'தமிழ்நாட்டுக்காகவும், தமிழக மக்களுக்காகவும் உழைப்போம்': TVK தலைவர் விஜய் பேச்சு
பலரும் எதிர்பார்த்திருந்த தமிழக வெற்றி கழகத்தின் கொடியை இன்று சென்னையில் வெளியிட்டார் நடிகர் விஜய். சென்னை பனையூரில் உள்ள கட்சி அலுவலகத்தின் நடந்த இந்த விழாவில் விஜய்யின் தந்தை-இயக்குனர் SAC, விஜய்யின் தாய் ஷோபா சந்திரசேகர் ஆகியோரும் கலந்து கொண்டனர். கட்சியின் கொடியினை வெளியிட்டு பேசிய விஜய், கட்சியின் முதல் மாநாட்டிற்கான ஏற்பாடுகள் நடைபெற்று வருவதாகவும், இதற்கான விவரங்கள் விரைவில் வெளியாகும் எனவும் கூறினார்.
Twitter Post
ஆரவாரங்களுக்கு இடையே அமைதியாக உரையாற்றிய விஜய்
தொண்டர்களின் ஆரவாரத்திற்கு இடையே பேசிய விஜய்,"என் நெஞ்சில் குடியிருக்கும் என் தோழர்களாகிய உங்கள் முன்னாலும் சரி, என் நெஞ்சில் குடியிருக்கும் தமிழ்நாட்டு மக்கள் முன்னாலும் சரி இந்த கொடியை அறிமுகம் செய்வதை பெருமையாக நினைக்கிறேன். இதுவரை நாம் நமக்காக உழைத்தோம். இனி கட்சிரீதியாக நம்மை தயார்படுத்திக் கொண்டு தமிழ்நாட்டுக்காகவும், தமிழக மக்களுக்காகவும் உழைப்போம்" என்றார். "புயலுக்குப் பின் அமைதி மாதிரி, நம் கொடிக்குப் பின்னாலும் ஒரு சுவாரஸ்யமான வரலாற்றுக் குறிப்பு ஒன்று உள்ளது. நீங்கள் அனைவரும் ஆர்வமுடன் காத்துக் கொண்டிருக்கும் அந்த நாளில், நம்முடைய கொள்கைகள், செயல்திட்டங்களுடன் இந்த கொடிக்கான விளக்கமும் சொல்லப்படும். அதுவரைக்கும் சந்தோசமா, மாஸா, கெத்தா நம்ம கொடியை ஏற்றிக் கொண்டாடுவோம்".
சமத்துவக்கொள்கை உறுதிமொழி
"இது வெறும் கட்சிக் கொடி மட்டுமல்ல. தமிழ்நாட்டின் வருங்கால தலைமுறைக்கான வெற்றிக் கொடியாக இதை நான் பார்க்கிறேன். நான் சொல்லாமலேயே இந்த கொடியை உங்கள் உள்ளத்திலும், இல்லத்திலும் நீங்கள் ஏற்றுவீர்கள் என்று எனக்கு தெரியும். நல்லதே நடக்கும் வெற்றி நிச்சயம்" இவ்வாறு விஜய் பேசினார். கொடியேற்றத்திற்கு முன்னர் தொடர்களும், கட்சி நிர்வாகிகளும் இணைந்து கட்சியின் உறுதிமொழியை ஏற்றுக்கொண்டனர். அப்போது சமத்துவக்கொள்கை பேணுவோம் என உறுதி கூறினார்.
