படப்பிடிப்புக்கு திரும்பினார் விஜய் ஆண்டனி?- மீண்டும் நடிக்க தொடங்கியதாக தகவல்
நடிகரும் இசையமைப்பாளருமான விஜய் ஆண்டனி தனது மகளின் இறப்பிற்கு பின் மீண்டும் படப்பிடிப்பில் கலந்துகொள்கிறார் என தகவல்கள் வெளியாகி உள்ளது. இந்த மாதம், 19 ஆம் தேதி விஜய் ஆண்டனியின் மகள் தனது வீட்டில் தற்கொலை செய்து கொண்டது பெரும் அதிர்ச்சியை ஏற்படுத்தியது. இதனால் மனம் உடைந்த விஜய் ஆண்டனி, தன்மகள் இறந்துவிட்டாலும் தன்னுடன் பேசிக்கொண்டிருப்பதாகவும், இனி அவளுக்காக நேரம் செலவிட ஆரம்பித்து விட்டதாகவும் ஒரு உருக்கமான அறிக்கை ஒன்றை வெளியிட்டு இருந்தார். மகளை இழந்த மனவேதனையில் இருந்து மீண்டு வரும் விஜய் ஆண்டனி திரைப்படங்களில் மீண்டும் நடிக்க தொடங்கியதாக தகவல் வெளியாகி உள்ளது. புதுமுக இயக்குனர் இயக்கும் திரைப்படத்தில் நடித்து வந்த விஜய் ஆண்டனி, பெங்களூரில் பட குழுவுடன் இணைந்துள்ளதாக கூறப்படுகிறது.
தயாரிப்பாளர்களுக்காக படப்பிடிப்பிற்கு சென்ற விஜய் ஆண்டனி
விஜய் ஆண்டனி கடைசியாக கொலை படத்தில் நடித்திருந்தார். படம் சுமாராக போன நிலையில், அடுத்ததாக CS அமுதன் இயக்கத்தில் ரத்தம் திரைப்படம் வெளியீட்டிற்காக காத்திருக்கிறது. அக்டோபர் முதல் வாரத்தில் படம் வெளியாகும் என அறிவிக்கப்பட்ட நிலையில், இப்படத்தின் ப்ரோமோஷன் வேலைகளும் தொடங்கவில்லை. அதேபோல, புதுமுக இயக்குனர் ஒருவர் இயக்கம் படத்தின் படப்பிடிப்பு தயாராக இருந்த நிலையில், விஜய் ஆண்டனி வாழ்க்கையில் இப்படி ஒரு துயர சம்பவம் நிகழ்ந்தது. எனினும், தயாரிப்பாளர் நஷ்டப்படக்கூடாது என, விஜய் ஆண்டனி படப்பிடிப்பில் கலந்து கொள்ள சென்றுள்ளார் என செய்திகள் தெரிவிக்கின்றன. ஒவ்வொரு முறை, அவரது வாழ்க்கையில் மீளாத்துயரம் நேரும் போதும், அதிலிருந்து மீண்டு வரும் விஜய் ஆண்டனி பலருக்கும் முன்னுதாரணமாக திகழ்கிறார் என்பது மறுப்பதற்கில்லை
