டி20 உலகக்கோப்பை 2026: புதிய சாதனைகளுடன் இத்தாலியை வீழ்த்தி ஸ்காட்லாந்து அபார வெற்றி
செய்தி முன்னோட்டம்
2026 ஐசிசி ஆண்கள் டி20 உலகக்கோப்பையின் 7 வது லீக் ஆட்டத்தில், குரூப் சி பிரிவில் இடம்பெற்றுள்ள ஸ்காட்லாந்து மற்றும் இத்தாலி கிரிக்கெட் அணிகள் மோதின. புனேவில் உள்ள மகாராஷ்டிரா கிரிக்கெட் சங்க மைதானத்தில் நடைபெற்ற இந்தப் போட்டியில், டாஸ் வென்ற இத்தாலி அணி முதலில் பந்துவீச்சைத் தேர்வு செய்தது. அனுபவம் வாய்ந்த ஸ்காட்லாந்து அணிக்கு எதிராக கன்னி உலகக்கோப்பைத் தொடரில் விளையாடும் இத்தாலி எவ்வளவு தூரம் ஈடுகொடுக்கும் என்ற எதிர்பார்ப்பு நிலவியது.
சதம்
ஸ்காட்லாந்து பேட்டிங்: மெக்முல்லனின் சாதனை சதம்
முதலில் பேட்டிங் செய்த ஸ்காட்லாந்து அணிக்குத் தொடக்கம் அதிரடியாக அமைந்தது. தொடக்க வீரர் ஜார்ஜ் முன்சி (22) சீக்கிரம் வெளியேறினாலும், மூன்றாவது வீரராகக் களமிறங்கிய பிரண்டன் மெக்முல்லன் ஆட்டத்தின் போக்கையே மாற்றினார். மெக்முல்லன் வெறும் 54 பந்துகளில் 112 ரன்கள் குவித்து சாதனை படைத்தார். இதில் 10 பவுண்டரிகளும் 7 சிக்ஸர்களும் அடங்கும். இவருக்குத் துணையாக கேப்டன் ரிச்சி பெர்ரிங்டன் 45 ரன்கள் எடுத்தார். இறுதியில் ஸ்காட்லாந்து அணி 20 ஓவர்கள் முடிவில் 4 விக்கெட் இழப்பிற்கு 224 ரன்கள் என்ற இமாலய இலக்கை நிர்ணயித்தது. இத்தாலி தரப்பில் தாமஸ் ஜாகோவா 2 விக்கெட்டுகளை வீழ்த்தினார்.
தோல்வி
இத்தாலியின் போராட்டம் மற்றும் தோல்வி
225 ரன்கள் என்ற மலைப்போன்ற இலக்கை நோக்கி விளையாடிய இத்தாலி அணிக்குத் தொடக்கமே அதிர்ச்சிகரமாக இருந்தது. ஸ்காட்லாந்தின் துல்லியமான பந்துவீச்சை எதிர்கொள்ள முடியாமல் இத்தாலி வீரர்கள் அடுத்தடுத்து ஆட்டமிழந்தனர். இத்தாலி கேப்டன் கேரத் பெர்க் மற்றும் ஜோ மன்டி ஆகியோர் தலா 30 ரன்கள் எடுத்துச் சற்றுப் போராடினர். இருப்பினும், ஸ்காட்லாந்தின் வேகப்பந்து வீச்சாளர் கிறிஸ் சோல் (3/18) மற்றும் சுழற்பந்து வீச்சாளர் மார்க் வாட் (2/25) ஆகியோர் இத்தாலியின் விக்கெட்டுகளைத் தொடர்ச்சியாகச் சரித்தனர். இறுதியில் இத்தாலி அணி 20 ஓவர்களில் 9 விக்கெட் இழப்பிற்கு 142 ரன்கள் மட்டுமே எடுத்தது. இதன் மூலம் ஸ்காட்லாந்து அணி 82 ரன்கள் வித்தியாசத்தில் அபார வெற்றி பெற்றது.
சாதனை
போட்டியில் படைக்கப்பட்ட சாதனைகள்
இந்தப் போட்டியின் மூலம் சில முக்கிய சாதனைகளை நிபுணர்கள் சுட்டிக்காட்டுகின்றனர்: முதல் சதம்: 2026 டி20 உலகக்கோப்பைத் தொடரின் முதல் சதத்தைப் பதிவு செய்த வீரர் என்ற பெருமையை பிரண்டன் மெக்முல்லன் பெற்றார். அதிகபட்ச ஸ்கோர்: டி20 உலகக்கோப்பை வரலாற்றில் ஸ்காட்லாந்து அணி பதிவு செய்த அதிகபட்ச ஸ்கோர் (224/4) இதுவாகும். வெற்றி வித்தியாசம்: ரன்கள் அடிப்படையில் ஸ்காட்லாந்து அணி உலகக்கோப்பையில் ஈட்டிய மிகப்பெரிய வெற்றிகளில் இதுவும் ஒன்றாகக் கருதப்படுகிறது.