செந்தில் பாலாஜியை அமலாக்கத்துறை கைது செய்தது செல்லும் - உச்சநீதிமன்றம் அதிரடி
செய்தி முன்னோட்டம்
சட்ட விரோத பண பரிமாற்ற வழக்கில் கைதான தமிழக மின்சாரத்துறை அமைச்சர் செந்தில் பாலாஜி அவர்கள் நெஞ்சுவலி காரணமாக சென்னை ஓமந்தூரார் மருத்துவமனையில் சிகிச்சைக்காக அனுமதிக்கப்பட்டார்.
அதனையடுத்து, அவருக்கு அறுவை சிகிச்சை மேற்கொள்ளப்பட்டு மருத்துவமனையில் ஓய்வு எடுத்த பின்னர் புழல் சிறைக்கு மாற்றப்பட்டார்.
இதனிடையே செந்தில் பாலாஜியின் மனைவி சென்னை உயர்நீதிமன்றத்தில் ஆட்கொணர்வு மனுவினை தாக்கல் செய்திருந்தார்.
இது குறித்த விசாரணை மேற்கொள்ளப்பட்ட நிலையில், 3ம் நீதிபதியான சி.வி.கார்த்திகேயன் செந்தில் பாலாஜியின் கைது செல்லும் என்றும், அவர் உடல்நிலை முழுவதுமாக தேறிய பின்னர் அமலாக்கத்துறை விசாரணை மேற்கொள்ளலாம் என்றும் தீர்ப்பளித்திருந்தார்.
இந்த தீர்ப்பினை எதிர்த்து செந்தில் பாலாஜி மற்றும் அமலாக்கத்துறை சார்பில் உச்சநீதிமன்றத்தில் மேல் முறையீடு செய்யப்பட்டதாக தெரிகிறது.
தீர்ப்பு
செந்தில் பாலாஜியை விசாரிக்க அமலாக்கத்துறைக்கு உச்சநீதிமன்றம் அனுமதி
இதனைத்தொடர்ந்து, இந்த மேல்முறையீட்டு மனுவானது போபண்ணா மற்றும் சுந்தரேஷ் உள்ளிட்ட உச்சநீதிமன்ற நீதிபதிகள் அமர்வு முன்னிலையில் விசாரணைக்கு வந்தது.
அப்போது இருதரப்பினர் சார்பிலும் ஆஜரான வழக்கறிஞர்கள் தங்கள் பலமான வாதங்களை கடந்த 2ம் தேதி முன்வைத்ததாக கூறப்படுகிறது.
இந்நிலையில், இன்று(ஆகஸ்ட்.,7)இதற்கான தீர்ப்பு வழங்கப்பட்டுள்ளது.
அதன்படி, செந்தில் பாலாஜி கைது நடவடிக்கைக்கு எதிராக தாக்கல் செய்யப்பட்ட மேல்முறையீட்டு வழக்குகள் அனைத்தையும் தள்ளுபடி செய்த உச்ச நீதிமன்றம், அமலாக்கத்துறை செந்தில் பாலாஜியை கைது செய்தது செல்லும் என்று கூறி தீர்பளித்துள்ளனர்.
அதேபோல் அவரை அமலாக்கத்துறை கைது செய்தது சட்டவிரோதம் இல்லை, அது சரி தான் என்றும் நீதிபதிகள் தெரிவித்துள்ளனர்.
மேலும், அவரை அமலாக்கத்துறை காவலில் எடுத்து விசாரணை மேற்கொள்ள அமலாக்கத்துறைக்கு உச்சநீதிமன்றம் அனுமதியும் வழங்கியுள்ளது குறிப்பிடத்தக்கது.