ஈரான் மீதான ராணுவ நடவடிக்கை எத்தனை நாட்கள் நீடிக்கும்? டொனால்ட் டிரம்ப் வெளியிட்ட முக்கிய அறிவிப்பு
செய்தி முன்னோட்டம்
ஈரான் உடனான மோதல் குறித்து பேசிய அமெரிக்க அதிபர் டொனால்ட் டிரம்ப், இந்த ராணுவ நடவடிக்கை ஒரு நீண்ட கால போர் அல்ல என்றும், சுமார் நான்கு வாரங்களுக்குள் இலக்குகள் எட்டப்படும் என்றும் தெரிவித்துள்ளார். இது குறித்து 'டெய்லி மெயில்' இதழுக்கு அவர் அளித்த பேட்டியில், ஈரான் ஒரு பெரிய நாடு என்பதால் அதைச் சீர் செய்ய குறைந்தது நான்கு வாரங்கள் அல்லது அதற்கும் குறைவான காலம் தேவைப்படும் என்று குறிப்பிட்டுள்ளார். அமெரிக்க மற்றும் இஸ்ரேலியப் படைகளின் ஒருங்கிணைந்த தாக்குதலில் ஈரானின் உச்ச தலைவர் அயதுல்லா அலி கமேனி உள்ளிட்ட 48 முக்கிய ராணுவ மற்றும் அரசியல் தலைவர்கள் கொல்லப்பட்டுள்ளதாக டிரம்ப் உறுதிப்படுத்தியுள்ளார்.
அஞ்சலி
அமெரிக்க வீரர்களுக்கு அஞ்சலி
இந்த மோதலில் மூன்று அமெரிக்க வீரர்கள் உயிரிழந்துள்ளனர். இது குறித்து வருத்தம் தெரிவித்த டிரம்ப், "அவர்கள் சிறந்த வீரர்கள், துரதிர்ஷ்டவசமாகப் போரில் இத்தகைய இழப்புகள் தவிர்க்க முடியாதவை" என்று கூறினார். மேலும், அணு ஆயுத பலம் கொண்ட ஈரான் உலக நாகரிகத்திற்கே அச்சுறுத்தல் என்றும், அவர்களின் ஏவுகணை திட்டங்களை முடக்கும் வரை தாக்குதல் தொடரும் என்றும் அவர் 'ட்ரூத் சோஷியல்' தளத்தில் பதிவிட்டுள்ளார்.
பேச்சுவார்த்தை
பேச்சுவார்த்தைக்கு வாய்ப்பு?
இருப்பினும், பேச்சுவார்த்தைக்கான கதவுகள் இன்னும் மூடப்படவில்லை என்று கூறியுள்ள டிரம்ப், ஈரானியர்கள் பேச விரும்புவதாகவும், ஆனால் அவர்கள் கடந்த வாரமே பேசியிருக்க வேண்டும் என்றும் கிண்டலாக குறிப்பிட்டுள்ளார். சவுதி அரேபியா, ஜோர்டான், கத்தார் உள்ளிட்ட அண்டை நாட்டு தலைவர்களுடன் ஆலோசனை நடத்தி வரும் டிரம்ப், விரைவில் அமெரிக்க மக்களிடையே உரையாற்ற உள்ளார்.