அமெரிக்காவின் ஆயுதக் கிடங்கு காலி? ஈரானுடன் போரில் 50% ஏவுகணைகள் காலி என அறிக்கை
செய்தி முன்னோட்டம்
ஈரானுடனான ஏழு வார காலப் போரில் அமெரிக்க ராணுவம் தனது மிக முக்கியமான ஏவுகணைகளின் இருப்பில் பாதியைப் பயன்படுத்தியுள்ளதாக CNN செய்தி வெளியிட்டுள்ளது. இந்த அதிரடித் தகவல் அமெரிக்காவின் பாதுகாப்புத் திறன் குறித்த பெரும் விவாதத்தை உலகரங்கில் கிளப்பியுள்ளதுடன், வரும் ஆண்டுகளில் மற்றொரு பெரிய போர் மூண்டால் அமெரிக்கா அதைச் சமாளிக்குமா என்ற கேள்வியையும் எழுப்பியுள்ளது. தற்போதைய சூழலில், ஈரானுடனான தற்காலிகப் போர்நிறுத்தம் ஒருவேளை முறிந்தால், மீண்டும் தாக்குதல் நடத்துவதற்கு தேவையான வெடிகுண்டுகள் மற்றும் ஏவுகணைகள் அமெரிக்காவிடம் போதிய அளவில் உள்ளன. ஆனால், இதையும் தாண்டி சீனா போன்ற ஒரு நாட்டிடம் போர் மூண்டால், அதைச் சமாளிக்கத் தேவையான ஆயுத பலம் அமெரிக்காவிடம் தற்போது இல்லை என்பதே ஆய்வாளர்களின் கருத்தாக உள்ளது.
அறிக்கை
காலியாகும் ஏவுகணை இருப்புகள்: ஒரு அதிர்ச்சி அறிக்கை
சர்வதேச உத்திகள் மற்றும் ஆய்வுகளுக்கான மையம் (CSIS) வெளியிட்டுள்ள புதிய பகுப்பாய்வின்படி, அமெரிக்கா தனது துல்லியமான தாக்குதல் ஏவுகணைகளில் 45 சதவீதத்தையும், பேட்ரியாட் வான் பாதுகாப்பு ஏவுகணைகளில் 50 சதவீதத்தையும் ஈரானுக்கு எதிரான போரில் செலவிட்டுள்ளது. மேலும், கண்டம் விட்டு கண்டம் பாயும் ஏவுகணைகளை இடைமறிக்கும் 'THAAD' ஏவுகணைகளின் இருப்பில் பாதியும், டோமாஹாக் (Tomahawk) ஏவுகணைகளில் 30 சதவீதமும் காலியாகியுள்ளன. கடற்படை பயன்படுத்தும் SM-3 மற்றும் SM-6 ஏவுகணைகளில் 20 சதவீதம் வரை பயன்படுத்தப்பட்டுள்ளன.
பாதுகாப்பு அபாயம்
பசிபிக் பிராந்தியத்தில் அதிகரிக்கும் பாதுகாப்பு அபாயம்
அமெரிக்கக் கடற்படையின் ஓய்வுபெற்ற கர்னல் மார்க் கான்சியன் இது குறித்து கூறுகையில், "ஏவுகணைகளின் இந்த அதிகப்படியான பயன்பாடு, மேற்கு பசிபிக் பிராந்தியத்தில் (குறிப்பாக சீனாவுக்கு எதிராக) அமெரிக்காவின் பாதுகாப்புத் திறனைப் பலவீனப்படுத்தியுள்ளது" என்று எச்சரித்துள்ளார். தற்போது காலியாகியுள்ள இந்த ஏவுகணை இருப்புகளை மீண்டும் நிரப்புவதற்கு 1 முதல் 4 ஆண்டுகள் வரை ஆகலாம் என்றும், அவற்றை முழுமையாகப் பலப்படுத்த மேலும் பல ஆண்டுகள் தேவைப்படும் என்றும் அவர் குறிப்பிட்டுள்ளார். போருக்கு முந்தைய நிலையை எட்ட அமெரிக்காவிற்கு இன்னும் பல ஆண்டுகள் பிடிக்கும்.