'ஒருநாள் உலகக்கோப்பையை புறக்கணிப்போம்' : பாகிஸ்தான் கிரிக்கெட் வாரியத் தலைவர் மிரட்டல்!
செய்தி முன்னோட்டம்
பாகிஸ்தான் கிரிக்கெட் வாரியத் தலைவர் நஜாம் சேத்தி கூறுகையில், ஆசிய கோப்பையை நடத்தும் உரிமையை தங்கள் நாடு இழந்தால், இந்த ஆண்டு இந்தியாவில் நடைபெறவுள்ள உலக கோப்பையை பாகிஸ்தான் புறக்கணிக்கும் என்று தெரிவித்துள்ளார்.
கடந்த பல ஆண்டுகளாக இந்தியா மற்றும் பாகிஸ்தானின் அரசியல் உறவுகள் மோசமடைந்ததன் விளைவாக இருதரப்பு கிரிக்கெட் பாதிக்கப்பட்டுள்ளது.
மேலும் இரு நாடுகளும் இப்போது நடுநிலையான மைதானங்களில் ஐசிசி/ஆசிய கோப்பை போன்ற பலதரப்பு போட்டிகளில் மட்டுமே நேருக்கு நேர் விளையாடுகின்றன.
இந்நிலையில், செப்டம்பரில் நடைபெறும் ஆசியக் கோப்பைக்காக பாகிஸ்தானுக்குச் செல்வதை பிசிசிஐ நிராகரித்துவிட்டது.
பாதுகாப்புக் காரணங்களை மேற்கோள் காட்டி, பாகிஸ்தான் கிரிக்கெட் வாரியம் (பிசிபி) ஐக்கிய அரபு எமிரேட்ஸில் ஹைபிரிட் மாடல் முறையில் இந்தியாவின் போட்டிகளை விளையாட அனுமதிக்க முன்வந்துள்ளது.
pcb chairman najam sethi statement
பாகிஸ்தான் கிரிக்கெட் வாரிய தலைவர் நஜாம் சேத்தி கருத்து
நஜாம் சேத்தி கூறுகையில், "ஹைபிரிட் மாடலுக்கு பிசிசிஐ முறையாக பதிலளிக்கவில்லை என்றாலும் போட்டியை முழுமையாக வேறு இடத்திற்கு மாற்ற முயல்கிறது.
பாகிஸ்தானில் நடத்த முடியாவிட்டால் ஆசிய கோப்பை மற்றும் உலக கோப்பையை நாங்கள் புறக்கணிப்போம். பின்னர் இந்தியா சாம்பியன்ஸ் டிராபியை புறக்கணிக்கும். இது பெரிய குழப்பத்தில் தான் சென்று முடியும்.
ஆசியக் கோப்பையில் ஹைபிரிட் மாடலுக்கு இந்தியா ஒப்புக்கொண்டால், அக்டோபர் மற்றும் நவம்பர் மாதங்களில் நடக்கும் ஒருநாள் உலகக் கோப்பையில் பாகிஸ்தானும் அதையே கோரும்.
பாகிஸ்தானுடன் பாகிஸ்தானிலும், பாகிஸ்தானுக்கு வெளியேயும், இருதரப்பு ரீதியாக விளையாடுவதற்கு இந்தியா ஒப்புக் கொள்வது தான் முன்னோக்கி செல்லும் தீர்வு." என்று தெரிவித்துள்ளார்.