பிப்ரவரியில் இந்தியாவுக்கு வருகை தருகிறார் மைக்ரோசாஃப்ட் CEO; காரணம் என்ன?
செய்தி முன்னோட்டம்
மைக்ரோசாஃப்ட் தலைமை நிர்வாக அதிகாரி சத்யா நாதெல்லா, வரும் பிப்ரவரி 7 மற்றும் 8 ஆம் தேதிகளில் இந்தியாவுக்கு வருகை தருகிறார்.
இந்தியாவில், செயற்கை நுண்ணறிவின் (AI) திறனை வளர்ப்பதே அவரின் வருகையின் நோக்கம் என கூறப்படுகிறது.
இதற்காக அனுப்பப்பட்ட உள் மின்னஞ்சலில், மைக்ரோசாஃப்டின் இந்தியா மற்றும் தெற்காசியத் தலைவர் புனித் சந்தோக், நாதெல்லாவின் வருகை இப்பகுதியில் வாய்ப்புகளை உருவாக்க, AI தொழில்நுட்பத்திற்கான நிறுவனத்தின் அர்ப்பணிப்பைக் குறிக்கிறது என்று தெரிவித்தார்.
"இந்தியாவின் டெக்டேட்" வடிவமைப்பதில் AI வகிக்கும் மாற்றமான பங்கையும், அது இந்தியாவை எவ்வாறு மிகவும் பரபரப்பான தொழில்நுட்ப சந்தையாக மாற்றும் என்பதையும் சந்தோக் எடுத்துரைத்தார்.
நாதெல்லாவின் நிகழ்ச்சி நிரல்
இந்திய AI ஸ்டார்ட் அப்களின் நிறுவனர்களை சந்திக்கிறார் நாதெல்லா
சத்யா நாதெல்லாவின் இந்த பயணத்தின் போது, சர்வம், க்ருத்ரிம் போன்ற இந்திய AI ஸ்டார்ட்-அப்களின் நிறுவனர்களும், பல ஆரம்ப கட்ட AI ஸ்டார்ட்-அப்களின் பின்னால் இருப்பவர்களும் மும்பை மற்றும் பெங்களூருவில் நாதெல்லாவை சந்திக்க தயாராகி வருகின்றனர்.
க்ருதிம் என்பது ஓலா நிறுவனர் பவிஷ் அகர்வாலின் AI முயற்சியாகும். இது சமீபத்தில் யூனிகார்ன் ஆனது.
தனது வருகையின் போது, நாதெல்லா இந்திய AI ஸ்டார்ட்-அப்களுடன் கூட்டாண்மைகளை உருவாக்குவதையும், குறிப்பிட்ட பயன்பாட்டு நிகழ்வுகளுடன் இந்தியாவில் தொழில்நுட்பத்தை ஏற்றுக்கொள்வதையும் எதிர்நோக்குவர் என கூறப்படுகிறது.
கடந்த வாரம், மைக்ரோசாஃப்டின் பங்குச் சந்தை மதிப்பு முதன்முறையாக $3 டிரில்லியன் மைல்கல்லைத் தாண்டியது என்பது குறிப்பிடத்தக்கது.