வடக்கு காசாவிற்கு ஐ.நா விஜயம் செய்யலாம்: இஸ்ரேல் அனுமதி
செய்தி முன்னோட்டம்
வடக்கு காசாவில் உள்ள நிலைமையை மதிப்பிடுவதற்கும், குடியிருப்பாளர்களின் தேவைகளை வரைபடமாக்குவதற்கும் ஐ.நா. தூதுக்குழுவை அனுமதித்துள்ளது இஸ்ரேல் என்று Ynet புதிய தளத்தை மேற்கோள் காட்டி டைம்ஸ் ஆஃப் இஸ்ரேல் தெரிவித்துள்ளது.
இதற்கிடையில், பாலஸ்தீனிய அகதிகளுக்கான ஐக்கிய நாடுகளின் நிவாரணம் மற்றும் வேலை முகமைக்கு (UNRWA) நிதியுதவி செய்வதை நிறுத்தும் நாடுகளின் பட்டியலில் ஜப்பான் ஞாயிற்றுக்கிழமை இணைந்துள்ளது .
UNRWAக்கான நிதியுதவியை நிறுத்திய பல நாடுகளில் அமெரிக்கா, இங்கிலாந்து, ஜெர்மனி மற்றும் கனடா ஆகியவை அடங்கும்.
மறுபுறம், காசாவில் ஹமாஸுக்கு எதிரான போரின் இடைநிறுத்தம் மற்றும் மீதமுள்ள பணயக்கைதிகளை விடுவிப்பது தொடர்பாக அமெரிக்கா, கத்தார் மற்றும் எகிப்துடன் பேச்சுவார்த்தை நடத்தப்பட்ட பின்னர், அவற்றில் "குறிப்பிடத்தக்க இடைவெளிகள்" இருப்பதாக இஸ்ரேல் தெரிவித்துள்ளது.
பேச்சுவார்த்தை
போர் இடைநிறுத்தத்திற்காக தொடரவிருக்கும் பேச்சுவார்த்தை
எனினும், இஸ்ரேலிய பிரதமர் பெஞ்சமின் நெதன்யாகுவின் அலுவலகம், போர்நிறுத்தப் பேச்சுவார்த்தைகள் குறித்து வெளியிட்ட அறிக்கையில், "குறிப்பிடத்தக்க இடைவெளிகள்" என்ன என்பதை பற்றி தெளிவாக குறிப்பிடவில்லை.
பேச்சுவார்த்தையில் ஈடுபட்டுள்ள மற்ற தரப்பினரிடமிருந்து வேறு எந்த எதிர்வினையும் அல்லது அறிக்கையும் இது சார்ந்து வெளியிடப்படவில்லை.
எனினும் இஸ்ரேல் தரப்பு இந்த பேச்சுவார்த்தைகளை ஆக்கபூர்வமானது என்றும், அடுத்த வாரத்தில் அவை தொடரும் என்றும் கூறியது.
அமெரிக்க பேச்சுவார்த்தையாளர்கள் இஸ்ரேலிய மற்றும் ஹமாஸ் கோரிக்கைகளை ஒன்றிணைக்கும் தற்காலிக உடன்படிக்கையை உருவாக்கியதாக நியூயார்க் டைம்ஸ் செய்தி வெளியிட்டதை அடுத்து இந்த 'இடைவெளிகள்' செய்தி வெளியாகியுள்ளது.
இந்த ஒப்பந்தம், போரில் இரண்டு மாத இடைநிறுத்தத்தை முன்மொழிகிறது என்று அறிக்கை கூறுகிறது.