'இனி நிதியுதவி கிடையாது': இஸ்ரேலுக்கு வழங்கி வந்த $4 பில்லியன் உதவியை நிறுத்தும் அமெரிக்கா
செய்தி முன்னோட்டம்
அமெரிக்காவின் முக்கிய இடைத்தேர்தல் வாக்குப்பதிவு நடைபெற்று வரும் நாளில், இஸ்ரேலுக்கு ஆண்டுதோறும் வழங்கப்பட்டு வந்த 4 பில்லியன் அமெரிக்க டாலர் (சுமார் ₹33,000 கோடி) நிதி உதவிகளை நடப்பு 2026-ஆம் ஆண்டோடு நிறுத்துவதாக அமெரிக்க அதிபர் டொனால்ட் ட்ரம்ப் அறிவித்துள்ளார். இஸ்ரேலிய பிரதமர் பெஞ்சமின் நெதன்யாஹூவுடன் மேற்கொண்ட ஒப்பந்தத்தின் அடிப்படையில் இம்முடிவு எடுக்கப்பட்டதாகத் தெரிவித்துள்ள ட்ரம்ப், நிதி உதவி நிறுத்தப்பட்டாலும் ராணுவ ஆயுதங்கள் விற்பனை மற்றும் அவசர உதவிகள் தொடர்ந்து வழங்கப்படும் என்றும் குறிப்பிட்டுள்ளார்.
கருத்து
"இஸ்ரேலுக்கு இனி நிதி தேவை இல்லை"
Fox News தொலைக்காட்சிக்கு அளித்த பேட்டியில் அதிபர் ட்ரம்ப்,"இஸ்ரேலுக்கு ஆண்டுதோறும் வழங்கி வரும் 4 பில்லியன் டாலர் நிதியுதவியை இந்த ஆண்டுடன் முடிவுக்குக் கொண்டுவர நெதன்யாஹூவும் நானும் சில மாதங்களுக்கு முன்பே ஒப்புக்கொண்டு விட்டோம். 2026 இறுதிக்குப் பிறகு அமெரிக்க நிதி எதுவும் வழங்கப்படாது" என்றார்.
"இஸ்ரேலுக்குத் தேவைப்பட்டால் ஆயுதங்களை விற்பனை செய்வோம். உலகின் அதிநவீன ஆயுதங்களை நாங்கள் தயாரிக்கிறோம்; அவர்கள் எதை வேண்டுமானாலும் வாங்கிக் கொள்ளலாம்" என்றார்.
இடதுசாரி ஜனநாயகக் கட்சியினரின் விமர்சனங்களை முறியடிக்க இம்முடிவு உதவும்.
மிச்சிகன் மாநில ஜனநாயகக் கட்சி செனட்டர் வேட்பாளர் அப்துல் எல்-சயீத் போன்றவர்களின் விமர்சனங்களுக்கு இனி இடம் இருக்காது.
ஒப்பந்தம்
2028 வரை உள்ள ஒப்பந்தமும் சட்டச் சிக்கல்களும்
தற்போது நடைமுறையில் உள்ள அமெரிக்க-இஸ்ரேல் புரிந்துணர்வு ஒப்பந்தத்தின்படி, 2028 செப்டம்பர் வரை ஆண்டுக்கு 3.8 பில்லியன் டாலர் ராணுவ உதவி வழங்கப்பட வேண்டும்.
2026 ஆண்டிற்குள்ளேயே இந்த நிதியை ட்ரம்ப் எவ்வாறு தடுப்பார் என்ற கேள்விக்கு தெளிவான விளக்கங்கள் இன்னும் அளிக்கப்படவில்லை.
அமெரிக்க மக்களிடையே காசா போர் மற்றும் ஈரான் மோதலுக்குப் பிறகு இஸ்ரேலுக்கான நிதி உதவிக்கு எதிர்ப்பு அதிகரித்து வருவதும், கருத்துக்கணிப்புகளில் 66% ஜனநாயகக் கட்சியினர் அமெரிக்காவின் ஆதரவை எதிர்ப்பதும் இமுடிவுக்கு முக்கியக் காரணமாகக் கருதப்படுகிறது.
அரசியல் சர்ச்சை
இஸ்ரேலில் எதிரொலிக்கும் எதிர்ப்பு
ட்ரம்ப்பின் இந்த திடீர் அறிவிப்பு இஸ்ரேலிய அரசியலிலும் பெரும் கொந்தளிப்பை ஏற்படுத்தியுள்ளது.
நெதன்யாஹூவின் அரசியல் எதிரியான காடி ஐசென்காட் X தளத்தில் பதிவிடுகையில், "இரு நாடுகளுக்கிடையேயான இந்த முக்கியப் பாதுகாப்புக் கொள்கை மாற்றத்தைச் செய்திகள் மூலமாக மட்டுமே இஸ்ரேலியப் பாதுகாப்புப் படையினரும் மக்களும் அறிந்துகொள்வது நெதன்யாஹூவின் ஆபத்தான போக்கைக் காட்டுகிறது" எனச் சாடியுள்ளார்.
முன்னதாக, அமெரிக்க நிதி உதவியை படிப்படியாகக் குறைத்து, உதவி பெறும் நாட்டிலிருந்து கூட்டாளி என்ற நிலைக்குச் செல்லவுள்ளதாக நெதன்யாஹூ சுட்டிக்காட்டியிருந்தார்.
அமெரிக்க இடைத்தேர்தல் வாக்குப்பதிவு நாளன்றே ட்ரம்ப் இத்தகைய முக்கிய அறிவிப்பை வெளியிட்டது, காங்கிரஸை கைப்பற்றத் துடிக்கும் ஜனநாயகக் கட்சியினரின் குற்றச்சாட்டுகளை முறியடிப்பதற்கான அரசியல் நகர்வாகவே பார்க்கப்படுகிறது.