சுந்தர் பிச்சை பயின்ற ஐஐடி கரக்பூரின் ஏஐ ஆராய்ச்சிக்கு ₹46 கோடி நிதியுதவி அறிவித்தது கூகுள்
செய்தி முன்னோட்டம்
தொழில்நுட்ப நிறுவனமான கூகுள், ஐஐடி கரக்பூரின் மேம்பட்ட செயற்கை நுண்ணறிவு (ஏஐ) ஆராய்ச்சி மற்றும் கல்வி வளர்ச்சிக்காக 5 மில்லியன் டாலர் அதாவது சுமார் ₹46 கோடி நிதியுதவி வழங்குவதாக அறிவித்துள்ளது. ஐஐடி கரக்பூரின் 75-வது ஆண்டு விழா கொண்டாட்டங்களின்போது இந்த முக்கிய அறிவிப்பு வெளியிடப்பட்டுள்ளது. ஐஐடி கரக்பூரின் முன்னாள் மாணவரும் கூகுள் தலைமை செயல் அதிகாரியுமான சுந்தர் பிச்சையின் தொலைநோக்குப் பார்வையில் இந்த நிதியுதவித் திட்டம் உருவாக்கப்பட்டுள்ளதாக இயக்குநர் சுமன் சக்ரவர்த்தி தெரிவித்துள்ளார். இந்தியாவின் அடுத்த தலைமுறை அறிவியல் மற்றும் தொழில்நுட்பத் திறமையாளர்களை உருவாக்குவதே இதன் முக்கிய நோக்கமாகும்.
ஆராய்ச்சிகளுக்கு முன்னுரிமை
இந்திய மொழிகள், வேளாண்மை மற்றும் கல்வித் தொழில்நுட்ப ஆராய்ச்சிகளுக்கு முன்னுரிமை
இந்த நிதியுதவியானது மேம்பட்ட ஆராய்ச்சி, கல்வி வாய்ப்புகள் மற்றும் திறன் மேம்பாடு ஆகிய மூன்று முக்கியத் தூண்களின் கீழ் பயன்படுத்தப்பட உள்ளது.
மேம்பட்ட ஆராய்ச்சிப் பிரிவின் கீழ் இந்திய மொழிகள், பொருள் அறிவியல், வேளாண்மை மற்றும் கல்வித் தொழில்நுட்பம் ஆகிய துறைகளில் நிஜ உலக சவால்களுக்குத் தீர்வு காண்பதற்கு முன்னுரிமை அளிக்கப்படும்.
இதன் மூலம் இந்திய சமூகங்களுக்குப் பயனளிக்கும் வகையிலான நவீனத் தொழில்நுட்பத் தீர்வுகளை உருவாக்க முடியும் என கூகுள் தெரிவித்துள்ளது.
தொழில்நுட்பக் கட்டமைப்பு
மாணவர்கள், ஆசிரியர்களுக்கான ஏஐ பயிற்சி மற்றும் வளாகத் தொழில்நுட்பக் கட்டமைப்பு மேம்பாடு
கல்வி வாய்ப்புகள் பிரிவின் கீழ் ஐஐடி கரக்பூர் மாணவர்கள் மற்றும் ஆசிரியர்களுக்கான செயற்கை நுண்ணறிவுப் பயிற்சித் திட்டங்களும் பாடத்திட்ட மேம்பாடும் விரிவுபடுத்தப்பட உள்ளன.
மேலும் வளாகம் முழுவதும் தொழில்நுட்பச் சூழலை மேம்படுத்தும் வகையில் நவீன ஏஐ கட்டமைப்புகள் மற்றும் ஆராய்ச்சிக் கருவிகளை வலுப்படுத்தவும் இந்த நிதி பயன்படுத்தப்படும்.
இது ஆராய்ச்சியாளர்கள் மற்றும் மாணவர்கள் அதிநவீனக் கருவிகளைக் கொண்டு ஆய்வுகளை மேற்கொள்ளப் பெரிதும் உதவும்.
சுந்தர் பிச்சை நெகிழ்ச்சி
என்னை உருவாக்கிய ஐஐடி கரக்பூர் அடுத்த தலைமுறையையும் வடிவமைக்கும் என சுந்தர் பிச்சை நெகிழ்ச்சி
இந்தக் கூட்டாண்மை குறித்துப் பேசிய கூகுள் சிஇஓ சுந்தர் பிச்சை, இந்திய மொழிகள், வேளாண்மை மற்றும் கல்வி ஆகிய துறைகளில் ஐஐடி கரக்பூர் சிறப்பான பணிகளை மேற்கொண்டு வருவதாக பாராட்டினார்.
ஐஐடி கரக்பூர் தனது வாழ்க்கைப் பாதையை வடிவமைத்ததைப் போலவே இந்தப் புதிய கூட்டாண்மை அடுத்த தலைமுறை மாணவர்களின் பாதையை வடிவமைப்பதைக் காண ஆவலாக உள்ளதாக அவர் குறிப்பிட்டார்.
மேலும் செயற்கை நுண்ணறிவின் நன்மைகள் இந்தியாவில் உள்ள அனைவரையும் சென்றடைய வேண்டும் என்ற பிரதமர் நரேந்திர மோடியின் தொலைநோக்குப் பார்வையை இத்தகைய திட்டங்கள் நனவாக்கும் என்றும் சுந்தர் பிச்சை தெரிவித்துள்ளார்.