ரஷ்யாவின் அதிசக்தி வாய்ந்த அணுசக்தி நீர்மூழ்கிக் கப்பல் Khabarovsk அறிமுகம்
செய்தி முன்னோட்டம்
ரஷ்யாவின் கடற்படை வலிமையை அதிகரிக்கும் விதமாக, சக்தி வாய்ந்த அணுசக்தி நீர்மூழ்கிக் கப்பலான Khabarovsk ஐ அந்நாட்டின் பாதுகாப்பு அமைச்சர் ஆண்ட்ரே பெலூசோவ் அதிகாரப்பூர்வமாக அறிமுகப்படுத்தினார். இந்த நிகழ்வு தேசியத் தொலைக்காட்சியில் ஒளிபரப்பப்பட்டது. இது ஒரு முக்கியமான நிகழ்வு என்று அமைச்சர் பெலூசோவ் கூறினார். இந்த நீர்மூழ்கிக் கப்பல், இந்தியாவின் விமானம் தாங்கிக் கப்பலான ஐஎன்எஸ் விக்ரமாதித்யாவைச் சீரமைத்த புகழ்பெற்ற செவ்மாஷ் கப்பல் கட்டும் தளத்தில் இருந்து அறிமுகப்படுத்தப்பட்டது. ரூபின் வடிவமைப்புப் பணியகம் வடிவமைத்த Khabarovsk நீர்மூழ்கிக் கப்பல், ரஷ்யாவின் கடல் எல்லைகள் மற்றும் நலன்களைப் பாதுகாக்க நவீன நீருக்கடி ஆயுதங்கள் மற்றும் ரோபோ அமைப்புகளுடன் உருவாக்கப்பட்டுள்ளது.
ரஷ்யா
ரஷ்யாவின் பாதுகாப்பு
இது, உலகெங்கிலும் ரஷ்யாவின் பாதுகாப்பை மேம்படுத்துவதில் முக்கியப் பங்காற்றும் என்று அதிகாரிகள் தெரிவித்தனர். இந்த நீர்மூழ்கிக் கப்பல், ரஷ்யாவின் மிகவும் இரகசியமான மற்றும் மேம்பட்ட ஆயுதங்களில் ஒன்றாகக் கருதப்படும் போஸிடோன் அணுசக்தி ஆளில்லா நீர்மூழ்கிக் குண்டுகளை (drones) ஏந்திச் செல்லும் திறன் கொண்டது. இது ஒரு சிறிய அணுசக்தி உலை மூலம் இயங்கும் நீருக்கடி ஆளில்லா குண்டாகும். இந்த ட்ரோன், பெரும்பாலான நீர்மூழ்கிக் கப்பல்கள் அல்லது டார்பிடோக்களை விட வேகமாக, கடலின் ஆழத்தில் நீண்ட தூரம் பயணிக்கக்கூடியது என்று ரஷ்ய ஊடகங்கள் தெரிவிக்கின்றன. ரஷ்யாவின் பாதுகாப்பு கவுன்சில் துணைத்தலைவர் டிமிட்ரி மெட்வெடேவ், போஸிடோனை ஒரு முடிவு நாள் (Doomsday) ஏவுகணை என்று வர்ணித்துள்ளதுடன், கடலோர நாடுகளை அழிக்கக்கூடிய திறன் இதற்கு இருப்பதாகக் கூறப்படுகிறது.