'கோலியின் டெஸ்ட் கேப்டன்சிக்கு நான் தீவிர ரசிகன்': மனம் திறந்து பாராட்டிய ரோஹித் ஷர்மா
செய்தி முன்னோட்டம்
இந்திய டெஸ்ட் கிரிக்கெட் அணியின் முன்னாள் கேப்டன் விராட் கோலியின் தலைமை பண்புக்கு தான் ஒரு தீவிர ரசிகன் என ரோஹித் ஷர்மா மனம் திறந்து பாராட்டியுள்ளார். 2014- 2022 வரை 68 டெஸ்ட் போட்டிகளுக்குத் தலைமை தாங்கிய கோலி, 40 வெற்றிகளைப் பெற்றுத் தந்து 58.82% வெற்றி விகிதத்துடன் இந்தியாவின் வெற்றிகரமான டெஸ்ட் கேப்டனாகத் திகழ்கிறார். கோலியின் தலைமைப் பொறுப்பு குறித்துப் பேசிய ரோஹித் ஷர்மா, கேப்டனாக அவர் சாதித்த விஷயங்கள் அசாத்தியமானவை என்றும், அணியை கோலி வழிநடத்திய விதமும் அற்புதமானது என குறிப்பிட்டுள்ளார்.
உரையாடல்
பேட்டிங் தவறுகளைத் திருத்திக் கொள்ளும் புரிதல்
பத்து ஆண்டுகளுக்கும் மேலாக இந்திய அணியில் இணைந்து விளையாடி வரும் தங்களுக்குள் எப்போதும் பரஸ்பர மரியாதையும் புரிதலும் இருப்பதாக ரோஹித் தெரிவித்தார்.
கேப்டன்சி விவாதங்களைத் தாண்டி, தங்களின் தனிப்பட்ட பேட்டிங் திறனை எவ்வாறு மேம்படுத்துவது என்பது குறித்தே இருவரும் அதிகம் பேசுவதாக அவர் குறிப்பிட்டார்.
தனது பேட்டிங்கில் ஏதேனும் குறைபாடு தெரிந்தால் கோலி உடனடியாக தன்னிடம் கூறுவார் என்றும், அதேபோல் கோலியின் ஆட்டத்தில் ஏதேனும் மாற்றம் தெரிந்தால் தான் சுட்டிக்காட்டுவதாகவும், இதன் மூலம் ஒருவருக்கொருவர் உதவி செய்து பேட்டிங்கை மெருகேற்றும் உரையாடல் தொடர்ந்து நடைபெறுவதாகவும் ரோஹித் விவரித்தார்.
குடும்ப நேரம்
கோலியின் லண்டன் வாழ்க்கை
கிரிக்கெட் இல்லாத ஓய்வு நேரங்களில் தாங்கள் அடிக்கடி நேரில் சந்திப்பதில்லை என்பது குறித்துப் பேசிய ரோஹித், விராட் கோலியின் இல்லம் தற்போது லண்டனில் இருப்பதால் சந்திப்புகள் குறைந்துள்ளதாகச் சிரித்தபடி கூறினார்.
மேலும், ஒரு மாதத்திற்கு அல்லது ஒன்றரை மாதத்திற்கு ஒருமுறை மட்டுமே ஒருநாள் தொடர்கள் நடப்பதால் இருவருக்கும் இடையேயான தூரம் அதிகரித்துள்ளது என்றார்.
கடந்த காலங்களில் தொடர்ச்சியான வெளிநாட்டுப் பயணங்கள் காரணமாகக் குடும்பத்துடன் நேரத்தைச் செலவிட முடியாத சூழல் இருந்த நிலையில், தற்போது இருவருமே குடும்பத்துடன் வீட்டில் அதிக நேரம் செலவிட்டு வருவது மகிழ்ச்சியளிப்பதாக அவர் தெரிவித்தார்.