ஆபரேஷன் சிந்தூரைத் தொடர்ந்து பிரதமர் மோடி இன்று இரவு 8 மணிக்கு நாட்டு மக்களுக்கு உரையாற்றுகிறார்
செய்தி முன்னோட்டம்
இந்தியாவிற்கும் பாகிஸ்தானுக்கும் இடையே தொடர்ச்சியான ராணுவத் தாக்குதல்களைத் தொடர்ந்து, தற்போது அமைதி நிலவி வரும் நிலையில், பிரதமர் நரேந்திர மோடி திங்கட்கிழமை (மே 12) இரவு 8 மணிக்கு நாட்டு மக்களுக்கு உரையாற்ற உள்ளார்.
பாகிஸ்தான் எல்லையில் சமீபத்திய முன்னேற்றங்கள், முக்கியமான பாகிஸ்தான் ராணுவ உள்கட்டமைப்புகள் மீது இந்திய விமானப்படையின் துல்லியமான தாக்குதல்கள் மற்றும் இந்திய தளங்களை குறிவைத்து பாகிஸ்தானின் பதிலடி ஏவுகணை மற்றும் ட்ரோன் தாக்குதல்கள் உட்பட பல்வேறு விஷயங்கள் குறித்து அவர் பேசுவார் என எதிர்பார்க்கப்படுகிறது.
மே 7 அன்று ஆபரேஷன் சிந்தூர் தொடங்கப்பட்டதிலிருந்து மோடியின் முதல் பொது உரை இதுவாகும்.
ஆபரேஷன் சிந்தூர்
ஆபரேஷன் சிந்தூர் மூலம் அதிரடி நடவடிக்கை
இதற்கு முன்னரும் தீவிரவாத தாக்குதலுக்கு பதிலடியாக பாகிஸ்தானிற்குள் சென்று தாக்கினாலும், ஆபரேஷன் சிந்தூர் பாகிஸ்தானை நோக்கி இந்தியாவின் ராணுவ நிலைப்பாட்டில் குறிப்பிடத்தக்க மாற்றத்தைக் குறித்தது.
இந்த நடவடிக்கை, அணு ஆயுத மையங்களுக்கு அருகிலுள்ள தளங்கள் உட்பட, மூலோபாய பாகிஸ்தான் விமானத் தளங்களை குறிவைத்து தாக்கியது சர்வதேச கவனத்தை ஈர்த்தது.
பாகிஸ்தானின் அணு ஆயுத மையங்களில் கைவைத்த பிறகே, அமெரிக்கா உள்ளிட்ட முக்கிய நாடுகள் உடனடியாக தலையிட்டு, பாகிஸ்தானை இந்தியாவிடம் பேசி சமாதானமாக செல்ல வலியுறுத்த வைத்தது குறிப்பிடத்தக்கது.
பிரதமர் உரை
பிரதமர் உரையில் எதிர்பார்க்கப்படும் விஷயங்கள்
இதற்கிடையே, பிரதமரின் உரை இந்தியாவின் தேசிய பாதுகாப்பு முன்னுரிமைகள், அதன் ஆயுதப்படைகளின் தயார்நிலை மற்றும் எதிர்காலத்தில் அரசாங்கத்தின் எதிர்வினை உத்தி ஆகியவவை குறித்து இருக்கும் என எதிர்பார்க்கப்படுகிறது.
பாகிஸ்தானுடனான பதற்றத்தை மேலும் அதிகரிப்பது அல்லது தணிப்பது குறித்த இந்தியாவின் நிலைப்பாட்டை கோடிட்டுக் காட்டும் அதே வேளையில், பொதுமக்களின் ஒற்றுமை மற்றும் மீள்தன்மைக்கு மோடி அழைப்பு விடுக்கலாம் என்றும் ஆய்வாளர்கள் எதிர்பார்க்கின்றனர்.
பிராந்திய மோதலின் இந்த முக்கியமான கட்டத்தில் பொது விவாதத்தையும் இராஜதந்திர திசையையும் இந்த உரை வடிவமைக்கக்கூடும் என்பதால், நாடு முழுவதும் உள்ள மக்கள் உரையை எதிர்நோக்கி உள்ளார்கள்.