'சத்யா' உதயநிதி ஸ்டாலினை நேரில் சந்தித்து வாழ்த்து சொன்ன 'பார்த்தா' சந்தானம்!
நேற்று தமிழகத்தின் துணை முதல்வராக பொறுப்பேற்ற உதயநிதி ஸ்டாலினுக்கு பலரும் தங்கள் வாழ்த்துக்களை தெரிவித்து வருகின்றனர். இந்த நிலையில் அவரை நேற்று நேரில் சந்தித்து வாழ்த்து தெரிவித்துள்ளார் நடிகர் சந்தானம். அந்த புகைப்படத்தை தனது சமூக வலைத்தளத்திலும் சந்தானம் பகிர்ந்து கொண்டார். அதில், "மனமார்ந்த வாழ்த்துகள் டியர் முதலாளி.. இந்தத் தலைமைப் பதவியிலும் இன்னும் நிறைய வெற்றிகளைக் குவிக்க வாழ்த்துகள்" எனக்குறிப்பிட்டுள்ளார். நடிகர் சந்தானம், உதயநிதி ஸ்டாலின் காம்போவில் வெளியான மூன்று படங்களும் அவற்றின் காமெடி காட்சிகளுக்கு பெயர் பெற்றது. குறிப்பாக ஹீரோவாக உதயநிதி ஸ்டாலின் அறிமுகமான 'ஒரு கல் ஒரு கண்ணாடி' என்ற படத்தில் இடம்பெற்றிருந்த காட்சிகள் இன்றளவும் ரசிகர்களிடையே பெரும் வரவேற்பை பெற்றுள்ளது.
Twitter Post
புதிய துணை முதல்வராக பொறுப்பேற்ற உதயநிதிக்கு பிரபலங்கள் வாழ்த்துக்களை தெரிவித்தனர்
உதயநிதி துணை முதலமைச்சராக அறிவிக்கப்பட்டதும் அவரது சகோதரரும், நடிகருமான அருள்நிதி தனது வாழ்த்துக்களை தெரிவித்தார். நேற்று அவர் பதவி ஏற்றுக்கொண்டதும், அவரை தொலைபேசியில் தொடர்பு கொண்டு தனது வாழ்த்துக்களை தெரிவித்தார் சூப்பர்ஸ்டார் ரஜினிகாந்த். அதேபோல, நடிகர் தனுஷ், நடிகர் ஜெயம் ரவி, சிலம்பரசன், சிவகார்த்திகேயன், அருண் விஜய், சதீஷ் ஆகியோரும், 'மாமன்னன்' இயக்குனர் மாரி செல்வராஜ், வெங்கட் பிரபு, பிரதீப் ரங்கநாதன், அருண் ராஜா காமராஜ் ஆகியோரும் வாழ்த்துக்களை தெரிவித்தனர். அதேபோல தயாரிப்பாளர் அர்ச்சனா கல்பாத்தி, காங்கிரஸ் கட்சி தலைவரும் நடிகருமான விஜய் வசந்த், மக்கள் நீதி மையம் கட்சியின் தலைவரும் பிரபல நடிகருமான கமல்ஹாசன் ஆகியோரும் அவருக்கு வாழ்த்துக்களை தெரிவித்தனர்.
