மைக்ரோசாப்ட் 365, அவுட்லுக், டீம்ஸ் சேவைகள் உலகளவில் முடக்கம்: OpenAI மற்றும் Anthropic AI சேவைகளும் பாதிப்பு

எழுதியவர் Venkatalakshmi V

Nov 13, 2026

07:50 am

செய்தி முன்னோட்டம்

உலகின் முன்னணி தொழில்நுட்ப நிறுவனமான மைக்ரோசாப்டின் முக்கிய சேவைகளான Microsoft 365, Outlook மற்றும் Teams ஆகியவை வெள்ளிக்கிழமை அதிகாலை 5 மணி நேரத்திற்கும் மேலாக உலகம் முழுவதும் முடங்கின. இந்தத் தொழில்நுட்பக் கோளாறு காரணமாக மைக்ரோசாப்ட் உள்கட்டமைப்பைச் சார்ந்து இயங்கும் OpenAI மற்றும் Anthropic ஆகிய முன்னணி செயற்கை நுண்ணறிவு (AI) நிறுவனங்களின் சேவைகளும் பாதிக்கப்பட்டன. இணையதளச் சேவை முடக்கங்களை கண்காணிக்கும் டவுன்டிடெக்டர் தளத்தின் தரவுகளின்படி, வெள்ளிக்கிழமை அதிகாலை 1.30 மணியளவில் அவுட்லுக் சேவை பாதிப்பு குறித்த புகார்கள் உச்சத்தை எட்டின

நடந்தது என்ன

லட்சக்கணக்கான பயனர்கள் பாதிப்பு

அதிகாலை 1.30 மணிக்கு 1,38,058 புகார்கள் பதிவாகின; பின்னர் 4.30 மணியளவில் இது 34,490 ஆகக் குறைந்தது.

தானியங்கி சுகாதாரச் சோதனைகளில் ஏற்பட்ட தோல்வியால் சில சர்வர்கள் எதிர்பாராத விதமாகச் செயலிழந்ததாகவும், இதனால் மற்ற சர்வர்களில் பணிச்சுமை அதிகரித்ததே இந்த இணைப்புத் துண்டிப்புக்கு காரணம் எனவும் மைக்ரோசாப்ட் விளக்கமளித்துள்ளது.

அதிகாலை 3.30 மணியளவில் அறிக்கை வெளியிட்ட மைக்ரோசாப்ட், முதன்மையாக எக்ஸ்சேஞ்ச் ஆன்லைன் சேவையில் பாதிப்பு ஏற்பட்டதாகவும், மாற்றுப் பாதைகள் வழியாக தரவுப் போக்குவரத்தை திருப்பிவிட்டு சர்வர்கள் படிப்படியாக சீரமைக்கப்பட்டு வருவதாகவும் தெரிவித்தது.

தாக்கம்

AI நிறுவனங்கள் & சர்வதேச வணிகத்தில் ஏற்பட்ட தாக்கம்

மைக்ரோசாப்ட் முடக்கம் காரணமாக பல்வேறு மூன்றாம் தரப்பு நிறுவனங்களும் கடுமையான பாதிப்பைச் சந்தித்தன.

மைக்ரோசாப்ட் கனெக்டர்களில் ஏற்பட்ட கோளாறால் புதிய இணைப்புகளை ஏற்படுத்துவதிலும், கருவிகள் செயல்படுவதிலும் சிக்கல் ஏற்பட்டுள்ளதாக OpenAI மற்றும் Anthropic நிறுவனங்கள் தெரிவித்துள்ளன.

உலகளாவிய மைக்ரோசாப்ட் சேவை முடக்கத்தால் ஏற்பட்ட வணிக பாதிப்புகளை காரணம் காட்டி, மின்சார டிரக் தயாரிப்பு நிறுவனமான வொர்க்ஹார்ஸ் குரூப் தனது மூன்றாம் காலாண்டு நிதிநிலை முடிவுகள் அறிவிப்பை நவம்பர் 12-லிருந்து நவம்பர் 16-க்கு ஒத்திவைத்துள்ளது.

சில வாரங்களுக்கு முன்புதான் மைக்ரோசாப்டின் அஸூர் கிளவுட் தளத்தில் ஏற்பட்ட கோளாறால் உலகளவில் பல தொழில்கள் பாதிக்கப்பட்ட நிலையில், தற்போது மீண்டும் ஏற்பட்டுள்ள இந்த முடக்கம் கார்ப்பரேட் நிறுவனங்களிடையே கவலையை ஏற்படுத்தியுள்ளது.