மேற்கிந்தியத் தீவுகளுக்கு எதிராக 139 ரன்கள் விளாசி உலக சாதனைகளை தகர்த்த விராட் கோலி: ஒரு பார்வை
செய்தி முன்னோட்டம்
மேற்கிந்தியத் தீவுகளுக்கு எதிராக கிரீன்ஃபீல்ட் சர்வதேச மைதானத்தில் நடைபெற்ற முதல் ஒருநாள் போட்டியில், இந்திய அணியின் நட்சத்திர நாயகன் விராட் கோலி வெறும் 88 பந்துகளில் 10 பவுண்டரிகள் மற்றும் 9 சிக்சர்களுடன் 139 ரன்கள் குவித்து ருத்ர தாண்டவம் ஆடினார். 296 ரன்கள் என்ற இலக்கை இந்தியா 41.4 ஓவர்களிலேயே 8 விக்கெட் வித்தியாசத்தில் எட்டி 1-0 எனத் தொடரில் முன்னிலை பெற உதவிய இந்த அதிரடி ஆட்டத்தின் மூலம், கிரிக்கெட் உலகின் பல அசைக்க முடியாத வரலாற்று சாதனைகளையும் சச்சின் டெண்டுல்கரின் சாதனைக் கோட்டைகளையும் கோலி தகர்த்தெறிந்துள்ளார்.
அதிவிரைவாக 15,000 ரன்கள்
சச்சினின் சாதனையை முறியடித்த கிங் கோலி
இப்போட்டியில் களமிறங்கி 59 ரன்களை எட்டியதன் மூலம், சர்வதேச ஒருநாள் கிரிக்கெட் வரலாற்றில் சச்சின் டெண்டுல்கருக்கு (18,426 ரன்கள்) அடுத்தபடியாக 15,000 ரன்களைக் கடந்த உலகின் 2-வது வீரர் என்ற இமாலயப் பெருமையை விராட் கோலி (15,080 ரன்கள்) பெற்றார்.
மேலும், சச்சின் டெண்டுல்கர் 376 இன்னிங்ஸ்களில் எட்டிய இந்த இமாலய மைல்கல்லை, விராட் கோலி வெறும் 303 இன்னிங்ஸ்களிலேயே (15,950 பந்துகள்) கடந்து உலகிலேயே மிகக் குறைந்த இன்னிங்ஸ்களில் அதிவிரைவாக 15,000 ரன்களை எட்டிய வீரர் என்ற புதிய உலக சாதனையையும் படைத்துள்ளார்.
55-வது ஒருநாள் சதம்
சச்சின் மற்றும் கவாஸ்கர் சாதனைகள் சமன்
வெறும் 74 பந்துகளில் சதமடித்த விராட் கோலி, தனது 55-வது சர்வதேச ஒருநாள் சதத்தைப் பதிவு செய்து புதிய வரலாறு படைத்துள்ளார்.
மேற்கிந்தியத் தீவுகளுக்கு எதிராக ஒருநாள் அரங்கில் 10-வது சதமாகவும், சர்வதேச அளவில் 13-வது சதமாகவும் விளாசி சுனில் கவாஸ்கரின் (13 சதங்கள்) வாழ்நாள் சாதனையை சமன் செய்தார்.
மேலும், லிஸ்ட் ஏ கிரிக்கெட்டில் 60-வது சதம் அடித்து சச்சின் டெண்டுல்கரின் முதலிட சாதனையைப் பகிர்ந்துள்ளார்.
அத்துடன் ஒருநாள் போட்டிகளில் இரண்டு வெவ்வேறு அணிகளுக்கு (இலங்கை, மேற்கிந்தியத் தீவுகள்) எதிராக தலா 10 சதங்கள் அடித்த உலகின் முதல் வீரர் என்ற தனிப்பெரும் சாதனையையும் கோலி படைத்துள்ளார்.
இந்திய மண்ணில் 7,000 ரன்கள் மைல்கல்
ரோஹித் ஷர்மாவின் சிக்சர் சாதனை முறியடிப்பு
சொந்த மண்ணில் 42 சர்வதேச சதங்கள் விளாசிய சச்சினின் சாதனையை ஏற்கனவே சமன் செய்துள்ள விராட் கோலி, இப்போட்டியின் மூலம் சொந்த மண்ணில் அதிக ஒருநாள் ரன்களைக் குவித்த சச்சினின் சாதனையை (6,976 ரன்கள்) முறியடித்தார்.
அத்துடன் சொந்த மண்ணில் ஒருநாள் போட்டிகளில் 7,000 ரன்களைக் கடந்த உலகின் முதல் வீரர் (7,006 ரன்கள்) என்ற புதிய உலக சரித்திரத்தையும் படைத்துள்ளார்.
மேலும், ஒரே இன்னிங்ஸில் 9 சிக்சர்கள் விளாசி, மேற்கிந்தியத் தீவுகளுக்கு எதிராக அதிக சிக்சர்கள் அடித்த ரோஹித் ஷர்மாவின் (8 சிக்சர்கள்) சாதனையைத் தகர்த்தார்.
மேற்கிந்தியத் தீவுகளுக்கு எதிராக 44 ஒருநாள் போட்டிகளில் விளையாடி முகமது அசாருதீனின் சாதனையையும் முறியடித்து முதலிடத்தைப் பிடித்தார்.