மத்திய அரசு ஊழியர்களுக்கு ₹1.8 லட்சம் வரை லேப்டாப்: 4 ஆண்டுகளுக்குப் பிறகு சொந்தமாக வைத்துக் கொள்ளலாம்
செய்தி முன்னோட்டம்
மத்திய அரசின் நிதி அமைச்சகத்தின் செலவினத் துறை அரசு அதிகாரிகளுக்கான மின்னணு சாதனங்கள் கொள்முதல் விதிகளை மாற்றியமைத்துள்ளது. கடந்த 2023 ஜூலை விதிகளில் இருந்த ₹1 லட்சம் மற்றும் ₹1.3 லட்சம் என்ற உச்சவரம்புகள் தற்போது ₹50,000 வரை அதிகரிக்கப்பட்டுள்ளன. இதன்படி வழக்கமான சாதனங்களுக்கு ₹1.5 லட்சம் வரையிலும், 40 சதவீதத்திற்கும் மேல் உள்நாட்டுத் தயாரிப்பு பாகங்களைக் கொண்ட சாதனங்களுக்கு ₹1.8 லட்சம் வரையிலும் செலவிட அனுமதி அளிக்கப்பட்டுள்ளது. இத்தொகையில் அடிப்படை மென்பொருள் செலவுகளும் அடங்கும்.
புதிய சலுகை
4 ஆண்டுகள் பயன்பாட்டிற்குப் பிறகு சாதனத்தைத் தக்கவைக்கும் புதிய சலுகை
புதிய விதிகளின்படி லேப்டாப், டேப்லெட் மற்றும் அல்ட்ராபுக் போன்ற சாதனங்கள் வாங்கிய நாளிலிருந்து 4 ஆண்டுகளுக்கு அரசின் சொத்தாகக் கருதப்படும்.
அந்த 4 ஆண்டுகள் முடிந்த பிறகு, அலுவலகத் தரவுகள் அனைத்தும் பாதுகாப்பாக அழிக்கப்பட்டு, சாதனம் அதிகாரியின் சொந்தப் பயன்பாட்டிற்கு இலவசமாக வழங்கப்படும்.
ஒருவேளை அதிகாரி 4 ஆண்டுகளுக்கு முன்பே பணியிலிருந்து ஓய்வு பெற்றால், ஆண்டுக்கு 25 சதவீத தேய்மான மதிப்பைக் கழித்துவிட்டு மீதமுள்ள தொகையை செலுத்தி சாதனத்தை வாங்கிக் கொள்ளலாம்.
தகுதியுள்ள அதிகாரிகள்
இத்திட்டத்தின் கீழ் பயன்பெறத் தகுதியுள்ள அரசு அதிகாரிகள் யார்?
இந்தச் சலுகை அனைத்து மத்திய அரசு ஊழியர்களுக்கும் பொருந்தாது.
ஏழாவது ஊதியக் குழுவின் கீழ் ஊதிய நிலை 12 மற்றும் அதற்கு மேல் உள்ள அனைத்து அதிகாரிகளும் 100 சதவீதம் தகுதியுடையவர்கள் ஆவர்.
ஊதிய நிலை 8 முதல் 11 வரையிலான அதிகாரிகளில் 50 சதவீதம் பேருக்கு மட்டுமே முதற்கட்டமாக சாதனங்கள் வழங்கப்படும்.
துறை செயலாளரின் சிறப்பு ஒப்புதலுடன் இந்த வரம்பை 75 சதவீதம் வரை உயர்த்திக் கொள்ளவும் புதிய கொள்கையில் வழிவகை செய்யப்பட்டுள்ளது.
கட்டுப்பாடுகள்
புதிய விதிகளில் விதிக்கப்பட்டுள்ள கட்டுப்பாடுகளும் விதிவிலக்குகளும்
முந்தைய 2023 வழிகாட்டுதல்களில் இடம்பெற்றிருந்த செல்போன்கள் வழங்கும் திட்டம் இந்தப் புதிய பட்டியலில் இடம்பெறவில்லை.
மேலும், ஒருமுறை சாதனம் வழங்கப்பட்டால், அது பழுதடைந்து சரிசெய்ய முடியாத நிலைக்கு சென்றால் தவிர 4 ஆண்டுகளுக்குள் புதிய சாதனம் வழங்கப்பட மாட்டாது.
இந்த புதிய கொள்கை மத்திய அரசின் அமைச்சகங்கள் மற்றும் அதன் சார்நிலை அலுவலகங்களுக்கு மட்டுமே பொருந்தும்.
மாநில அரசுகள், பொதுத்துறை நிறுவனங்கள் மற்றும் தற்காலிக ஆலோசகர்கள் இந்த வரம்பிற்குள் வரமாட்டார்கள் எனத் தெளிவுபடுத்தப்பட்டுள்ளது.