ஆந்த்ரோபிக் ஐபிஓ: இந்தியர்கள் கிளாட் நிறுவன பங்குகளை வாங்குவது எப்படி? முதலீட்டு விதிகள் & வரி விவரங்கள்
செய்தி முன்னோட்டம்
செயற்கை நுண்ணறிவுத் துறையில் முன்னணியில் உள்ள ஆந்த்ரோபிக் நிறுவனம் தனது பங்குகளை பொதுச் சந்தையில் வெளியிடத் தயாராகியுள்ளது. நவம்பர் 18 ஆம் தேதி ஐபிஓ விலை நிர்ணயிக்கப்பட்டு, நவம்பர் 19 அன்று நாஸ்டாக் பங்குச் சந்தையில் 'ANT' என்ற குறியீட்டுடன் வர்த்தகம் தொடங்குகிறது. இந்திய ரிசர்வ் வங்கியின் LRS திட்டத்தின் கீழ், இந்தியர்கள் ஒரு நிதியாண்டில் $2,50,000 வரை வெளிநாட்டுப் பங்குகளில் முதலீடு செய்யலாம். இதற்கு அந்நியச் செலாவணி மேலாண்மைச் சட்ட (FEMA) விதிகளைப் பின்பற்றுவது கட்டாயமாகும்.
ஐபிஓ ஒதுக்கீடு
ஐபிஓ ஒதுக்கீட்டிற்குப் பதிலாக பட்டியலிடப்பட்ட பிறகு பங்குகளை வாங்குவது எளிது
இந்திய பங்குச் சந்தையைப் போல அமெரிக்க ஐபிஓ சந்தையில் சில்லறை முதலீட்டாளர்களுக்கு என தனி ஒதுக்கீடு முறை கிடையாது.
அங்குள்ள தரகு நிறுவனங்கள் பெரும்பாலும் பெரிய நிறுவன முதலீட்டாளர்களுக்கே பங்குகளை ஒதுக்குவதால், இந்தியர்களுக்கு ஐபிஓ விலையில் பங்குகள் கிடைப்பது கடினமாகும்.
எனவே நவம்பர் 19 ஆம் தேதி பங்குச் சந்தையில் வர்த்தகம் தொடங்கிய பிறகு, அங்கீகரிக்கப்பட்ட சர்வதேச தரகு கணக்கு மற்றும் கேஒய்சி மூலம் சந்தை விலையில் ஆந்த்ரோபிக் பங்குகளை இந்தியர்கள் எளிதாக வாங்கலாம்.
வரி விதிப்பு
வெளிநாட்டு முதலீடுகளுக்கான 20% டிசிஎஸ் மற்றும் மூலதன ஆதாய வரி விதிகள்
வெளிநாட்டுப் பங்குகளில் முதலீடு செய்யும் இந்தியர்கள் வருமான வரி விதிகளைக் கவனத்தில் கொள்ள வேண்டும்.
ஒரு நிதியாண்டில் ₹10 லட்சத்திற்கு மேல் வெளிநாட்டிற்கு பணம் அனுப்பினால், 20 சதவீத டிசிஎஸ் பிடித்தம் செய்யப்படும்.
இதனை வரித் தாக்கலின் போது சரிசெய்து கொள்ளலாம்.
பங்குகளை வாங்கிய 24 மாதங்களுக்குள் விற்றால் தனிநபர் வருமான வரி வரம்பிற்கு ஏற்பவும், 24 மாதங்களுக்கு மேல் வைத்திருந்து விற்றால் 12.5 சதவீத நீண்ட கால மூலதன ஆதாய வரியும் விதிக்கப்படும்.
கவனிக்க வேண்டியவை
ஈவுத்தொகை வரிச் சலுகையும் முதலீட்டிற்கு முன் கவனிக்க வேண்டிய காரணிகளும்
அமெரிக்க நிறுவனங்கள் வழங்கும் ஈவுத்தொகைக்கு அங்கு 25 சதவீத வரி பிடித்தம் செய்யப்பட்டாலும், இந்திய-அமெரிக்க இரட்டை வரித் தவிர்ப்பு ஒப்பந்தத்தின் கீழ் இந்தியாவில் வரிச் சலுகை பெற முடியும்.
இருப்பினும் ஐபிஓ மோகத்தால் உடனடியாக முதலீடு செய்யாமல், ஆந்த்ரோபிக் நிறுவனத்தின் வருவாய் வளர்ச்சி, ஏஐ கட்டமைப்பு செலவுகள் மற்றும் எதிர்கால லாப வாய்ப்புகளை ஆய்வு செய்ய வேண்டும்.
மேலும் நாணய மாற்றுக் கட்டணங்கள் மற்றும் தரகுக் கட்டணங்களைக் கணக்கிட்டு முதலீடு செய்வதே பாதுகாப்பானது.