ரேணுகாசாமி கொலை வழக்கு: காவல்துறை பிடியில் சிக்கும் கன்னட திரையுலகின் பிரபல நடிகர்கள் தர்ஷன், சிக்கண்ணா
பரபரப்பான ரேணுகாசாமி கொலை வழக்கை விசாரிக்கும் காவல்துறையினர் குழு பெங்களூருவில் உள்ள தனியார் கிளப்பில் விசாரணை நடத்த உள்ளது. அங்கு பிரபல கன்னட நடிகர் தர்ஷன் தொகுதீபா மற்றும் பிற குற்றவாளிகள், ரேணுகாசமியை கடத்தி வந்தபோது, பார்ட்டியில் ஈடுபட்டதாகக் கூறப்படுகிறது என்று விசாரணை அதிகாரிகள் தெரிவித்தனர். சம்மந்தப்பட்ட இந்த பிரபல பப், இந்த வழக்கில் குற்றம் சாட்டப்பட்டவரும் தர்ஷனின் நண்பருமான வினய் என்பவருக்கு சொந்தமானது. இந்த வழக்கில் மற்றொரு கன்னட நடிகர் சிக்கண்ணாவையும் பெங்களூரு போலீசார் விசாரணைக்கு அழைத்துள்ளனர். ரேணுகாசாமி கொலையில் முக்கிய குற்றவாளியாக தர்ஷன் மற்றும் காதலி என கூறப்படும் பவித்ரா கவுடா உட்பட 19 பேரை போலீசார் இதுவரை கைது செய்துள்ளனர்.
தர்ஷனுடன் கொலையில் சம்மந்தப்பட்டுள்ளாரா சிக்கண்ணா?
கன்னட திரையுலகில் முதன்மையாக நகைச்சுவை வேடங்களில் நடிக்கும் பிரபலமான நடிகர் சிக்கண்ணா, குற்றம் நடந்த ஜூன் 8 இரவு தர்ஷனுடன் பார்ட்டியில் ஈடுபட்டிருந்ததாக கூறப்படுகிறது. தர்ஷன், ரேணுகாசாமி அடைக்கப்பட்டிருந்த ஷெட்டிற்கு சென்று அவரை சித்திரவதை செய்வதற்கு முன்பு தர்ஷனுடன் சிக்கண்ணா இருந்ததாக நம்பப்படுகிறது. தற்போது அந்த பப்பின் ஓனர் வினய்யுடன், நடிகர்கள் தர்ஷன் மற்றும் சிக்கண்ணா ஆகியோர் விசாரணையின் ஒரு பகுதியாக குற்றக் காட்சியை மீண்டும் உருவாக்க தனியார் கிளப்பிற்கு அழைத்துச் செல்லப்படுவார்கள் என்று இந்தியா டுடே செய்தி வெளியிட்டுள்ளது. ரேணுகாசாமியை குடோனில் வைத்து பூட்டிவிட்டு, அடுத்து என்ன செய்வது என்பது குறித்து ஆலோசிப்பதற்காக தர்ஷன் மீண்டும் கிளப்பிற்கு வந்திருக்கலாம் என போலீசார் சந்தேகிக்கின்றனர்.
