அமைச்சர் பொன்முடியின் அரசியல் வாழ்க்கைக்கு அஸ்தமனம் எழுதிய உயர் நீதிமன்ற தீர்ப்பு
செய்தி முன்னோட்டம்
தற்போதைய ஆளும் திமுக அரசின் மூத்த அமைச்சரும் உயர்கல்வி துறை அமைச்சருமான பொன்முடிக்கு 3 ஆண்டுகள் சிறைத்தண்டனை விதித்து தீர்ப்பு வழங்கியது சென்னை உயர் நீதிமன்றம்.
கடந்த 2016 ஆம் ஆண்டு, வருமானத்துக்கு அதிகமான சொத்து சேர்த்த வழக்கில், முதலில், நிரபராதி என இந்த வழக்கை விசாரித்த விழுப்புரம் சிறப்பு நீதிமன்றம் தீர்ப்பு வழங்கியது.
இந்த வழக்கில் குற்றவாளிகளாக சேர்க்கப்பட்ட பொன்முடி மற்றும் அவருடைய மனைவி விசாலாட்சியை விடுதலை செய்து தீர்ப்பு எழுதப்பட்டது.
எனினும் இதனை எதிர்த்து சென்னை உயர்நீதிமன்றத்தை அணுகியது லஞ்ச ஒழிப்புத்துறை. இந்த வழக்கை விசாரித்த சென்னை உயர் நீதிமன்ற நீதிபதி ஜெயச்சந்திரன், இருவரையும் விடுதலை செய்து சிறப்பு நீதிமன்றம் பிறப்பித்த தீர்ப்பை ரத்து செய்தார்.
card 2
குற்றவாளி என தீர்ப்பு வழங்கிய உயர் நீதிமன்றம்
கடந்த 19ஆம் தேதி இவர்களின் விடுதலையை ரத்து செய்து உத்தரவிட்ட நீதியரசர், நேற்று இவர்களின் தண்டனை விவரங்களை வெளியிட்டார்.
அதன்படி, அமைச்சர் பொன்முடி குற்றவாளி எனவும், வருமானவரி ஏய்ப்பு செய்ததால் 3 ஆண்டுகள் வரை சிறை தண்டனை அனுபவிக்க வேண்டும் என உத்தரவிட்டார்.
அவருடன், பொன்முடியின் மனைவி விசாலாட்சியும் குற்றவாளி என தீர்ப்பு வழங்கினார், இந்த வழக்கினை விசாரித்த உயர் நீதிமன்ற நீதிபதி ஜெயச்சந்திரன்.
card 3
அஸ்தமனமாகிறது பொன்முடியின் அரசியல் வாழ்க்கை
உயர்நீதிமன்ற தீர்ப்பின் விளைவாக அவரின் எம்.எல்.ஏ. பதவியை இழக்கிறார்.
அதோடு, தண்டனை காலத்துக்குப் பின் 6 ஆண்டுகள் பொன்முடி தேர்தலில் போட்டியிடவும் முடியாது.
கடந்த 2006 - 2011 ஆண்டுகளில் திமுக ஆட்சியின் போதும், உயர்கல்வித் துறை அமைச்சராக பதவி வகித்தார் பொன்முடி.
அப்போது அவர் வருமானத்துக்கு அதிகமாக ஒரு கோடியே 75 லட்சம் ரூபாய்க்கு சொத்துக்கள் சேர்த்ததாக, அவர் மீதும், அவருடைய மனைவி விசாலாட்சி மீதும், கடந்த 2011 ஆம் ஆண்டு லஞ்ச ஒழிப்புத்துறை வழக்கு பதிவு செய்தது.
card 4
பொன்முடியின் அரசியல் வாழ்க்கை:
அமைச்சர் பொன்முடி, விழுப்புரம் மாவட்டம், திருக்கோவிலூர் டி.எடையார் கிராமத்தில் பிறந்தவர். இவரது இயற்பெயர், தெய்வசிகாமணி ஆகும்.
ஆகஸ்ட் 19, 1950ஆம் ஆண்டு பிறந்த பொன்முடி, வரலாறு, அரசியல் மற்றும் பொதுத்துறை நிர்வாகம் ஆகிய துறையில் முதுநிலைப் பட்டமும், வரலாற்றில் முனைவர் பட்டமும் பெற்றவர்.
அதோடு இவர் பேராசிரியராகப் பணியாற்றியுள்ளார் என்பது குறிப்பிடத்தக்கது. அதனால், கட்சியினரால், இனமான இளய பேராசிரியர் என குறிப்பிடப்படுபவர்.
திமுகவின் ஆரம்ப காலங்களில் இருந்து கட்சியில் முக்கிய பதவிகளில் இருந்துள்ளார்.
அந்த வகையில் கட்சியின் மூத்த நிர்வாகிகளில் ஒருவராவார் பொன்முடி.
ஆரம்ப காலங்களில் விழுப்புரம் மாவட்டத்திலிருந்து போட்டியிட்டு வந்த பொன்முடி, கடந்த 2016ஆம் ஆண்டு முதல், திருக்கோயிலூர் சட்டமன்றத் தொகுதியில் போட்டியிடத்துவங்கினார்.
card 5
பொன்முடியின் அடுத்தகட்ட நகர்வு என்னவாக இருக்கும்?
அமைச்சர் பொன்முடி, மனைவி விசாலாட்சிக்கு 3 ஆண்டு சிறை தண்டனை மட்டுமின்றி, இருவருக்கும் தலா ரூ50 லட்சம் அபராதம் விதிக்கப்பட்டது.
எனினும் இந்த 3 ஆண்டு சிறை தண்டனையானது மேல்முறையீட்டுக்காக 1 மாதம் மட்டும் நிறுத்தி வைக்கப்பட்டுள்ளது.
இதன் பின்னர் விழுப்புரம் நீதிமன்றத்தில் பொன்முடி, விசாலாட்சி இருவரும் சரணடைய வேண்டும் என நீதிபதி உத்தரவிட்டார்.
இதனை தொடர்ந்து பொன்முடியின் வழக்கறிஞர், உச்ச நீதிமன்றத்தை அணுகப்போவதாக கூறினார்.
இந்த சூழலில், அமைச்சர் பொன்முடி வகித்து வந்த உயர்கல்வித்துறை, அறிவியல் மற்றும் தொழில்நுட்பத்துறை உள்ளிட்டவை மூத்த அமைச்சரான ராஜகண்ணப்பனுக்கு கூடுதல் பொறுப்பாக ஒதுக்கீடு செய்யப்பட்டுள்ளது.
இது குறித்த பரிந்துரைகளை மு.க.ஸ்டாலின், ஆளுநர் ஆர்.என்.ரவிக்கு செய்த நிலையில், ஆளுநர் இவைகளுக்கு ஒப்புதல் அளித்துள்ளார் என்பது குறிப்பிடத்தக்கது.