தாக்குதலை நிறுத்தக் கோரிய ஐநாவின் கோரிக்கையை நிராகரித்த இஸ்ரேல்: ஐநா பொதுச் செயலாளரை பதிவி விலகவும் கோரிக்கை
செய்தி முன்னோட்டம்
அக்டோபர் 7ம் தேதி இஸ்ரேல் மீது பாலஸ்தீனத்தைச் சேர்ந்த ஹமாஸ் அமைப்பு தாக்குதல் தொடர்ந்ததையடுத்து, 19வது நாளாக இரு நாடுகளுக்கு இடையேயான போர் நீடித்து வருகிறது.
இந்நிலையில் பாலஸ்தீனத்தைச் சேர்ந்த காசா ஸ்ட்ரிப் மீது தரைவழி படையெடுப்பைத் தொடங்க தாங்கள் ஆயுத்தமாக இருப்பதாகத் தெரிவித்திருக்கிறார் இஸ்ரேலைச் சேர்ந்த லெப்டினன்ட் ஜெனரல் ஹெர்சி ஹாலெவி.
மேலும், எந்த நேரத்தில் தரைவழி படையெடுப்பைத் தொடங்க வேண்டும் என்பது குறித்து உயரதிகாரிகளுடன் பேச்சுவார்த்தை நடத்தப்பட்டு வருவதாகத் தெரிவித்திருக்கிறார் ஹெர்சி ஹாலெவி.
இதற்கிடையில் இஸ்ரேல் தரைவழி படையெடுப்பை தாமதப்படுத்தி வருவதற்கு அமெரிக்கா காரணமா என ஜோ பிடனிடம் கேட்கப்பட்ட கேள்விக்கு, "தங்களுக்கான முடிவுகளை இஸ்ரேலே எடுத்துக் கொள்ளும்" எனப் பதிலளித்திருக்கிறார் அவர்.
இஸ்ரேல்-பாலஸ்தீனம்
ஐநா பொதுச்செயலாளரை பதவி விலகக் கோரிய இஸ்ரேல் தூதுவர்:
உயர் மட்ட அளவில் காஸா மீதான தாக்குதலை நிறுத்தக் கோரிய ஐநாவின் கோரிக்கையை இஸ்ரேல் நிராகரித்திருப்பதோடு, ஐநாவின் பொதுச் செயலாளரான ஆண்டானியோ குட்டுரெஸ் பதவி விலக வேண்டும் எனத் தெரிவித்திருக்கிறார் ஐநாவுக்கான இஸ்ரேல் தூதுவர் கிலாட் எர்டான்.
இஸ்ரேலின் குழந்தைகள் மீதும், பெண்கள் மீதும், முதியவர்கள் மீதும் தாக்குதல் நடைபெற்றுக் கொண்டிருக்கும் நிலையில், இங்கிருக்கும் நிலைமயை புரிந்து கொள்ளாத ஐநா பொதுச் செயலாளர் பதவி விலக வேண்டும் எனத் தெரிவித்திருக்கிறார் அவர்.
இஸ்ரேல் குடிமக்கள் மீதும், யூத இன மக்கள் மீதும் தாக்குதல் நடத்துபவர்கள் மீது அனுதாபம் காட்டுபவர்கள், யாரிடமும் பேச தயாராக இல்லை என ஐநா பொதுச்செயலாளரை தாக்கி எக்ஸ் பக்கத்திலும் கருத்து பதிவிட்டிருக்கிறார் அவர்.