செயற்கை நுண்ணறிவால் நான்கு நாள் வேலை வாரம் சாத்தியம்; NVIDIA CEO ஜென்சென் ஹுவாங் கருத்து
செய்தி முன்னோட்டம்
செயற்கை நுண்ணறிவு (ஏஐ) எதிர்காலத்தில் வேலை செய்யும் முறையை மாற்றியமைத்து, நான்கு நாள் வேலை வாரத்திற்கு வழிவகுக்கும் என்று NVIDIA நிறுவனத்தின் தலைமைச் செயல் அதிகாரி ஜென்சென் ஹுவாங் கூறியுள்ளார். ஃபாக்ஸ் பிசினஸ் நெட்வொர்க்கில் பேசிய அவர், ஏஐ'யின் வளர்ச்சி, முந்தைய தொழில்துறைப் புரட்சிகளைப் போலவே சமூகத்தில் பெரிய மாற்றங்களை ஏற்படுத்தும் என்று குறிப்பிட்டார். குறைந்த வேலை நேரம் என்பது வாழ்வின் வேகத்தைக் குறைக்கும் என்று சிலர் கருதலாம். ஆனால், அதற்கு நேர்மாறாக, ஏஐ உற்பத்தித்திறனை அதிகரித்து, நிறுவனங்களும் தலைவர்களும் புதிய திட்டங்களை முன்னெடுப்பதற்கு அதிக நேரத்தை உருவாக்கும் என்று ஹுவாங் வாதிட்டார். அதிகரித்த செயல்திறன் புதிய வாய்ப்புகளையும், லட்சியமான இலக்குகளையும் உருவாக்கும் என்று அவர் கணித்தார்.
உற்பத்தித் திறன்
ஊழியர்களின் உற்பத்தித் திறன் அதிகரிப்பு
ஹுவாங்கின் கருத்துகளுக்கு வலு சேர்க்கும் விதமாக, பல நாடுகளில் நடத்தப்பட்ட ஆய்வுகளின் முடிவுகள் உள்ளன. பிரிட்டன், அமெரிக்கா மற்றும் கனடா போன்ற நாடுகளில் நடத்தப்பட்ட சோதனைகளில், ஊழியர்கள் 33-34 மணி நேரத்தில் அதே அளவிலான வேலையைச் செய்து முடித்துள்ளனர். மேலும், சில நிறுவனங்களில் உற்பத்தித்திறன் 24% வரை அதிகரித்திருப்பது கண்டறியப்பட்டுள்ளது. இந்த ஆய்வுகள், ஊழியர்களின் மன அழுத்தம் பாதியாகக் குறைந்துள்ளதாகவும், பணியாளர்கள் பணி விலகுவது மற்றும் விடுமுறை எடுப்பது கணிசமாகக் குறைந்துள்ளதாகவும் காட்டுகின்றன. நெதர்லாந்தில், 32 மணி நேர வேலை வாரம் ஏற்கெனவே வழக்கத்தில் உள்ளது. ஏஐ சிப்களுக்கு அதிகரித்து வரும் தேவை காரணமாக, NVIDIA நிறுவனம் தனது வரலாற்றில் இல்லாத அளவுக்கு வளர்ச்சி கண்டுள்ளது.