அரசு செலவுகள் உயர்வு; முதல் 6 மாதங்களில் 42.1%-ஐ எட்டிய நிதிப் பற்றாக்குறை; முக்கிய தரவுகள்

எழுதியவர் Sekar Chinnappan

Oct 30, 2026

08:34 pm

செய்தி முன்னோட்டம்

நடப்பு 2026-27 நிதியாண்டின் ஏப்ரல் முதல் செப்டம்பர் வரையிலான முதல் ஆறு மாத காலத்தில், இந்தியாவின் நிதிப் பற்றாக்குறை ₹7.14 லட்சம் கோடியாக உயர்ந்துள்ளது. இது முழு நிதியாண்டிற்கு மதிப்பிடப்பட்ட மொத்த இலக்கில் (₹16.96 லட்சம் கோடி) 42.1 சதவீதமாகும். கடந்த நிதியாண்டின் இதே காலத்தில் நிதிப் பற்றாக்குறை 36.5 சதவீதமாக மட்டுமே இருந்த நிலையில், தற்போது அரசுக்கு நிதிப் பயன்பாட்டு அழுத்தம் அதிகரித்துள்ளதை கணக்குக் கட்டுப்பாட்டாளர் தலைமை அலுவலகத் தரவுகள் காட்டுகின்றன.

மொத்த வருவாய்

அரசின் மொத்த செலவினங்கள் மற்றும் வருவாய் வரவுகள் நிலவரம்

செப்டம்பர் மாத முடிவில் மத்திய அரசின் மொத்த செலவினம் ₹25.50 லட்சம் கோடியை (ஆண்டு இலக்கில் 47.7%) எட்டியுள்ளது.

அதேவேளையில், அரசின் மொத்த வருவாய் வரவு ₹18.35 லட்சம் கோடியாக (ஆண்டு இலக்கில் 50.3%) பதிவாகியுள்ளது.

இதில் வரி வருவாய் மூலம் ₹12.76 லட்சம் கோடியும், வரி அல்லாத வருவாய் மூலம் ₹4.81 லட்சம் கோடியும் அரசுக்குக் கிடைத்துள்ளது.

வரும் மாதங்களில் வரி வசூல் அதிகரிக்கும் பட்சத்தில் நிதி நிலைமை சீரடையும் எனக் எதிர்பார்க்கப்படுகிறது.

மானியங்கள்

மூலதன செலவுகள் வேகம் மற்றும் முக்கிய மானியங்களின் பயன்பாடு

அரசின் கட்டமைப்பு வளர்ச்சிக்கு உதவும் மூலதன செலவினம் வேகமெடுத்து, திட்டமிடப்பட்ட ₹12.22 லட்சம் கோடியில் 53.6 சதவீதத்தை (₹6.55 லட்சம் கோடி) எட்டியுள்ளது.

அதேபோல, முக்கிய மானியங்களுக்காக ஏப்ரல் - செப்டம்பர் காலத்தில் ₹2.23 லட்சம் கோடி செலவிடப்பட்டுள்ளது.

இதில் யூரியா மற்றும் உர மானியங்களுக்காக ₹1.19 லட்சம் கோடியும், ஏழை எளிய மக்களுக்கு விலையில்லா உணவு தானியங்கள் வழங்க உணவு மானியமாக ₹1.03 லட்சம் கோடியும் செலவிடப்பட்டுள்ளது.

பற்றாக்குறை

அரசு சந்தைக் கடன் திட்டம் மற்றும் வருவாய்ப் பற்றாக்குறை

நிதிப் பற்றாக்குறையை ஈடுகட்ட அரசு கடன் வாங்கும் நிலையில், நிதியாண்டின் இரண்டாம் பாதியில் கடன் வாங்கும் அளவை ₹1.2 லட்சம் கோடி குறைக்க அரசு முடிவு செய்துள்ளது.

இதன்படி, அக்டோபர் - மார்ச் காலத்தில் ₹7.86 லட்சம் கோடி மட்டுமே கடன் பத்திரங்கள் மூலம் திரட்டப்படவுள்ளது.

மேலும், செப்டம்பர் முடிவில் நாட்டின் வருவாய்ப் பற்றாக்குறை ₹1.38 லட்சம் கோடியாகப் பதிவாகியுள்ளது.

இது ஆண்டிற்கான வரவு செலவு திட்ட மதிப்பீட்டில் 23.4 சதவீதமாகும்.