தமிழகம் முழுவதும் போரட்டத்தில் குதித்த தொடக்கக்கல்வி ஆசிரியர்கள்: அமைச்சர் அன்பில் மகேஷ் கூறுவது என்ன?
செய்தி முன்னோட்டம்
தமிழ்நாடு தொடக்கக் கல்வி ஆசிரியர் இயக்கங்களின் கூட்டு நடவடிக்கை குழு (டிட்டோஜாக்) இன்று (செவ்வாய்க்கிழமை) பழைய ஓய்வூதிய திட்டத்தை மீட்டமைப்பது உட்பட 31 முக்கிய கோரிக்கைகளை வலியுறுத்தி ஒருநாள் வேலைநிறுத்தப் போராட்டம் மற்றும் பல்வேறு கட்ட போராட்டங்களை அறிவித்தது.
இந்த போராட்டத்தில், தமிழகம் முழுவதும் தொடக்கப்பள்ளி ஆசிரியர்கள் கலந்து கொண்டுள்ளனர்.
இதனால், பெரும்பாலான தொடக்க பள்ளிகள் இன்று இயங்கவில்லை. பல பள்ளிகளில் குறைந்த அளவிலான ஆசிரியர்கள் மட்டுமே பணிக்கு வந்துள்ளனர்.
அமைச்சர் பதில்
பள்ளி கல்வித்துறை அமைச்சர் அன்பில் மகேஷ் கூறுவது என்ன?
ஆசிரியர்களின் இந்த போராட்டம் குறித்து பள்ளிக்கல்வித்துறை அமைச்சர் அன்பில் மகேஷிடம் கேட்கப்பட்டது. அதற்கு பதிலளித்த அவர்,"ஆசிரியர்களின் 31 கோரிக்கைகளில் 12-ஐ நிறைவேற்றி தருவதாக ஏற்கனவே தெரிவிக்கப்பட்டுள்ளது. எனினும் அடையாள வேலை நிறுத்த போராட்டத்தில் ஆசிரியர்கள் இறங்கியுள்ளனர். அவர்கள் உணர்விற்கு மதிப்பளித்து, நேரில் அழைத்து பேசி, கோரிக்கைகள் குறித்து பரிசீலிக்கப்படும்" எனத்தெரிவித்தார்.
இந்த நிலையில், அரசுப்பள்ளிகள் இயங்காமல் இருக்கக்கூடாது என்பதால், அனைத்து பள்ளிகளும் தேவையான அறிவுறுத்தல்களை பின்பற்றி இயங்குவதை உறுதி செய்ய வேண்டும் என மாவட்ட மற்றும் வட்டார கல்வி அலுவலர்களுக்கு பள்ளிக்கல்வித்துறை அறிவுறுத்தியுள்ளது.