத்த வேண்டும் என்று கூறி, ஒரு விவாதத்தைத் தூண்டினார். முன்னாள் இன்ஃபோசிஸ் சிஎஃப்ஓ மோகன்தாஸ் பாய் தொகுத்து வழங்கிய போட்காஸ்டில் பேசிய அவர், இந்தியாவின் பணி உற்பத்தித்திறன் உலகளவில் மிகக் குறைந்த தரவரிசையில் இருப்பதாகக் குறிப்பிட்டார். சீனா மற்றும் ஜப்பான் போன்ற சிறந்த பொருளாதாரங்களுடன் போட்டியிடும் வகையில் இளைஞர்கள் தங்கள் வேலைகளுக்கு அதிக மணிநேரங்களை அர்ப்பணிக்க வேண்டும் என்று அவர் அழைப்பு விடுத்தார். "நாம் நமது வேலை உற்பத்தித்திறனை அதிகரிக்க வேண்டும்," என்று அவர் கருத்து தெரிவித்தார்
ஞாயிற்றுகிழமைகளிலும் வேலை செய்யும் மணீஷ்
நாராயணமூர்த்தியின் கருத்தை ஆமோதித்து மணீஷ் திவாரி, ஞாயிற்றுக்கிழமைகளில் தாமே வேலை செய்வதாகவும், கடைசியாக அவர் வார இறுதி விடுமுறையை அனுபவித்ததாக நினைவில் இல்லை என்றும் கூறியுள்ளார். இளைய தலைமுறையினருக்கான, கட்டுக்கோப்பான பணி நெறிமுறையின் முக்கியத்துவத்தை மணீஷ் வலியுறுத்தினார். "இந்தியா ஒரு பெரிய சக்தியாக மாற வேண்டும் என்றால் ஒன்று அல்லது இரண்டு தலைமுறைகள் கூட வாரத்திற்கு 70 மணிநேரத்தை தங்கள் பணி நெறிமுறையாக மாற்ற வேண்டும்." என அவர் குறிப்பிட்டுள்ளார். ஏராளமான பொது அதிகாரிகள் மற்றும் தேர்ந்தெடுக்கப்பட்ட எம்.பி.க்கள் தினமும் 12-15 மணிநேரம் தங்கள் பணிக்காக அர்ப்பணிப்பதாகவும் அவர் சுட்டிக்காட்டியுள்ளார்.