இந்தியாவுக்கு முதல்முறையாக தங்கம்! ஆசிய விளையாட்டு 2026 மகளிர் வில்வித்தையில் வரலாற்று சாதனை

எழுதியவர் Sekar Chinnappan

Oct 02, 2026

10:04 am

செய்தி முன்னோட்டம்

ஜப்பானில் நடைபெற்று வரும் 2026 ஆசிய விளையாட்டுப் போட்டிகளில் வெள்ளிக்கிழமை (அக்டோபர் 2) காலையில் இந்தியாவிற்கு மிகப்பெரிய வரலாற்று சாதனை வெற்றி கிடைத்துள்ளது. மகளிர் ரீகர்வ் வில்வித்தை அணிப் பிரிவில் இந்திய அணி தனது முதல் ஆசிய விளையாட்டுத் தங்கப் பதக்கத்தைக் கைப்பற்றி புதிய வரலாறு படைத்துள்ளது. விறுவிறுப்பாக நடைபெற்ற இறுதிப்போட்டியில் உலகின் பலம் வாய்ந்த தென்கொரிய அணியை 5-3 என்ற புள்ளிகள் கணக்கில் வீழ்த்தி இந்திய மகளிர் அணி இந்த வெற்றியைப் பதிவு செய்துள்ளது.

தென்கொரியா

தென்கொரியாவை வீழ்த்திய வீராங்கனைகள்

இந்திய மகளிர் ரீகர்வ் அணியில் அங்கிதா பகத், கீர்த்தி மற்றும் கும்கும் மோஹோத் ஆகியோர் இடம் பெற்றிருந்தனர்.

எதிர்த்துப் போட்டியிட்ட கொரிய அணியில் உலக சாம்பியன் காங் சே-யங், லீ யுன்ஜி மற்றும் ஓ யேஜின் ஆகியோர் களம் கண்டனர்.

காற்று பலமாக வீசிய சூழலிலும் அபாரமாக செயல்பட்ட இந்திய வீராங்கனைகள், முதல் இரண்டு செட்களை 54-54, 56-56 என சமன் செய்தனர்.

தொடர்ந்து நடைபெற்ற 3-வது செட்டை 55-52 எனக் கைப்பற்றி முன்னிலை பெற்ற இந்திய அணி, 4-வது செட்டை 54-54 என சமன் செய்து தங்கப் பதக்கத்தை உறுதி செய்தது.

சீனா

சீனாவை வீழ்த்திய காலிறுதிப் போட்டி மற்றும் முந்தைய சாதனைகள்

முன்னதாக ஒகாசாகி பூங்காவில் நடைபெற்ற அரையிறுதிப் போட்டியில் சீனா அணியை 5-1 என்ற கணக்கில் வீழ்த்தி இந்திய அணி இறுதிப்போட்டிக்குத் தகுதி பெற்றிருந்தது.

கடந்த மே மாதம் ஷாங்காயில் நடைபெற்ற உலகக் கோப்பைத் தொடரிலும் கொரியாவை வீழ்த்தி இந்திய அணி தங்கம் வென்றிருந்தது குறிப்பிடத்தக்கது.

முன்னணி வீராங்கனை தீபிகா குமாரி தகுதி பெறாத நிலையில், அவருக்குப் பதிலாக அணியில் இடம்பெற்ற இளம் வீராங்கனை கீர்த்தி இறுதிப்போட்டியில் மிகச் சிறப்பாகச் செயல்பட்டு வெற்றிக்கு வித்திட்டார்.

பதக்க எண்ணிக்கை

67 ஆக உயர்ந்த இந்தியாவின் ஒட்டுமொத்தப் பதக்க எண்ணிக்கை

மகளிர் வில்வித்தை பிரிவில் கிடைத்துள்ள இந்த வரலாற்றுச் சிறப்புமிக்க தங்கப் பதக்கத்தின் மூலம் 2026 ஆசிய விளையாட்டுப் போட்டிகளில் இந்தியாவின் பதக்க எண்ணிக்கை 67 ஆக உயர்ந்துள்ளது.

இதில் 11 தங்கப் பதக்கங்கள், 23 வெள்ளிப் பதக்கங்கள் மற்றும் 33 வெண்கலப் பதக்கங்கள் அடங்கும்.

ஆசிய விளையாட்டுப் போட்டி வரலாற்றிலேயே மகளிர் ரீகர்வ் வில்வித்தையில் இந்தியா தங்கம் வெல்வது இதுவே முதல் முறை என்பதால், இந்திய விளையாட்டுத்துறை வட்டாரங்களில் கொண்டாட்டங்கள் களைகட்டியுள்ளன.